1, 2. Perdalanen si uga nge si nandangi ilakoken Paulus, janah kai saja si ikuatirkenna?

 NINA Pestus man Paulus, “Laweslah kam ngadap Kaisar.” Kenca begi Paulus kata-kata e, pasti iukurina kai nge kari si terjadi man bana. Enggo dua tahun Paulus ipenjaraken, emaka perdalanenna ku Roma e silang-langna mereken suasana si mbaru man bana. (Perb. 25:12) Tapi pasti iteh Paulus maka perdalanen arah laut labo lalap menukah. Kuatir Paulus kerna perdalanenna ras kai nge kari si terjadi sanga jumpa ia ras kaisar.

² Rusur adapi Paulus ‘bahaya i laut.’ Pernah telu kali karam kapal si inangkihina, janah bombang-bombang ia sedekah sada wari sada berngi i laut. (2 Kor. 11:25, 26) Selain si e, perdalanenna enda beda kel ras perdalanen utusen injilna, gundari ia sekalak tahanen. Arus ia naik kapal lebih 3.000 kilometer dauhna arah Kesarea nari ku Roma. Banci nge kari selamat ia bas perdalanen? Amin pe selamat, ihukum mate nge kari ia kenca seh i Roma? Perlu siinget maka si ngadili Paulus eme penguasa doni paksa si e.

3. Kai tekad Paulus, janah kai kari sibahas bas pasal enda?

³ Enggo melala keterangen si ibacandu kerna Paulus. Emaka menurutndu, putus asa nge Paulus sanga ukurina kai kari si terjadi man bana? Pasti lang! Iteh Paulus maka melala kari kesusahen si adapina, tapi la tehna kesusahen kai saja e. Emaka, labo lit gunana akap Paulus kuatir kerna kai si lenga tentu terjadi, perban e banci erban lanai meriah ukurna sanga erberita. (Mat. 6:27, 34) Angkai Paulus maka ate Jahwe igunakenna tiap kesempaten guna erberita, termasuk man penguasa doni. (Perb. 9:15) Ertekad Paulus guna ndalanken tugasna e la soal kai pe si terjadi. Pasti bage ka tekadta. Emaka mari sibahas perdalanen Paulus ku Roma, janah siperdiateken kai saja si banci siusih arah Paulus.

4. Naik kapal kai nge Paulus lawes arah Kesarea nari, janah ise si nemani ia?

⁴ Paulus ras piga-piga tahanen si debanna ijaga perwira Roma si  gelarna Julius. Kalak e naik kapal barang si reh ku Kesarea. Kapal e rehna arah Adramiti nari. Adramiti eme pelabuhen si lit i pantai barat Asia Kecil. Pelabuhen e lit i sebrang kota Mitilena si lit bas pulau si gelarna Lesbos. Kapal e erlayar ku utara, kenca si e ku barat, janah singgah bas piga-piga pelabuhen guna mbongkar ras muat barang. Kapal barang labo irancang guna maba penumpang. Emaka labo nyaman akap penumpang naik kapal e, apai ka adi penumpang e tahanen. (Nen kotak “ Perdalanen arah Laut.”) Untungna labo Paulus ngenca kalak Kristen si lit i tengah-tengah tahanen e. Silang-langna lit dua turang senina si nemani ia, eme Aristarkus ras Lukas. Emaka, pasti Lukas si ncatat kerna perdalanen enda. Banci saja Aristarkus ras Lukas arus nggalari biaya perdalanen e alu senna sendiri. Tapi banci saja la kalak e perlu nggalar perban kalak e pelayan Paulus.​—Perb. 27:1, 2.

5. Ras ise nge Paulus jumpa i Sidon, janah kai pelajarenna man banta?

⁵ Kenca erlayar sedekah sada wari kira-kira 110 kilometer ku arah utara, ngadi me kapal e i Sidon, i pinggir pantai Siria. Kepeken perbahanen Julius man Paulus la seri ras perbahanenna man tahanen si biasa. Si e banci jadi perban Paulus e warga negara Roma si lenga terbukti lit salahna. (Perb. 22:27, 28; 26:31, 32) Ibereken Julius me Paulus nusur arah kapal e guna jumpa ras turang seninana. Meriah kel ukur turang senina banci nampati Rasul Paulus si enggo ndekah ipenjaraken. Banci nge ukurindu cara-cara ncidahken kekelengenndu man turang senina? Adi nggit kam ngelakokenca, pasti kam pe terpegegehi.​—Perb. 27:3.

6-8. Uga perdalanen Paulus Sidon nari ku Kenidos, janah kesempaten kai si imanpaatken Paulus guna erberita?

⁶ Berkat me kapal e arah Sidon nari ku arah utara, ngelewati Kiliki si lit i deher Tarsus, eme kuta Paulus. La lit ituriken Lukas maka kapal e ngadi bas ingan si deban. Si iturikenna eme ‘erlawanen angin ras kapal kalak e.’ (Perb. 27:4, 5) Amin pe cuaca la mehuli, banci sibayangken maka imanpaatken Paulus tiap kesempaten  guna erberita. Pasti erberita ia man tahanen si deban, man kalak si lit bas kapal, man pegawai-pegawai kapal, ras man prajurit. Sanga ngadi kapal e bas pelabuhen, pasti erberita ka Paulus man kalak si lit i je. Bali bagi Paulus, simanpaatkenlah tiap kesempaten guna erberita.

⁷ Seh me kapal e bas Mira, eme pelabuhen si lit bas pantai selatan Asia Kecil. I je, Paulus ras penumpang si debanna arus pindah ku kapal si deban si banci mabai kalak e seh ku Roma. (Perb. 27:6) Paksa si e, gandum si lit i Roma, buen rehna arah Mesir nari. Selain si e, kapal-kapal si maba biji-bijin arah Mesir nari singgah i Mira. Isuruh Julius me prajurit bage pe tahanen-tahanen si debanna guna nangkih ku kapal si bage. Kapal si inangkihi kalak e pasti dauh galangen asangken kapal si pertama, perban bas kapal e banci siat gandum bage pe 276 penumpang, eme pegawai-pegawai kapal, prajurit, tahanen, ras kalak si deban si atena lawes ku Roma. Emaka, banci Paulus erberita man terbuen jelma.

⁸ Kenca si e, ngadi me kapal e bas Kenidos, si lit i bagin selatan Asia Kecil. Biasana adi mejile cuaca, sada wari saja pe kapal e erlayar arah Mira nari banci seh ku Kenidos. Tapi ilaporken Lukas maka ‘piga-piga wari erlayar kalak e alu manjar-anjar. Mesera kel akap kalak e, tapi dungna seh kalak e i Kenidos.’ (Perb 27:7a) Pasti mesera kel akap kalak e erlayar perban la mejile cuacana. (Nen kotak “ Angin si Erlawanen i Laut Tengah,” bas halamen 208.) Bayangkenlah, pasti mbiar kel kalak e sanga kapal si inangkihina ngelawan angin i tengah-tengah laut si ergelombang.

9, 10. Masalah kai si iadapi kalak e i deher Pulau Kreta?

⁹ Ate kapten kapal iterusken kalak e perdalanenna Kenidos nari ku arah barat. Tapi, Lukas si langsung ngidah kejadin e ngataken maka “erlawanen angin ras kapal kami.” (Perb. 27:7b) Sanga kapal e enggo reh dauhna arah daraten nari, angin si meter arah barat laut mabai kapal e ku arah selatan, banci jadi alu kecepaten tinggi. Sebelumna, Pulau Kiprus enggo ngelindungi kapal e arah angin si erlawanen. Tapi sekalenda, Pulau Kreta me si ngelindungi kapal kalak e. Kenca ilewati kapal e Tanjung Salmone i ujung timur Pulau Kreta, agak tenang me kalak e. Engkai? Perban masuk kapal kalak e ku bagin selatan pulau e, janah i je la meter kel angin. Pasti tenang kel kerina penumpang bas kapal e. Tapi iteh pegawai kapal maka ntisik nari reh me musim mbergeh. Biasana bahaya kel erlayar bas musim mbergeh, emaka kuatir kalak e.

¹⁰ Lengkap iceritaken Lukas kejadinna, nina, “Kenca pala-palai kami erlayar i tepi pulau [Pulau Kreta], seh kami bas sada ingan si igelari Pelabuhen si Mejile.” Amin pe kalak e enggo ndeher ku pulau e, kapalna mesera denga ikendaliken. Tapi dungna banci dabuhken kalak e jangkar bas Pelabuhen si Mejile. Pelabuhen e eme teluk si kitik si lokasina banci saja pas kel sope garis pantai belok ku utara. Asa kai dekahna kalak e i je? Nina Lukas, “enggo melala keri waktu kami.” Emaka, kalak e la banci terdekahen i je. Bas bulan September ntah pe Oktober, bahaya kel adi erlayar.​—Perb. 27:8, 9.

11. Saran kai si ibereken Paulus man kalak si lit bas kapal, tapi kai keputusen kalak e?

 ¹¹ Banci jadi, lit piga-piga penumpang si mindo pendapat Paulus perban rusur Paulus erlayar bas Laut Tengah. Isaranken Paulus gelah la iterusken kalak e perdalanenna, sebap “bahaya” adi iterusken. Ikataken Paulus maka labo kapal ras isina ngenca kari si bene, penumpang bas kapal e pe banci mate. Tapi, kapten kapal ras si mpuna kapal e, iteruskenna tena perdalanen. Si e banci saja perban darami kalak e atena ingan si lebih aman. Ipetetap kalak e ukur Julius, janah teremen kalak bas kapal e pe erpengakap maka banci nge usahaken kalak e erlayar ku Peniks, eme pelabuhen bas sebelah barat. Banci jadi pelabuhen e lebih galang, alu bage lebih aman adi kapal e ngadi i je sanga musim mbergeh. Emaka, sanga rembus angin selatan alu manjar-anjar, berkat me kapal e.​—Perb. 27:10-13.

12. Bahaya kai si iadapi kalak e kenca berkat kalak e nadingken Pulau Kreta, janah kai si ilakoken pegawai kapal gelah banci kalak e selamat?

¹² Kenca si e, rembus “angin badai” ngentam kapal e arah timur laut nari. Tapi gelah terlindung, erlayar kalak e i deher pulau si kitik si igelari Kauda. Pulau e kira-kira 65 kilometer dauhna arah Pelabuhen si Mejile. Tapi lit denga bahaya si banci terjadi. Kapal e banci terbaba angin ku arah selatan janah tabrakna gunduken pasir i pantai Afrika. Gelah e la terjadi, mis usahaken pegawai kapal penangkih sekoci si lit ipudi kapal. Labo menukah penangkihsa, perban mbelin kemungkinenna dem lau bas sekoci e. Kenca si e, iket kalak e bagin kapal si arah teruh alu rante ras nali gelah papan-papanna tetap rapat. Dung e longgarken kalak e nali layar kapal, janah usahaken kalak e gelah kapal e ngikutken angin. Bayangkenlah uga biarna kap kalak e paksa si e. Tapi, enggo pe lakoken kalak e kerina e, kapal e tetap denga “entamken angin badai.” Bas wari si peteluken, ambekken kalak e piga-piga alat kapal gelah ula kapal e tenggelam.​—Perb. 27:14-19.

13. Uga nge situasi bas kapal e sanga badai?

¹³ Mbiar kalak e kerina. Tapi, Paulus ras teman-temanna tek maka kalak e pasti selamat. Pernah ikataken Jesus man Paulus maka pasti pagi Paulus ersaksi i Roma. Bas pudi wari lit ka malekat si ngulihi janji e. (Perb. 19:21; 23:11) Amin gia bage, arus kalak e erjuang ngadapi badai suari ras berngi sedekah dua minggu. Perban lalap udan janah mekapal kel awan, matawari ras bintang la teridah. Emaka la teh si maba kapal e enggo i ja kalak e janah ku ja kapal e man baban. Perban mbergeh kel, udan ka, lit si mbiar, lit ka si mutah tena perban bombang-bombang kapal e, emaka lanai inget kalak e man.

14, 15. (a) Engkai maka ikataken Paulus persinget si enggo iturikenna sebelumna? (b) Pelajaren kai si banci sidat arah arapen si ipeseh Paulus?

¹⁴ Cinder me Paulus, turikenna persinget si enggo pesehna sebelumna, tapi labo salahkenna kalak e. Amin gia bage, kai si terjadi e mbuktiken maka kata-kata Paulus perlu ibegiken ras idalanken. Kenca si e ikatakenna, “Kupindoken man kena, ula kena mbiar, sebap labo kari sekalak pe arah kena si mate. Kapal enda ngenca kari si hancur.” (Perb. 27:21, 22) Pasti tenang kel kalak e megi kata-kata e. Paulus pe meriah ukurna perban bere Jahwe man bana kesempaten  guna mpeseh berita si mere arapen man kalak si deban. Perlu siinget maka meherga kel akap Jahwe kegeluhen tiap kalak. Itulis Petrus, ‘Labo ate Jahwe sekalak pe ikernepken tapi gelah kerina min ertobat.’ (2 Pet. 3:9) Emaka ula kita tertaren-taren mpeseh arapen arah Jahwe man enterem kalak. Kegeluhen tiap jelma si meherga iakap Jahwe sangana lit bas bahaya.

¹⁵ Mbelin kemungkinenna, enggo peseh Paulus ‘arapen kerna janji Dibata’ man enterem kalak bas kapal e. (Perb. 26:6; Kol. 1:5) Tapi sanga akap kalak e nandangi karam kapal e, ikataken Paulus alasen si banci erban kalak e tek man arapen si ipesehna, nina, “Berngi ndai, reh malekat ndahi aku janah tedis ia i deherku. . . . Nina malekat e, ‘Ula kam mbiar, Paulus! Kam arus ngadap man Kaisar, kerina kalak si erlayar ras kam pasti selamatken Dibata perban perkuah ateNa.’” Nina Paulus ka man kalak e, “Emaka ula kena mbiar, sebap tek aku pasti lakoken Dibata bagi si kataken malekat e man bangku. Tapi, pasti babaken angin kapal enda ku sada pulau.”​—Perb. 27:23-26.

16, 17. (a) Bas keadan uga nge Paulus ertoto, janah uga nge hasilna? (b) Uga persinget Paulus dungna terjadi?

¹⁶ Lit dua minggu dekahna kalak e ngadapi badai, janah ibaba angin me kapal e kira-kira 870 kilometer dauhna. Kenca si e, begi pegawai kapal lit sora ombak.  Emaka teh kalak e maka enggo ndeher kalak e ku pantai. Kenca si e, dabuhken kalak e piga-piga jangkar gelah kapal e la mombak, janah banna ka pengala kapal e ku daraten. Lawes ate pegawai kapal arah kapal e, tapi iambati prajurit-prajurit. Ipebetehken Paulus man perwira ras prajurit-prajurit, “Adi tadingken kalak e kin kapal enda, labo kena banci selamat.” Kenca kapal e reh tenangna, iahken Paulus kerina kalak gelah man. Ipetetap Paulus ka ukur kalak e maka pasti kalak e selamat. Kenca si e, Paulus “ngata bujur man Dibata i lebe-lebe kalak e kerina.” (Perb. 27:31, 35) Toto Paulus e jadi usihen man Lukas, Aristarkus, bage pe man banta gundari. Sanga ertoto kam i lebe-lebe jelma si enterem, terpegegehi nge kalak megi totondu?

¹⁷ Kenca ertoto Paulus, “semangat kalak e janah man ia kerina.” (Perb. 27:36) Ambekken kalak e gandum ku laut emaka reh nahangna kapal e, janah reh nukahna me maba kapal e ku tepi pantai. Sanga ciger wari, ipotong pegawai kapal me nali-nali jangkar, longgarkenna nali si ngiket kemudi kapal, jenari penangkihna layar si arah lebe kapal gelah baba angin kapal e ku pantai. Kenca si e, sangkut me bagin kapal si arah lebe bas pasir si ergun-gun ntah pe lumpur. Bagin arah pudi kapal e enggo hancur ientam ombak. Ibunuh piga-piga prajurit atena tahanen si lit bas kapal e gelah la kalak e kiam, tapi ilarang Julius. Isuruhna kerina kalak erlangi ntah pe nagangi pecahen kapal gelah banci kalak e seh ku pantai. Kai si ikataken Paulus tuhu-tuhu terjadi. “Selamat kerina kalak e ku daraten.” Kalak e kerina lit 276 kalak. Tapi kai gelar daraten e?​—Perb. 27:44.

18-20. Kai buktina maka “mehuli kel” kalak si tading bas Pulau Malta, janah mukjizat kai si ilakoken Dibata arah Paulus?

¹⁸ Kepeken, daraten ingan kalak e selamat gelarna Pulau Malta, si lit i sebelah selatan Sisilia. (Nen kotak “ I Ja nge Malta e?”) “Mehuli kel kerina perbahanen  kalak si tading” bas pulau e. (Perb. 28:2) Idah kalak e kalak si selamat arah kapal ndai enggo bencah bajuna janah bergehen. Emaka ipegara kalak e api gelah ula nai kalak e bergehen padahal situhuna labo kalak e sitandan. Kenca si e, terjadi me sada mukjizat.

¹⁹ Isampati Paulus kalak e alu mpepulung ranting kayu janah tamana ranting e ku datas api. Rempet ndarat sada nipe si erbisa janah tagutna tan Paulus. Nipe e molah-olah bas tan Paulus. Akap kalak Malta si e hukumen arah dewa-dewa nari. a

²⁰ Akap kalak Malta “bengkak me kari tan Paulus” perban itagut nipe. Menurut sada karya referensi, bas bahasa aslina, istilah si ipake bas ayat e eme “istilah medis.” Enda cocok, perban si nulissa eme ‘Lukas, dokter si ikelengi.’ (Perb. 28:6; Kol. 4:14) Tapi si pasti, ikupisken Paulus nipe e janah la ia kaden pe.

21. (a) Turikenlah piga-piga contoh si mbuktiken maka kai si itulis Lukas terteki. (b) Mukjizat kai si ilakoken Paulus, janah kai pengaruhna man penduduk Malta?

²¹ Lit sada kalak bayak si tading bas pulau e, gelarna Publius. Mbelin kemungkinenna ia pejabat Roma si meganjangna i Malta. Ikataken Lukas ia “peminpin pulau e.” Penggelarenna e lit ka bas dua tulisen kuno si bas pudi wari idat i Malta. Alo-alo Publius me Paulus ras teman-temanna sedekah telu wari i rumahna. Tapi bapak Publius sangana sakit, ituriken Lukas pinakitna alu jelas. Nina Lukas, bapak Publius “ampar bas ingan medem, ia sangana demam janah mesui kel beltekna.” Ertoto Paulus janah tamakenna tanna ku bapak Publius, jenari malem me ia. Luar biasa kel mukjizat e akap kalak si tading bas Malta. Emaka, baba kalak e kerina kalak si sakit gelah ipepalem. Bereken kalak e melala hadiah janah cukupi kalak e kerina keperlun Paulus ras teman-temanna.​—Perb. 28:7-10.

22. (a) Uga sekalak profesor muji cataten Lukas kerna pelayaren ku Roma? (b) Kai si nandangi sibahas bas pasal berikutna?

²² Cataten Lukas kerna perdalanen Paulus si enggo sibahas seh ngayak gundari itulisna alu tepat janah terteki. Sekalak profesor ngataken, “Arah kerina isi Pustaka . . . cataten Lukas me salah sada cataten si hidup kel gaya penulisenna. Kai si itulisna kerna pelayaren bas abad pertama terperinci janah terteki. Si iturikenna kerna keadan bas daerah timur Laut Tengah pe tepat.” Si e banci ilakokenna pasti perban lit catatenna. Banci jadi, tiap wari iban Lukas cataten kerna kai si terjadi sanga radu ia ras Paulus. Adi memang kin bage, pasti melala denga si banci itulisna bas perdalanen kalak e berikutna. Kai nge si terjadi man Paulus kenca seh kalak e i Roma? Mari sibahas.