PASAL 25
“Kupindo gelah Kaisar si Ngadili Aku!”
Paulus jadi usihen i bas mbela berita si meriah
Arah Perbahanen Rasul-Rasul 25:1–26:32
1, 2. (a) Situasi kai nge si adapi Paulus? (b) Penungkunen kai nge si perlu siteh jawapenna?
SANGA i Kesarea, Paulus ijaga prajurit denga. Dua tahun kenca si e, piga-piga wari denga pe ia seh i Judea, enggo lit silang-langna telu kali iusahaken kalak Jahudi munuh ia. (Perb. 21:27-36; 23:10, 12-15, 27) Memang kalak e lenga berhasil, tapi kalak e la nyerah. Sanga teh Paulus maka banci saja iserahken ka ia man kalak e, katakenna man gubernur Roma si gelarna Pestus, “Kupindo gelah Kaisar si ngadili aku!”—Perb. 25:11.
2 Idukung Jahwe nge keputusen Paulus guna naik banding man kaisar Roma? Jawapenna penting man banta gundari. Jawapen e nampati kita meteh banci nge siusih Paulus ntah lang sanga “sipake undang-undang guna mbela berita si meriah.”—Pil. 1:7.
“Tedis i Lebe-Lebe Kursi Penghakimen” (Perb. 25:1-12)
3, 4. (a) Engkai maka pindo kalak Jahudi gelah Paulus ibaba ku Jerusalem, janah uga Paulus banci selamat? (b) Bali bagi Jahwe mpegegehi Paulus, uga Jahwe mpegegehi umatNa si gundari?
3 Telu wari kenca Pestus jadi gubernur i Judea, lawes ia ku Jerusalem. a I je, begikenna imam-imam kepala ras kalak Jahudi si ihamati nuduh Paulus alu erbage-bage kejahaten si serius. Teh kalak e maka isuruh pemerentah Roma Pestus guna njaga perdamen ras kalak e bage pe ras kerina kalak Jahudi. Emaka pindoken kalak e man Pestus guna maba Paulus ku Jerusalem gelah ia iadili i je. Tapi, irencanaken kalak e guna munuh Paulus bas perdalanen arah Kesarea nari ku Jerusalem. La Pestus setuju man pemindon kalak e. Nina, “Pediatlah kalak si erkuasa i tengah-tengah kena ikut ras aku [ku Kesarea], gelah banci kari pesehna tuduhen kerna ia adi lit kin salahna.” (Perb. 25:5) Sekali nari, Paulus iselamatken.
4 Ipegegehi Jahwe Paulus arah Jesus gelah banci tetap megenggeng ngadapi kerina persidangenna. Contohna, bas sada pengenehenen, kataken Jesus man Paulus, “Ula kam mbiar!” (Perb. 23:11) Gundari pe, umat Dibata ngadapi erbage-bage masalah ras penindasen. Memang, labo ilindungi Jahwe kita arah tiap masalah, tapi bereNa kita kepentaren ras gegeh gelah banci tetap megenggeng. Selain si e, tek kita maka Dibatata si perkeleng pasti lalap mereken ‘kengasupen si luar biasa’ man banta.—2 Kor. 4:7.
5. Kai si lakoken Pestus nandangi Paulus?
5 Piga-piga wari kenca si e, ‘kundul Pestus bas kursi penghakimen’ i Kesarea. b I lebe-lebena, tedis Paulus ras kalak si nuduh ia. Ituduh kalak e Paulus ngelakoken kejahaten si la ilakokenna. Emaka, nina Paulus, “Labo aku ersalah man Undang-Undang kalak Jahudi, man rumah pertoton, bage pe man Kaisar.” Labo lit salah Paulus, emaka arusna ibebasken ia. Tapi, kai keputusen Pestus? Gelah ngena ate kalak Jahudi man bana, nina Pestus man Paulus, “Nggit nge kam lawes ku Jerusalem gelah kuadili perkarandu i jah?” (Perb. 25:6-9) La kel masuk akal kai si ikataken Pestus e! Adi Paulus ibaba mulihken ku Jerusalem, kalak si nuduh ia me si jadi hakimna, emaka pasti ia mate! Ipilih Pestus erban meriah akap jelma si enterem asangken ngelakoken kai si benar. Piga-piga tahun sope si e, lit ka gubernur si deban eme Pontius Pilatus si ngelakoken perbahanen si seri man Jesus. (Joh. 19:12-16) Hakim-hakim jaman gundari pe banci saja erban keputusen si la adil guna erban meriah ukur jelma si enterem. Emaka, bas kasus-kasus si lit hubungenna ras umat Dibata, labo teta mamang adi iban pengadilen keputusen si la sesuai ras bukti-bukti si lit.
6, 7. Engkai maka pindoken Paulus gelah kaisar si ngadili ia, janah usihen kai si berekenna man banta?
6 Sura-sura Pestus guna erban meriah ukur kalak Jahudi banci erban Paulus mate. Emaka, igunaken Paulus hakna selaku warga negara Roma. Nina man Pestus, “Gundari aku tedis i lebe-lebe kursi penghakimen Kaisar, janah i jenda kap arusna aku iadili. La lit salahku man kalak Jahudi, kam pe tehndu nge kerna si e. . . . Emaka kupindo gelah Kaisar si ngadili aku!” Sanga belasken sekalak jelma pemindon si bage, biasana lanai banci itarikna pemindon e. Emaka nina Pestus, “Perban pindondu Kaisar si ngadili kam, laweslah kam ngadap Kaisar.” (Perb. 25:10-12) Perban naik banding Paulus man kaisar, e jadi bukti maka kalak Kristen pe banci ngelakoken si bage. Sanga gunaken penentang undang-undang guna mpengadi dahinta, banci ka sigunaken undang-undang guna mbela hakta bas erberita. c—Ms. 94:20.
7 Lit dua tahun Paulus ipenjaraken amin pe la lit kejahaten si lakokenna. Dungna, banci Paulus mbela dirina i Roma. Tapi, sope ia berkat, lit penguasa si deban si merhat jumpa ras ia.
Adi keputusen pengadilen la ndukung kita, banci kita naik banding
“Kupatuhi Kai si Kataken Jesus” (Perb. 25:13–26:23)
8, 9. Engkai maka Raja Agripa reh ku Kesarea?
8 Piga-piga wari kenca ibegi Pestus pemindon Paulus guna naik banding ku kaisar, Raja Agripa ras turangna Bernike reh ndahi Pestus guna “ngataken selamat” man bana perban ia enggo jadi gubernur. d Bas jaman Roma mbarenda, biasana pejabat-pejabat reh ndahi gubernur si mbaru ilantik. Kerehen Agripa e ncidahken maka erteman atena ras Pestus. Alu bage, bas pudi wari banci sampati Pestus ia.—Perb. 25:13.
9 Ituriken Pestus kerna Paulus man Raja Agripa. Emaka, merhat ia jumpa ras Paulus. Paginna, kundul duana penguasa e bas kursi penghakimen. Tapi, kata-kata si ibelasken Paulus ndauh hebaten asangken cara Agripa ras Pestus masuk ku ingan pengadilen guna megiken kasus Paulus.—Perb. 25:22-27.
10, 11. Kai buktina mehamat Paulus man Agripa, janah kai saja si ituriken Paulus man Agripa?
10 Alu mehamat, ngata bujur Paulus man Raja Agripa perban enggo berekenna kesempaten man Paulus guna mbela dirina. Akui Paulus maka iteh Agripa kebiasan bage pe masalah si lit bas kalak Jahudi. Kenca si e, nina Paulus, ‘Aku mbarenda kalak Parisi, eme sekte si kerasna bas agama kami.’ (Perb. 26:5) Sanga Paulus kalak Parisi denga, tek ia man janji Dibata maka reh me pagi Mesias. Situhuna kalak si nentang ia pe tek nge man janji e. Tapi, kenca Paulus jadi kalak Kristen, alu perpang iberitakenna maka Jesus me Mesias si ijanjiken e. Ijelasken Paulus man Agripa maka ia itangkap perban beritakenna maka janji Dibata kerna kerehen Mesias ndai enggo terjadi. Kenca ibegi Agripa kerna si e, reh merhatna ia meteh kai ka si nandangi ikataken Paulus. e
11 Kenca si e, ituriken Paulus maka mbarenda kejam kel perbahanenna man kalak Kristen. Nina, “Mbarenda, aku pe tek maka arus kulakoken kai pe guna ngelawan gelar Jesus kalak Nasaret e. . . . Perban segatna ateku, kuayaki kalak e [pengikut Kristus] seh ku kota-kota si deban guna nyiksa kalak e.” (Perb. 26:9-11) Labo ilebih-lebihken Paulus ceritana e. Enterem kalak si meteh uga mbarenda kejamna perbahanenna man kalak Kristen. (Gal. 1:13, 23) Banci jadi tersungkun-sungkun Agripa, ‘Kai nge si erban dilaki si kejam e dungna jadi kalak Kristen?’
12, 13. (a) Ceritakenlah uga tangtangna Paulus jadi kalak Kristen. (b) Kai ertina Paulus “nukuli tongkat”?
12 Kata-kata Paulus berikutna njawap penungkunen Agripa, nina, “Pernah aku lawes ku Damaskus alu kuasa ras perentah arah imam-imam kepala. Tapi, o Raja, bas perdalanen, sanga ciger, kuidah terang arah langit nari si terangen asangken matawari. Terangina ku sekelilingku bage pe ku sekeliling kalak si radu ras aku. Kerina kami ndabuh ku taneh. Kubegi sora erlebuh man bangku bas bahasa Heber, ‘Saul, Saul, engkai maka siksandu aku? Adi terus lawanndu aku, kam bagi nukuli tongkat si iban arah logam.’ Kujawap, ‘Ise kin kam, Tuan?’ Ngaloi Tuan, ‘Aku kap Jesus si siksandu.’” f—Perb. 26:12-15, bage pe cataten i teruh.
13 Sope idahna pengenehenen si luar biasa e, Paulus bagi asuh-asuhen si “nukuli tongkat.” Bali bagi asuh-asuhen si ngelukai dirina perban tukulina ujung tongkat permakanna si ntelap, Paulus pe ngelukai dirina secara rohani perban ilawanna peraten Dibata. Tapi, sanga cidahken Jesus dirina man Paulus bas dalan muat ku Damaskus, iubah Jesus perukuren Paulus. Tutus ate Paulus nembah Dibata tapi salah carana.—Joh. 16:1, 2.
14, 15. Kai nina Paulus kerna perubahen si ibanna?
14 Mbelin kel perubahen si iban Paulus bas kegeluhenna. Ikatakenna man Agripa, “Kupatuhi kai si kataken Jesus bas pengenehenen e. Emaka tangtangna aku erberita man kalak si lit i Damaskus, jenari man kalak si lit i Jerusalem, bage pe ku kerina daerah Judea. Kenca si e, ku bangsa si deban. Kuberitaken maka kerina kalak e arus ertobat ras mulih ku Dibata alu perbahanen si mbuktiken pertobatenna.” (Perb. 26:19, 20) Ertahun-tahun dekahna, ilakoken Paulus tugas si bereken Jesus man bana bas perdalanen muatna ku Damaskus. Kai hasilna? Kalak si nggit megiken berita si meriah si ipeseh Paulus dungna ertobat. Lanai lakoken kalak e perbahanen si la mehuli janah dungna lakoken kalak e peraten Dibata. Patuh kalak e man undang-undang janah usahakenna erdame ras kalak si deban i japa pe ia tading.
15 Tapi, la akap kalak Jahudi penting manpaat-manpaat si idat kalak si deban arah berita Paulus. Nina Paulus, “E me sebapna tangkap kalak Jahudi aku bas rumah pertoton janah usahakenna munuh aku. Tapi kugejapken kel penampat Dibata, emaka seh wari enda pe terus aku erberita man kalak biasa ras kalak si terpandang.”—Perb. 26:21, 22.
16. Uga carata ngusih Paulus sanga njelasken kinitekenta man hakim-hakim ras penguasa-penguasa?
16 Perban kita kalak Kristen, arus kita ‘ersikap katawari pe guna njawap kerina kalak si nungkun’ kerna arapenta. (1 Pet. 3:15) Adi arus sijelasken kinitekenta man hakim-hakim ntah pe penguasa, banci siusih Paulus sanga ia ngerana man Agripa ras Pestus. Alu mehamat banci sikataken man kalak e maka Pustaka enggo nampati kita ras kalak si deban jadi kalak si reh ulina. Mbera-mbera e banci erban erkusur ukur kalak e.
“Ntisik nari Enggo Banndu Aku Jadi Kalak Kristen” (Perb. 26:24-32)
17. Uga tanggapen Pestus kenca begina kai si kataken Paulus, janah uga tanggapen kalak si gundari?
17 Kenca ibegi Pestus ras Agripa kai si kataken Paulus, bereken kalak e me tanggapen. Perdiateken kai si terjadi, “Sanga ngerana denga Paulus, nina Pestus alu sora megang, ‘Enggo adon kam e, Paulus! Mbuesa pemeteh enggo erban kam adon!’” (Perb. 26:24) Gundari pe enterem kalak si bali bagi Pestus tanggapenna. Ianggap kalak e kalak si nceritaken kai situhuna iajarken Pustaka e kalak si motu. Kalak si meganjang sekolahna pe mesera akapna tek man ajaren Pustaka kerna kekeken kalak mate.
18. Uga jawapen Paulus man Pestus, janah uga tanggapen Agripa?
18 Tapi, bagenda nina Paulus njawap gubernur, “Pestus si kuhamati, aku labo adon. Kai si kukataken e tuhu janah kuukuri nge lebe. Situhuna, terus terang aku ngerana man Raja sebap tehna nge enda kerina. . . . O Raja Agripa, tek nge kam man Ajaren Nabi-Nabi? Kuteh nge maka kam tek.” Nina Agripa man Paulus, “Ntisik nari enggo banndu aku jadi kalak Kristen.” (Perb. 26:25-28) La soal kata-kata Agripa e belaskenna arah pusuhna nari ntah lang, si pasti kai si kataken Paulus kena ku pusuhna.
19. Kesimpulen kai si iban Pestus ras Agripa kerna Paulus?
19 Kenca si e, cinder me Agripa ras Pestus. Enda ncidahken maka perjumpan e enggo dung. “Muatna ndarat, ngerana kalak e sada ras si debanna, nina, ‘Labo lit kai pe si lakoken dilaki enda si erban ia patut ihukum mate ntah pe ipenjaraken.’ Kenca si e, nina Agripa man Pestus, ‘Situhuna, banci ia ibebasken adi la pindona Kaisar si ngadili ia.’” (Perb. 26:31, 32) Iteh kalak e maka Paulus labo ersalah. Banci saja, dungna enggo lebih iangkai kalak e kerna kalak Kristen janah reh ulina perbahanen kalak e.
20. Kai gunana pembelan Paulus e?
20 Banci saja, kenca ngerana Paulus man Agripa ras Pestus, labo dungna kalak e jadi kalak Kristen. Adi bage, lit nge gunana Paulus ngerana man kalak e? Lit, Paulus banci erberita “ku lebe raja-raja ras gubernur-gubernur” i Judea si mungkin saja lenga pernah megi berita si meriah. (Luk. 21:12, 13) Selain si e, pengalamen ras kesetian Paulus banci mpegegehi kiniteken turang seninana.—Pil. 1:12-14.
21. Kai hasilna adi terus kita erberita amin gia lit tentangen?
21 Gundari pe bage. Adi terus kita erberita amin pe lit tentangen, pasti sidat hasil si mehuli. Banci ka lit kesempatenta erberita man pejabat-pejabat si mesera njumpaisa. Adi tetap kita megenggeng, turang seninata banci terpegegehi janah teriahken ka kalak e gelah lebih perpang mberitaken Kerajan Dibata.
a Nen kotak “ Gubernur Roma Porkius Pestus.”
b “Kursi penghakimen” eme kursi si itamaken bas panggung si meganjang. Perban kursi e lit bas ingan si meganjang, e ncidahken maka keputusen hakim e serius janah la banci iganggu gugat. Pilatus pe kundul bas kursi penghakimen sanga ipertimbangkenna tuduhen-tuduhen man Jesus.
c Nen kotak “ Naik Banding gelah Bebas Erberita.”
d Nen kotak “ Raja Herodes Agripa II.”
e Selaku kalak Kristen, iakui Paulus maka Jesus kap Mesias e. Tapi, iakap kalak Jahudi Paulus e murtad perban kalak e la tek man Jesus.—Perb. 21:21, 27, 28.
f Ikataken Paulus maka lawes ia “sanga ciger.” Lit sekalak ahli Pustaka si ngataken, “Kalak si sangana bas perdalanen biasana istrahat sanga ciger wari perban melas kel. Kecuali, lit dahinna si seh kel pentingna. Arah e siteh maka tutus kel ate Paulus nindas kalak Kristen.”