1. Kai saja persaman kalak Kristen abad pertama ras Saksi-Saksi Jahwe si gundari?

 KALAK Kristen bas abad pertama bage pe Saksi-Saksi Jahwe si gundari semangat erberita. Alu meteruk ukur nggit kalak e ngaloken penampat ras petunjuk kesah si badia. Amin pe itindas tetap kalak e erberita, janah melala pasu-pasu si ibereken Jahwe man kalak e.

2, 3. Engkai maka buku Perbahanen Rasul-Rasul e unik?

² Pasti terpegegehi kel kita adi sibaca buku Perbahanen Rasul-Rasul. Bas buku e melala kejadin si luar biasa. Buku enda unik perban arah kerina buku si lit bas Pustaka, bas buku enda ngenca lit icatat kerna kegiaten kalak Kristen bas abad pertama kenca Jesus lawes ku surga.

³ Bas buku Perbahanen Rasul-Rasul lit icatat gelar 95 kalak si reh arah 32 negri, 54 kota, ras 9 pulau. Bas buku e pe lit ka ituriken kerna rakyat biasa, kalak si meganjang rukur si lit bas agama palsu, penguasa si sombong, bage pe kalak si nindas alu kejam. Tapi si pentingna, bas buku e lit ituriken kerna turang seninata bas abad pertama. Amin pe iadapi kalak e erbage-bage tentangen, tetap kalak e semangat erberita.

4. Engkai maka ndeher siakap kita ras Paulus, Tabita, bage pe saksi si setia si debanna bas jaman si mbarenda?

⁴ Turang seninata si semangat e eme Rasul Paulus ras Rasul Petrus. Selain si e, lit ka dokter si ikelengi eme Lukas, Barnabas si meriah kapna nampati, Stepanus si perpang, Tabita si mehuli, Lidia si nggit ngalo-ngalo tamu, janah melala denga saksi si debanna. Memang kalak e nggeluh i doni enggo hampir 2.000 tahun si lewat, tapi ndeher siakap kita ras kalak e. Engkai? Perban seri tugasta eme erban murid. (Mat. 28:19, 20) Luar biasa kel siakap banci ngelakoken pendahin e!

5. I ja saja nge murid-murid Jesus bas abad pertama mulai erberita?

⁵ Cuba siukuri tugas si bereken Jesus man pengikutna. Nina, “Aloken kena pagi kuasa sanga nusur kesah si badia ku kena, janah kena pagi jadi saksiku i Jerusalem, i belang-belang Judea ras Samaria, seh ku ujung doni.” (Perb. 1:8) Tangtangna, ibereken kesah si badia kuasa man murid-murid gelah jadi saksi Jesus “i Jerusalem.” (Perb. 1:1–8:3) Kenca si e, ibereken kesah si badia petunjuk man kalak e gelah erberita  “i belang-belang Judea ras Samaria.” (Perb. 8:4–13:3) Dungna, mulai me ipeseh kalak e berita si meriah “seh ku ujung doni.”​—Perb. 13:4–28:31.

6, 7. I bas erberita, kai nge kelebihenta adi ibandingken ras turang seninata bas abad pertama?

⁶ Turang seninata bas abad pertama lenga lit Pustakana si lengkap si banci igunakenna sanga erberita. Buku injil Matius pe tahun 41 M maka lit. Piga-piga surat Paulus pe itulisna sope buku Perbahanen Rasul-Rasul dung itulis, eme kira-kira tahun 61 M. Emaka labo lit salinen Kitap-Kitap si Badia si lengkap ntah pe publikasi si banci ibereken turang seninata e man kalak si tertarik nandangi berita si meriah. Sope jadi murid Jesus, enggom pernah ibegi kalak Kristen Jahudi Kitap-Kitap Heber ibacaken bas ingan pulung kalak Jahudi. (2 Kor. 3:14-16) Tapi arus kalak e rajin erlajar, sebap ayat-ayat si atena turikenna sanga erberita arus ihapalna.

⁷ Gundari kerina kita enggo lit Pustaka si Badiata, janah melala ka publikasita. Emaka banci kita erban murid alu erberita ku lebih 240 negri janah bas melala bahasa.

8, 9. (a) Kai si banci ilakoken murid-murid Jesus alu penampat kesah si badia? (b) Kai si ihasilken budak si setia alu penampat kesah si badia?

⁸ Sanga ibereken Jesus tugas man murid-muridna gelah jadi saksina, nina man kalak e, “Aloken kena pagi kuasa sanga nusur kesah si badia ku kena.” Alu penampat kesah si badia, pengikut Jesus dungna banci jadi saksi i sebelang doni. Kesah si badia pe nampati Petrus ras Paulus guna mpepalem kalak, mpelawes malekat-malekat jahat, janah mpekeke kalak mate. Tapi, kesah si badia mereken kuasa man kalak Kristen bas abad si pertama guna ngelakoken pendahin si lebih penting. Kesah si badia erban rasul-rasul ras murid-murid si debanna banci mpeseh kebenaren si mereken kegeluhen si rasa lalap man kalak si deban.​—Joh. 17:3.

⁹ Bas wari Pentakosta 33 M, murid-murid Jesus ngerana “alu erbage-bage bahasa menurut kai si bereken kesah e.” Alu bage banci ceritaken kalak e “perbahanen Dibata si luar biasa” bas melala bahasa. (Perb. 2:1-4, 11) Memang gundari lanai ban Dibata mukjizat gelah banci kita ngerana bas erbage-bage bahasa. Tapi alu penampat kesah si badia, banci ihasilken budak si setia publikasita bas melala bahasa. Misalna, jutan majalah Sora Ermomo ras Perdiatekenlah! icetak tiap bulan. Selain si e bas situs webta eme jw.org, lit publikasi ras video bas lebih 1.000 bahasa. Si e kerina erban banci siceritaken “perbahanen Dibata si luar biasa” man kalak arah kerina bangsa, suku, umat, ras bahasa.​—Ket. 7:9.

10. Mulai tahun 1989, uga nge perkembangen penerjemahen Pustaka?

¹⁰ Mulai tahun 1989, iusahaken budak si setia gelah Pustaka si Badia Terjemahen Doni si Mbaru lit bas melala bahasa. Pustaka enda enggo iterjemahken  ku lebih 200 bahasa. Selain si e enggo lit lebih 240 juta Pustaka si icetak, janah melala denga si nandangi icetak. Dibata ngenca si banci erban pendahin e berhasil alu penampat kesah si badiaNa.

11. Kai si erban publikasita banci iterjemahken?

¹¹ Lit ribun kalak Kristen si ngelakoken pendahin penerjemahen bas lebih 150 negri. Labo ateta mamang kerna si e, perban la lit organisasi si deban bas doni enda si iarak-arak kesah si badia bas ‘njelasken’ kerna Dibata Jahwe, Jesus Kristus, ras Kerajan si enggo merentah i surga!​—Perb. 28:23.

12. Kai si erban Paulus ras kalak Kristen abad pertama banci ngelakoken pendahin erberita?

¹² Sanga Paulus erberita man kalak Jahudi ras kalak si ngikutken agama Jahudi i Antiokia Pisidi, “kalak si pusuh ras perbahanenna ngaloken kebenaren guna kegeluhen si rasa lalap jadi kalak si tek.” (Perb. 13:48) Bas pendungi buku Perbahanen Rasul-Rasul, itulis Lukas maka Paulus ‘la mbiar janah bebas ia erberita kerna Kerajan Dibata.’ (Perb. 28:31) I ja nge Rasul Paulus erberita? I Roma, ibu kota penguasa doni paksa si e! Pengikut Jesus abad pertama erberita alu cara erkhotbah bage pe cara si deban. Si e kerina banci ilakoken kalak e perban penampat ras penegu-negu kesah si badia.

13. Engkai maka perlu kita ertoto sanga itindas?

¹³ Sanga murid-murid Jesus abad pertama itindas, pindo kalak e penampat man Jahwe gelah banci tetap pang. Hasilna, bere Jahwe kesah si badia man kalak e, emaka tetap kalak e pang erberita. (Perb. 4:18-31) Kita pe arus ertoto mindo kepentaren ras gegeh man Jahwe gelah banci terus erberita amin pe itindas. (Jak. 1:2-8) Perban isampati Dibata kita alu kesah si badia, banci kita terus erberita. La lit kai pe si banci ngambati kita erberita, termasuk tentangen ntah pe penindasen. Sanga itindas, arus kita ertoto mindo kesah si badia, kepentaren, ras sipat si perpang gelah banci terus mberitaken berita si meriah.​—Luk. 11:13.

14, 15. (a) Kai nge hasilna sanga murid-murid ngadapi kiniseran kenca Stepanus ibunuh? (b) Bas jamanta gundari, uga nge dalanna maka kalak i Siberia banci nandai kebenaren?

¹⁴ Stepanus tetap pang erberita sope ia ibunuh musuh-musuhna. (Perb. 6:5; 7:54-60) Paksa si e “mekelek kel penindasen.” Emaka, kerina murid selain rasul-rasul merap ku belang-belang Judea ras Samaria. Tapi si e labo mpengadi dahin erberita. Pilipus lawes ku Samaria guna ‘mberitaken kerna Kristus’ janah mehuli kel hasil si idatna. (Perb. 8:1-8, 14, 15, 25) Selain si e, nina Lukas, “Kenca Stepanus ibunuh, murid-murid ngadapi kiniseran si erban kalak e merap seh ku Punike, Kiprus, bage pe Antiokia. Tapi man kalak Jahudi saja ngenca kalak e erberita. Amin pe bage, lit piga-piga murid arah Kiprus ras Kireni reh ku Antiokia janah mulai beritakenna berita si meriah kerna Tuan Jesus man kalak si make bahasa Junani.” (Perb. 11:19, 20) Paksa si e, perban  itindas, pindah me murid-murid ku ingan si deban. E me si erban berita si meriah banci iberitaken bas ingan e.

¹⁵ Si e pe terjadi bas Uni Soviet mbarenda. Khususna bas tahun 1950-en, lit ribun Saksi Jahwe si iasingken ku Siberia. Perban kalak e merap ku erbage ingan, berita si meriah pe banci seh bas ingan si mbelang e. Paksa si e, enterem Saksi Jahwe si labo lit senna guna lawes ku ingan si dauhna kira-kira 10.000 kilometer e guna erberita. Tapi, pemerentah me si ngirim kalak e ku ingan e. Nina sekalak turang senina, “Kepeken pemerentah me si erban ribun kalak si meteruk ukur i Siberia dungna nandai kebenaren.”

16, 17. Kai nge si ituriken bas buku Perbahanen Rasul-Rasul si mbuktiken maka ipasu-pasu Jahwe pendahin erberita?

¹⁶ Tek kita, pasti ipasu-pasu Jahwe kalak Kristen bas abad si pertama. Paulus ras turang senina si debanna si nuansa ras niramsa, “tapi Dibata si erbanca turah.” (1 Kor. 3:5, 6) Laporen bas buku Perbahanen Rasul-Rasul mbuktiken maka dahin erberita banci berhasil perban Jahwe si masu-masu pendahin e. Contohna, “Kata Dibata terus tersebar, janah seh kel buena murid-murid si tambah i Jerusalem.” (Perb. 6:7) Perban kalak Kristen erberita bas ingan-ingan si deban, “runggun si lit i belang-belang Judea, Galilea, ras Samaria ndatken kedamen janah reh paguhna. Jumlah kalak e terus reh teremna perban kalak e mbiar man Jahwe janah ndatken pengapul arah kesah si badia.”​—Perb. 9:31.

¹⁷ I Antiokia Siria, kalak Jahudi bage pe kalak si nggunaken bahasa Junani banci ndatken kebenaren arah kalak Kristen si perpang. Nina buku Perbahanen Rasul-Rasul, “Tan Jahwe nampati kalak e, emaka reh buena kalak si tek man Tuan ras jadi murid-muridna.” (Perb. 11:21) Selain si e, ikataken ka maka “reh teremna kalak si meteh kata Jahwe janah reh teremna ka si jadi murid.” (Perb. 12:24) Janah, perban Paulus ras teman-temanna semangat mberitaken berita si meriah man kalak si labo Jahudi, “kata Jahwe terus terberita alu cara si luar biasa janah erkuasa.”​—Perb. 19:20.

18, 19. (a) Engkai maka kita tek “tan Jahwe” pasti nampati kita? (b) Ceritakenlah pengalamen si lit bas paragrap enda termasuk pengalamen si ingetndu si mbuktiken maka idukung Jahwe umatNa.

¹⁸ Gundari pe “tan Jahwe” pasti ndukung kita. E me sebapna enterem kalak si dungna tek man Jahwe, janah ibaktikenna dirina man Jahwe alu iperidiken. Selain si e, alu penampat Jahwe ngenca maka banci kita tetap paguh amin pe lit tentangen ras penindasen si kejam. Banci ka kita berhasil ngelakoken pelayanenta bali bagi Paulus ras kalak Kristen bas abad pertama si debanna. (Perb. 14:19-21) Jahwe pasti terus nampati kita. “Rasa lalap pagi tanNa” ndukung kita sanga lit masalahta. (Ul. 33:27) Perlu ka terus siinget maka guna kepentingen gelarNa si mbelin labo pernah tadingken Jahwe umatNa.​—1 Sam. 12:22; Ms. 94:14.

 ¹⁹ Contohna eme Turang Senina Harald Abt. Perban terus ia erberita, ikirim Nazi me ia ku kamp konsentrasi Sachsenhausen sedekah Perang Doni II. Bas bulan Mei tahun 1942, reh Gestapo ku rumah ndeharana, Elsa. Ibuat Gestapo bayi kalak e si diberu, janah itangkapna Elsa. Ikirim kalak e Elsa ku erbage-bage kamp konsentrasi. Nina Elsa, “Lit pelajaren si luar biasa si kudat sanga ertahun-tahun aku bas kamp konsentrasi Jerman. Erlajar aku maka kesah si badia Jahwe banci tuhu-tuhu mpegegehi kita sanga arus siadapi penindasen si seh kel beratna. Sope aku itangkap, pernah kubaca surat arah sekalak senina. Ikatakenna maka sanga siadapi penindasen si seh kel beratna, kesah si badia banci erban kita tetap tenang. Tangtangna lebihsa kuakap kai si katakenna e, Tapi, kenca aku sendiri si ngenanamisa, kuteh me maka payo kai si katakenna e. Memang mesera mbayangkenca adi si e lenga pernah terjadi man banta. Tapi, e me si kugejapken.”

20. Kai si ilakoken Paulus sanga ia jadi tahanen rumah, janah engkai maka pengalamenna e banci erban piga-piga turang seninata terapuli?

²⁰ Bas pendungi buku Perbahanen Rasul-Rasul, lit cataten si ngataken maka Paulus semangat kel “erberita kerna Kerajan Dibata.” (Perb. 28:31) Perban Paulus jadi tahanen rumah sanga ia i Roma, la ia banci erberita arah rumah ku rumah. Amin pe bage, terus ia erberita man kerina kalak si reh ndahi ia. Gundari pe, lit piga-piga turang seninata si la banci ndarat arah rumahna nari, si la banci keke arah ingan medemna nari, si tading bas panti jompo perban enggo metua, si sangana sakit, ntah pe si lemah fisikna. Tapi, tetap keleng ate kalak e man Jahwe, janah tetap kalak e semangat erberita. Sipindolah man Jahwe gelah sampatiNa kalak e jumpa ras kalak si nggit erlajar kerna Jahwe bage pe sura-suraNa.

21. Engkai maka ula nai kita tertaren-taren sanga erberita?

²¹ Enterem arah kita si banci ikut erberita arah rumah ku rumah bage pe erberita alu cara si debanna. Emaka, marilah siusahaken asa ngasupta guna ngelakoken pendahinta selaku perberita. Sisampatilah gelah pendahin erberita banci “seh ku ujung doni.” Ula nai kita tertaren-taren ngelakoken pendahin enda sebap “tanda” kerehen Jesus Kristus enggo jelas kel teridah. (Mat. 24:3-14) Ula nai sisia-siaken waktu si lit bas kita. Gundari, arus kita “sibuk bas ndahiken dahin Tuhan.”​—1 Kor. 15:58.

22. Kai si perlu silakoken janahta nimai wari Jahwe?

²² Janahta nimai kerehen “wari Jahwe si mbelin ras luar biasa,” marilah kita ertekad guna mberitaken berita si meriah. (Joel 2:31) Pasti jumpa denga kita ras kalak si bali bagi kalak Berea si ‘ngaloken kata Dibata alu bulat ukur.’ (Perb. 17:10, 11) Emaka, teruslah siberitaken berita si meriah seh ngasa ikataken man banta, “Merandal kel, kam budak si mehuli ras setia!” (Mat. 25:23) Adi tetap kita semangat erberita janah terus kita setia man Jahwe, pasti meriah ukurta seh rasa lalap perban sidat hak istimewa si seh kel belinna eme terus mberitaken Kerajan Dibata!