1. Engkai maka Paulus, Lukas, ras Aristarkus banci tetap tenang?

 KIRA-KIRA tahun 59 M, erlayar me Paulus, Lukas, ras Aristarkus arah Pulau Malta i Laut Tengah ku Italia. Kalak e naik kapal si galang si maba biji-bijin. Bas lebe-lebe kapal e lit lambang “Anak-Anak Zeus,” paksa si e Paulus tahanen denga janah lit penjaga si njaga ia. (Perb. 27:2) Pegawai-pegawai kapal e tek man anak Dewa Zeus, eme si kembar Kastor ras Poluks. (Nen keterangen tambahen nwtsty-IN man Perb. 28:11) Tapi Paulus ras teman-temanna tek man Jahwe. Jahwe kap si ngataken man Paulus maka pasti Paulus ersaksi i Roma janah cinder i lebe-lebe kaisar.​—Perb. 23:11; 27:24.

2, 3. Arah ja nge kapal Paulus lewat, janah penampat kai si idat Paulus bas kerina perdalanenna?

² Lit telu wari kalak e tading i Sirakusa, kota e lit i Sisilia janah jilena menam bali bagi Aten ras Roma. Kenca si e naik kapal kalak e ku Regium, si lit i bagin selatan Italia. Regium e dauhna 320 kilometer arah pelabuhen Puteoli i Italia (adi gundari, i deher Napoli), tapi perban lit angin selatan, dua wari ngenca kalak e erlayar ku Puteoli.​—Perb. 28:12, 13.

³ Paulus enggo nandangi seh i Roma guna ngadap Kaisar Nero. Bas kerina perdalanenna, “Dibata sumber kerina pengapul” lalap ngarak-ngarak Paulus. (2 Kor. 1:3) Sibahas me kari maka lalap idukung Jahwe Paulus, janah Paulus terus semangat selaku utusen injil.

4, 5. (a) Uga perbahanen turang senina i Puteoli man Paulus ras teman-temanna, janah engkai maka ipediat penjaga Paulus tading ras turang senina? (b) Engkai maka perlu tetap mehuli perbahanenta sanga kita bas penjara?

⁴ I Puteoli, Paulus ras teman-temanna ‘jumpa ras senina-senina, ipaksa kalak e Paulus ras teman-temanna tading pitu wari dekahna.’ (Perb. 28:14) Turang senina bas Puteoli jadi usihen bas nampati kalak si deban. Pasti dat kalak e mbue pasu-pasu perban ipegegehi Paulus ras teman-temanna kalak e secara rohani. Tapi engkai maka tahanen  si iawasi bagi Paulus banci ndatken mbue kel kebebasen? Banci saja mehuli perbahanen Paulus, emaka tek penjaga man bana.

⁵ Gundari pe bage, umat Jahwe si ipenjaraken ras si itamaken ku kamp konsentrasi biasana banci ndatken piga-piga kebebasen perban mehuli perbahanenna. Contohna i Rumania, lit sekalak perampok si ihukum 75 tahun penjara. Mulai me ia erlajar Pustaka janah berubah sipat-sipatna. Hasilna, sanga isuruh petugas penjara ia lawes ku kota guna nukur keperlun penjara, tek kalak e man bana emaka lanai awasi kalak e ia. Si pentingna, perbahanenta si mehuli banci erban gelar Jahwe imuliaken.​—1 Pet. 2:12.

6, 7. Kai si ilakoken turang senina arah Roma si ncidahken maka keleng ate kalak e man Paulus ras teman-temanna?

⁶ Berkat me Paulus ras teman-temanna arah Puteoli nari ku Roma. Mbelin kemungkinenna, erdalan kalak e kira-kira 50 kilometer ku Kapua arah dalan Apia. Dalan si terkenal e ilapisi batu-batu si galang janah rata. Kalak si mentas arah dalan e banci idahna kuta-kuta si mejile, janah bas piga-piga ingan banci ka idahna Laut Tengah. Dalan e pe ngelewati paya-paya ntah pe rawa-rawa si gelarna Paya Pontin. Paya e dauhna kira-kira 60 kilometer arah Roma. Bas paya e me lit Pajak Apius. Itulis Lukas maka kenca begi senina-senina i Roma kerna kerehen Paulus ras teman-temanna, reh senina-senina e ndahi kalak e ku Pajak Apius. Tapi piga-piga nimai bas kede si igelari Telu Rumah. Kede e dauhna kira-kira 50 kilometer arah Roma. Luar biasa kel kekelengen si icidahken turang senina e!​—Perb. 28:15.

⁷ Pajak Apius labo ingan si nyaman guna istrahat adi ngadi-ngadi ateta kenca enggo ndauh erdalan. Sekalak penyair Roma si gelarna Horatius ngataken maka “bas pajak e enterem pelaut, janah  si mpuna penginapen pe kasar.” Itulisna ka maka “launa pe ciga kel ate,” emaka man pe la ia nggit i je. Tapi amin pe ingan e la nyaman, turang senina arah Roma meriah ukurna nimai kerehen Paulus ras teman-temanna gelah banci kalak e ras-ras erdalan ku Roma.

8. Engkai maka Paulus ngata bujur man Dibata ‘sanga idahna’ turang senina?

⁸ Itulis Lukas, “Sanga idah Paulus” turang senina, “ngata bujur ia man Dibata janah reh tetapna ukurna.” (Perb. 28:15) Idahna saja pe turang senina e, si banci saja enggo tandaina piga-piga, enggo terapuli ia janah terpegegehi. Engkai maka Paulus ngata bujur man Dibata? Perban iteh Paulus maka kekelengen si la mentingken bana e eme salah sada sipat si ihasilken kesah si badia. (Gal. 5:22) Gundari pe, kesah si badia ngiahken kalak Kristen gelah nggit erkorban guna nampati kalak si deban janah ngapuli kalak si susah.​—1 Tes. 5:11, 14.

9. Uga kita banci ngusih semangat turang senina si ndahi Paulus?

⁹ Contohna, kesah si badia ngiahken turang senina ngalo-ngalo pertua keliling, utusen injil, ras pelayan sepenuh waktu. Enterem arah pelayan sepenuh waktu e enggo erban pengorbanen si mbelin gelah banci ngelakoken terbuen bas ngelayani Jahwe. Sisungkunilah banta, ‘Banci nge kulakoken terbuen sanga reh pertua keliling? Contohna, kuundang nge ia ras ndeharana adi ia enggo erjabu guna man ntah pe erberngi i rumahku? Banci nge kuatur jadwalku kerja sama ras kalak e bas erberita?’ Adi silakoken e, sidat me mbue pasu-pasu. Contohna, pasti meriah kel ukur turang senina arah Roma sanga begina pengalamen Paulus ras teman-temanna.​—Perb. 15:3, 4.

10. Uga keadan Paulus i Roma, janah kai si lakokenna la ndekah kenca ia seh?

¹⁰ Sanga Paulus ras turang senina e dungna seh i Roma, “Paulus ibere tading bas sada rumah ras sekalak prajurit si ngawasi ia.” (Perb. 28:16) Biasana gelah tahanen rumah la banci kiam, tanna irante janah rante e iiketken ku tan penjagana. Amin gia bage, la lit rante kai pe si banci erban Paulus lanai mberitaken Kerajan. Emaka kenca telu wari Paulus istrahat perban enggo ndauh perdalanenna, lebuhna peminpin-peminpin kalak Jahudi i Roma gelah pulung. Alu bage banci petandakenna bana janah erberita ia man kalak e.

11, 12. Sanga ngerana Paulus man kalak Jahudi, kai si ilakoken Paulus gelah lanai negatip perukuren kalak e man bana?

¹¹ Nina Paulus, “O senina-senina! Situhuna labo lit sitik pe salahku man bangsata ntah pe man adat nini bulangta. Tapi, itangkap aku i Jerusalem jenari iserahken man kalak Roma. Kenca pereksa kalak e maka labo lit salahku si erban patut aku ihukum mate, bebaskenna atena aku. Tapi perban keberaten kalak Jahudi, kupindo gelah Kaisar si ndungi perkaraku. Si enda kulakoken labo perban kutuduh ateku bangsaku.”​—Perb. 28:17-19.

 ¹² Ilebuh Paulus kalak Jahudi e “senina-senina,” alu bage usahaken Paulus gelah teh kalak e maka seri nge ia ras kalak e, janah gelah lanai negatip perukuren kalak e kerna ia. (1 Kor. 9:20) Selain si e, alu jelas katakenna maka reh ia ku Roma labo guna nuduh kalak Jahudi, tapi guna naik banding man kaisar. Tapi mbelin kemungkinenna, kalak Jahudi i Roma lenga tehna maka pindo Paulus gelah kaisar si ngadili ia. (Perb. 28:21) Engkai maka banci lenga iteh kalak e? Lit sada buku si ngataken, “Kapal Paulus pasti kapal si tangtangna seh i Italia kenca dung musim mbergeh. Sanga musim mbergeh jarang lit kapal si erlayar, emaka utusen kalak Jahudi arah Jerusalem nari ntah pe surat kerna kasus Paulus pasti lenga seh.”

13, 14. Kai si ikataken Paulus gelah banci ia erberita, janah uga kita banci ngusih Paulus?

¹³ Kenca si e, ituriken Paulus kai si erban kalak e penasaren. Nina, “Perban si e maka jumpa ateku kita janah ngerana. Aku irante bagenda perban arapen kalak Israel.” (Perb. 28:20) Arapen e eme arapen kerna Mesias ras Kerajanna, bagi si iberitaken kalak Kristen. Nina peminpin-peminpin kalak Jahudi e, “Merhat kami megi pendapatndu, sebap teh kami i japa pe ilawan kalak sekte si ikutkenndu e.”​—Perb. 28:22.

¹⁴ Adi lit kesempatenta erberita si meriah, siusihlah Paulus. Sigunakenlah penungkunen ntah pe penjelasen si erban kalak tertarik. Banci sigunaken saran-saran si mejile si lit bas Pelayanen ras Kegeluhen Kristen bage pe Tutuslah Atendu i bas Mbaca ras Ngajar. Adi ikutkenndu saran-saran e, banci kam reh beluhna ngajar.

15. Empat pelajaren kai si banci siusih arah Paulus?

¹⁵ Itetapken kalak Jahudi sada wari guna jumpa ras Paulus. ‘Enterem kalak e si reh’ ku rumah si ingani Paulus. Emaka “erpagi-pagi nari seh ku berngi, jelaskenna kerna Kerajan Dibata arah Undang-Undang Musa ras Ajaren Nabi-Nabi, gelah tek kalak e man Jesus.” (Perb. 28:23) Lit empat pelajaren si banci siusih arah cara Paulus erberita. Si pertama, fokus ia man Kerajan Dibata. Si peduaken, usahakenna erban kalak tek. Si peteluken, tukar pikiren ia arah Pustaka. Si peempatken, nggit ia erkorban. Erberita ia “erpagi-pagi nari seh ku berngi.” Mejile kel adi siikutken usihen Paulus e. Hasilna “lit si mulai tek.” Memang, lit ka si la tek. Nina Lukas, “Perban la seri pendapat kalak e, emaka lawesen kalak e je nari.”​—Perb. 28:24, 25a.

16-18. Engkai maka labo mamang ate Paulus sanga kalak Jahudi i Roma la nggit megiken beritana, janah kai si arus siinget sanga lit kalak si la nggit megiken beritata?

¹⁶ Arah Pustaka enggo teh Paulus maka labo kerina kalak nggit ngaloken berita si meriah. Sebelumna pe, enggom gejapkenna si e. Emaka, labo ate Paulus mamang sanga idahna tanggapen kalak e. (Perb. 13:42-47; 18:5, 6; 19:8, 9) Sope lawes kalak si nulak beritana, nina Paulus, “Arah kesah si badia, tuhu kap si kataken Nabi Jesaya man nini bulang kena, nina, ‘To dahi bangsa e, bagenda ningen, “Begi kena pagi tapi sitik pe la angka kena, nen kena pagi tapi sitik pe la idah kena. Sebap pusuh bangsa e lanai erpenggejapen.”’” (Perb. 28:25b-27) Bas bahasa aslina, kata si iterjemahken jadi “lanai erpenggejapen” ncidahken maka pusuh kalak e “erlemak” ntah pe enggo “mekapal.” Emaka, berita si meriah lanai banci masuk. (Perb. 28:27) Mekuah kel ate!

¹⁷ Bagenda kata-kata pendungi Paulus man kalak Jahudi si la nggit megiken beritana, ‘Bangsa-bangsa si deban pasti nggit megiken.’ (Perb. 28:28; Ms. 67:2; Jes. 11:10) Tek kel Paulus maka tuhu kai si katakenna e, sebap enggo idahna enterem kalak si labo Jahudi nggit megiken berita Kerajan!​—Perb. 13:48; 14:27.

¹⁸ Bali bagi Paulus, ula min kitik ukurta sanga lit kalak si la nggit megiken beritata. Enggo siteh maka sitik ngenca kalak si nggit erdalan bas dalan si nuju ku kegeluhen. (Mat. 7:13, 14) Adi lit kalak si nggit ngaloken kebenaren janah dungna ngelayani Jahwe, meriah kel ukurta janah sialo-alolah kalak e bas runggun.​—Luk. 15:7.

19. Kai si lakoken Paulus sanga ia jadi tahanen rumah?

¹⁹ Kata-kata pendungi Lukas bas buku Perbahanen Rasul-Rasul tuhu-tuhu mpegegehi. Nina, “Dua tahun dekahna, tetap [Paulus] tading bas  rumah si sewana e. Alo-alona kerina kalak si reh ndahi ia. La ia mbiar janah bebas ia erberita kerna Kerajan Dibata man kalak e ras ngajarken kerna Tuan Jesus Kristus.” (Perb. 28:30, 31) Paulus eme usihen si mejile man banta. Siusihlah kinitekenna, semangatna, ras sipatna si nggit ngalo-ngalo tamu!

20, 21. Ise saja si ndatken manpaat arah pelayanen Paulus i Roma?

²⁰ Salah sada kalak si ialo-alo Paulus eme Onesimus. Ia sekalak budak si kiam arah Kolose nari. Sampati Paulus Onesimus jadi kalak Kristen. Dungna Onesimus jadi ‘senina si setia si ikelengi’ Paulus. Keleng kel ate Paulus man Onesimus. Ikataken Paulus maka Onesimus e ‘anakna, perban Paulus enggo bagi bapakna.’ (Kol. 4:9; Plm. 10-12) Pasti terpegegehi kel Paulus ngidah Onesimus! a

²¹ Lit ka kalak Kristen si ndatken manpaat arah usihen Paulus. Bagenda itulis Paulus man kalak Pilipi, “Kai si terjadi bangku kepeken erban berita si meriah reh belangna. Kerina Pengawal Kerajan ras kerina kalak si deban enggo tehna maka aku ipenjaraken perban Kristus. Perban aku ipenjaraken, teremen turang senina si ngelayani Tuan jadi terpegegehi janah reh pangna mpeseh kata Dibata alu la mbiar.”​—Pil. 1:12-14.

22. Kai si lakoken Paulus sanga ia jadi tahanen rumah i Roma?

²² Amin pe Paulus sangana jadi tahanen rumah i Roma, gunakenna waktuna nulis piga-piga surat si penting si gundari jadi bagin Kitap-Kitap Junani Kristen. b Surat-surat e erguna man kalak Kristen abad pertama. Suratna e pe erguna denga man banta, sebap pedah si itulisna mehuli denga hasilna adi sidalanken gundari.​—2 Tim. 3:16, 17.

23, 24. Bagi Paulus, ceritakenlah uga Saksi-Saksi Jahwe bas jaman si gundari tetap ermeriah ukur amin pe ipenjaraken.

²³ Amin pe la lit ituriken bas buku Perbahanen Rasul-Rasul, empat tahun kenca Paulus itahan, ibebasken me ia. Dua tahun ia ipenjaraken i Kesarea janah dua tahun ia jadi tahanen rumah i Roma. c (Perb. 23:35; 24:27) Tapi, tetap meriah ukur Paulus janah tetap usahakenna asa bancina bas ngelayani Jahwe. Gundari pe, enterem umat Jahwe si ipenjaraken perban kinitekenna. Tapi, tetap kalak e ermeriah ukur janah tetap erberita. Contohna eme Adolfo, si ipenjaraken i Spanyol perban la ia nggit ikut wajip militer. Nina sekalak petugas man bana, “Luar biasa kel akap kami kam, enggo pe  ban kami mesera geluhndu bas penjara enda, tetap kam cirem janah tetap kam mekacar.”

²⁴ Dungna, tek penjaga penjara man Adolfo seh ngasa la kunci kalak e pintu selna. Mon-mon, reh ka penjaga penjara guna nungkun kerna Pustaka. Lit sekalak penjaga si masuk ku sel Adolfo guna mbaca Pustaka. Adolfo me si erjaga guna mastiken la lit kalak si ngidah kai si lakoken penjaga penjara e. Emaka, enggo terbalik situasina, dungna tahanen si “njaga” penjaga. Mbera-mbera usihen Saksi Jahwe si setia e ngiahken kita gelah “reh pangna mpeseh kata Dibata alu la mbiar,” amin pe lit tentangen.

25, 26. Nubuat Jesus si apai nge si idah Paulus terjadi la seh 30 tahun kenca nubuat e ibelasken, janah uga nubuat e terjadi bas jamanta gundari?

²⁵ Bas buku Perbahanen Rasul-Rasul ituriken kerna kalak Kristen si erusaha kel mberitaken berita si meriah. Bas bagin pendungi buku e iceritaken kerna usihen Paulus si mberitaken Kerajan Dibata man kerina kalak si reh ndahi ia sanga ia jadi tahanen rumah. Bas pasal pertama buku e lit itulis kerna tugas si ibereken Jesus man pengikutna. Nina, “Aloken kena pagi kuasa sanga nusur kesah si badia ku kena, janah kena pagi jadi saksiku i Jerusalem, i belang-belang Judea ras Samaria, seh ku ujung doni.” (Perb. 1:8) La seh 30 tahun kenca si e, berita si meriah “enggo iberitaken ku kerina ciptan si lit i teruh langit.” d (Kol. 1:23) Enda mbuktiken maka luar biasa kel pengaruh kesah si badia!​—Sak. 4:6.

²⁶ Gundari pe, kesah si badia mereken pengaruh si luar biasa man kalak si ipilih guna nggeluh i surga bage pe man ‘biri-biri si deban.’ Kesah si badia e nampati kalak e gelah terus ‘njelasken kerna Kerajan Dibata’ bas 240 negri! (Joh. 10:16; Perb. 28:23) Lakokenndu nge tugas e asa ngasupndu?