PASAL 24
“Ula Kam Mbiar!”
Rasul Paulus selamat arah kalak si atena munuh ia janah belana dirina i lebe-lebe Gubernur Pelik
Arah Perbahanen Rasul-Rasul 23:11–24:27
1, 2. Engkai maka Paulus la sengget ngadapi penindasen bas Jerusalem?
KENCA Paulus iselamatken arah gerombolen massa si merawa i Jerusalem, imasukken ka ia ku penjara. Rasul si semangat e labo sengget ngadapi penindasen e. Enggo ikataken man bana maka “penjara ras kiniseran” enggo nimai ia bas kota e. (Perb. 20:22, 23) Memang la iteh Paulus alu jelas kai si nandangi terjadi man bana, tapi itehna maka pasti terus adapina kiniseran perban gelar Jesus.—Perb. 9:16.
2 Nabi-nabi Kristen pe enggo mereken persinget man Paulus. Ikataken kalak e maka iiket kari Paulus janah iserahken “ku tan kalak arah bangsa si deban nari.” (Perb. 21:4, 10, 11) La ndekah sope si e, enterem kalak Jahudi si rusaha munuh Paulus. Janah la ndekah kenca si e, anggota Pengadilen Agama Jahudi pe ‘rusaha munuh’ Paulus. Gundari, Rasul Paulus jadi tahanen prajurit Roma, janah reh buena tuduhen si arus iadapina. (Perb. 21:31; 23:10) Emaka, Paulus tuhu-tuhu merluken penampat ras pergegeh.
3. Ja nari banci sidat penampat ras pergegeh gelah banci kita terus semangat erberita?
3 Bas wari-wari pendungi enda, siteh maka “kerina kalak si atena nggeluh sesuai ras peraten Dibata bas persadan ras Kristus Jesus isiksa ka nge pagi.” (2 Tim. 3:12) Emaka, kita pe merluken penampat ras pergegeh gelah banci terus semangat i bas dahin erberita. Pasti ngata bujur kel kita perban sidat kata pergegeh si tepat waktu arah baca-bacanta bage pe arah perpulungen si enggo iatur “budak si setia ras pentar”! (Mat. 24:45) Enggo erjanji Jahwe man banta maka labo lit musuh si banci berhasil engkernepken umatNa. Labo lit musuh si banci berhasil mpengadi dahin erberita. (Jes. 54:17; Jer. 1:19) Tapi, kai si terjadi man Rasul Paulus? Lit nge alokenna pergegeh bage pe penampat gelah banci terus erberita amin pe itentang? Adi lit, uga carana, janah uga tanggapen Paulus?
Perb. 23:11-34)
Igagalken me Rencana Kalak si “Sada Arihna Erban Sumpah” (4, 5. Penampat kai si dat Paulus janah engkai maka e tepat waktu?
4 Bas berngi kenca Paulus iselamatken arah Pengadilen Agama Jahudi, datna penampat ras pergegeh. Bas Pustaka ikataken, “Tedis Tuan Jesus i deher Paulus, nina, ‘Ula kam mbiar! Kam enggo mereken kesaksin si lengkap kerna aku i Jerusalem, emaka arus ka pagi kam ersaksi i Roma.’” (Perb. 23:11) Kata-kata Jesus e mpegegehi Paulus perban tehna maka pasti nge ia selamat gelah banci lawes ku Roma guna mereken kesaksin kerna Jesus i je.
“Lit lebih 40 kalak si nandangi nyerang ia alu erbuni-buni.”—Perbahanen Rasul-Rasul 23:21
5 Tepat waktu kel penampat ras pergegeh si idat Paulus e. Paginna lit 40 kalak Jahudi si ‘ersada arihna guna ersumpah maka la kalak e nggit man ras minem adi lenga bunuhna Paulus.’ Enda ncidahken maka merhat kel kalak e munuh Paulus. Adi gagal rencana kalak e, tek kalak e terjadi si la mehuli man kalak e. (Perb. 23:12-15) Rencana kalak e eme pindona gelah Paulus ibaba mulihi ku Pengadilen Agama Jahudi guna isungkuni terbagesen. Tempa-tempa ate kalak e mastiken kai situhuna si terjadi. Tapi bas perdalanen, enggo nimai kalak e guna nyerang ras munuh Paulus. Rencana e enggo isetujui imam-imam kepala bage pe peminpin-peminpin.
6. Ja nari teh Paulus maka lit rencana kalak guna munuh ia, janah uga bebere Paulus jadi usihen man anak muda si gundari?
6 Tapi ibegi bebere Paulus rencana e janah laporkenna ku Paulus. Kenca si e, isuruh Paulus gelah beberena e ngelapor ku komandan militer Roma eme Klaudius Lisias. (Perb. 23:16-22) Gundari pe, pasti keleng ate Jahwe man anak muda si bali bagi bebere Paulus e. La siteh ise gelarna, tapi ia perpang. Utamakenna kepentingen umat Jahwe labo kepentingenna, janah lakokenna asa bancina guna ndukung kepentingen Kerajan.
7, 8. Kai si ilakoken Klaudius Lisias gelah Paulus banci tetap aman?
7 Klaudius Lisias eme komandan militer Roma, lit 1.000 prajuritna. Sanga begina rencana pembunuhen Paulus, perentahkenna 470 prajuritna nemani Paulus Jerusalem nari ku Kesarea. Lit perajurit si erdalan, lit si ertombak, janah lit si erkuda. Sanga seh kalak e i Kesarea, serahken kalak e Paulus ku Gubernur Pelik. a Kesarea eme ibu kota pemerentahen Roma i Judea. Memang enterem kalak Jahudi si tading i Kesarea, tapi teremen pendudukna eme kalak si labo Jahudi. Kesarea e kota si aman ras tertip, la bagi Jerusalem si rusur terjadi kerusuhen perban pendudukna mbeda-bedaken kalak. Kesarea pe jadi markas prajurit Roma i Judea.
8 Ikutken Lisias undang-undang Roma. Ikirimna surat man Pelik guna njelasken kasus Paulus. Ituriken Lisias maka kenca tehna Paulus e warga negara Roma, iselamatkenna Paulus si ‘menam ibunuh’ kalak Jahudi. Turiken Lisias ka maka labo lit datna kesalahen Paulus si erban Paulus “patut ibunuh ntah pe ipenjaraken.” Tapi perban lit rencana jahat kalak Jahudi man Paulus, serahkenna Paulus man Gubernur Pelik gelah banci begiken Pelik tuduhen penentang kerna Paulus janah banci banna keputusen.—Perb. 23:25-30.
9. (a) Kai buktina hak Paulus selaku warga negara Roma enggo ilanggar? (b) Engkai maka labo salah adi sigunaken hakta selaku warga arah sada negara?
9 Tuhu nge kerina si itulis Lisias? Lang, la kerinana tuhu. Mbelin kemungkinenna buatna atena ukur Gubernur Pelik. Labo perban Paulus warga negara Roma maka iselamatkenna. Selain si e, la lit ituriken Lisias maka enggo isuruhna gelah Paulus ‘iiket alu dua rante.’ La ka lit iturikenna maka enggo perentahkenna gelah Paulus ‘icambuk ras isungkuni.’ (Perb. 21:30-34; 22:24-29) Emaka, enggom ilanggar Lisias hak Paulus selaku warga negara Roma. Gundari pe igunaken Setan kalak si semangat ndukung agama palsu guna nindas umat Dibata. Usahaken kalak e gelah lanai kita bebas ngelayani Dibata. Tapi bali bagi Paulus, biasana umat Dibata banci gunakenna hakna selaku warga sada negara gelah banci ndatken perlindungen secara hukum.
“Meriah Ukurku Mbela Diriku” (Perb. 23:35–24:21)
10. Tuduhen kai saja si iban penentang man Paulus?
10 “Paulus itahan bas Istana Herodes” i Kesarea janahna nimai kerehen kalak si nuduh ia arah Jerusalem. (Perb. 23:35) Lima wari kenca si e, seh me kalak e. Kalak e eme imam si mbelin si gelarna Ananias, Tertulus selaku pengacara kalak e, ras piga-piga pertua. Tangtangna, ipuji-puji Tertulus me Pelik perban kai si enggo ilakokenna man kalak Jahudi. b Tujunna gelah meriah ukur Pelik. Tapi, ikataken Tertulus maka Paulus e kalak si “lalap erban masalah, pengaruhina kalak Jahudi belang-belang doni, janah ia kap peminpin sekte kalak Nasaret. Cubakenna ka erban rumah pertoton jadi najis, emaka tangkap kami ia.” Kalak Jahudi si deban pe “ikut nuduh Paulus janah kataken kalak e ka maka tuduhen Tertulus e tuhu.” (Perb. 24:5, 6, 9) Emaka, enda me tuduhen si iban man Paulus: ngajuk-ngajuk kalak si deban, nyebarken sekte si berbahaya, ras erban rumah pertoton jadi najis. Kerina tuduhen e banci erban sekalak jelma ihukum mate.
11, 12. Uga cara Paulus mbela dirina?
11 Kenca si e, ibere me kesempaten man Paulus guna ngerana. Nina Paulus, “Meriah ukurku mbela diriku.” Alu jelas ibuktiken Paulus maka kerina tuduhen e salah. Paulus labo pernah erban rumah pertoton jadi najis. Selain si e, labo pernah ajuk-ajukna jelma si enterem. Kataken Paulus maka enggo “ertahun-tahun dekahna” labo ia tading i Jerusalem, janah kerehenna ku Jerusalem eme guna maba “sumbangen” man kalak Kristen si mesera perban kelihen ras penindasen. Ikataken Paulus ka maka sope masuk ia ku rumah pertoton enggo dalankenna “acara pembersihen diri.” Turikenna ka maka lalap ‘usahakenna gelah bersih pusuh peratenna i lebe-lebe Dibata ras manusia.’—Perb. 24:10-13, 16-18.
12 Memang akui Paulus maka ia ngelayani Dibata nini bulangna “menurut Dalan Tuan si kataken kalak e ‘sekte.’” Tapi alu tegas katakenna maka tek ia man “kerina si lit bas Undang-Undang Musa bage pe Ajaren Nabi-Nabi.” Bali bagi kalak si nentang ia, Paulus pe tek maka lit pagi “kekeken arah si mate nari man kalak si benar ras kalak si la benar.” Kenca si e, pindo Paulus kalak si nentang ia mbuktiken tuduhenna. Nina Paulus, “Pediat saja kalak si lit i jenda ngataken kesalahenku, si datna sanga aku ibaba ku Pengadilen Agama Jahudi. Bicara lit pe akapna salahku, sada ngenca sebapna eme sanga kukataken i lebe-lebe kalak e, ‘Gundari aku iadili i lebe-lebe kena kerina perban tek aku maka kalak si mate nggeluh pagi mulihi!’”—Perb. 24:14, 15, 20, 21.
13-15. Engkai maka Paulus jadi usihen man banta sanga kita ngerana bas pengadilen?
13 Adi ibaba kita ku pengadilen perban kinitekenta, perban ituduh kita erban kerusuhen, perban ituduh kita ngelawan pemerentah, ntah pe ikataken kita anggota arah “sekte si berbahaya,” banci siusih Paulus. La iusahaken Paulus muat ukur gubernur alu muji-muji ia bali bagi Tertulus. Paulus tetap tenang janah iergaina kel gubernur. Mehuli kel cara Paulus ngerana, tapi isina tetap jelas ras jujur. Ikataken Paulus maka piga-piga “kalak Jahudi arah Propinsi Asia nari” si nuduh ia erban najis rumah pertoton la reh bas pengadilen. Arusna min banci ndai ibegina tuduhen kalak e janah belana dirina.—Perb. 24:18, 19.
14 Si pentingna, pang Paulus nuriken kinitekenna kerna kekeken amin pe e si erban ia ngadapi melala masalah bas Pengadilen Agama Jahudi. (Perb. 23:6-10) Sanga ibela Paulus dirina, itandaskenna kerna arapen kekeken. Engkai? Perban kalak si nentang Paulus la tek man arapen kekeken. (Perb. 26:6-8, 22, 23) Padahal, Paulus sangana mberitaken kebenaren kerna Jesus ras kekekenna. Jadi, alasen Paulus iadili eme perban kinitekenna kerna kekeken, khususna kekeken Jesus Kristus.
15 Bali bagi Paulus, kita pe banci pang mberitaken kebenaren. Pasti terpegegehi kita meteh kai si ikataken Jesus man murid-muridna. Nina, “Kerina kalak rate segat pagi man kena perban gelarku. Tapi kalak si megenggeng seh ku kedungenna iselamatken pagi.” Perlu nge kita kuatir kerna kai si arus sikataken? Lang, sebap enggo erjanji Jesus man banta, nina, “Sanga baba kalak pagi kena ku pengadilen, ula kena kuatir kerna kai si man katanken kena, tapi katakenlah kai pe si ibereken kesah si badia man kena sanga si e, sebap labo kena si ngerana tapi kesah si badia.”—Mrk. 13:9-13.
“Mbiar Pelik” (Perb. 24:22-27)
16, 17. (a) Kai si ilakoken Pelik sanga ngadili Paulus? (b) Engkai maka mbiar Pelik, tapi engkai maka lalap lebuhna Paulus?
16 Enda labo tangtangna ibegi Gubernur Pelik kerna kiniteken kalak Kristen. Bas Pustaka ikataken, “Enggo melala teh Pelik kerna Dalan Tuan [enda istilah si ipake bas abad pertama guna nggambarken kalak Kristen]. Emaka tundana persidangen e janah nina, ‘Adi enggo seh pagi Komandan Lisias i jenda, emaka kuputusken perkara e.’ Suruhna Paulus tetap itahan perwira. Tapi berena sitik kebebasen gelah teman-teman Paulus banci ndahi ia guna mereken keperlunna.”—Perb. 24:22, 23.
17 Piga-piga wari kenca si e, Pelik, ras ndeharana Drusila, si kalak Jahudi, ngelebuh Paulus janah “begikenna ia ngerana kerna kiniteken man Kristus Jesus.” (Perb. 24:24) Tapi sanga kataken Paulus kerna “lagu langkah si benar, penguasan diri, ras penghakimen si nandangi reh, mbiar Pelik.” Banci jadi terganggu pusuh peratenna megisa perban kerina kejahaten si enggo lakokenna. Emaka isuruhna Paulus lawes, nina, “Gundari lawes kam lebe, adi lit kari kesempatenku kulebuh ka kam mulihi.” Kenca si e memang rusur Pelik ngelebuh Paulus. Ilebuhna Paulus labo perban atena erlajar kebenaren, tapi ngarap ia ibereken Paulus sen man bana.—Perb. 24:25, 26.
18. Engkai maka ikataken Paulus man Pelik ras ndeharana kerna “lagu langkah si benar, penguasan diri, ras penghakimen si nandangi reh”?
18 Engkai maka ikataken Paulus man Pelik ras ndeharana kerna “lagu langkah si benar, penguasan diri, ras penghakimen si nandangi reh”? Perban merhat kalak e meteh kai saja syaratna gelah banci jadi pengikut Kristus. Iteh Paulus maka perbahanen Pelik ras ndeharana e jahat, kejam, ras la adil. Emaka alu terus terang ikatakenna kai saja syaratna gelah banci jadi pengikut Kristus. Arah kata-kata Paulus e teridah maka beda kel kai si ipindoken Dibata ras kai si ilakoken Pelik bage pe ndeharana. Aturna kai si ikataken Paulus e nampati kalak e ngangkai maka kai pe si iukuri, si ikataken, ras si ilakoken kerina manusia arus ipertanggung jawapkenna man Dibata. Arusna iangkai kalak e maka ndauh pentingen penghakimen kalak e i lebe-lebe Dibata, asangken penghakimen si ibereken Pelik man Paulus. Emaka la teta mamang “mbiar” Pelik.
19, 20. (a) Kai nge si perlu silakoken sanga jumpa kita ras kalak si tempa-tempa berminat tapi situhuna la nggit robah? (b) Ja nari siteh maka Pelik labo jadi teman situhu-tuhu man Paulus?
19 Bas pelayanenta banci saja jumpa kita ras kalak si bali bagi Pelik. Tangtangna tempa-tempa nggit kalak e megiken kebenaren, tapi situhuna la kalak e nggit ndalanken peraten Dibata. Memang, perlu kita hati-hati sanga nampati kalak si bage. Tapi bali bagi Paulus, alu bijaksana perlu sipebetehken kai saja si arus ilakoken kalak e guna erban meriah ukur Dibata. Mbera-mbera kebenaren banci kena ku pusuh kalak e. Tapi adi jelas siidah maka kalak e la nggit robah, sidarami sajalah kalak si tutus atena ndarami kebenaren.
20 Dungna tereteh me isi pusuh Pelik arah kata-kata enda: “Dua tahun kenca si e, Gubernur Pelik igantiken Porkius Pestus. Paulus lalap itahan Pelik, gelah ngena ate kalak Jahudi ia.” (Perb. 24:27) Pelik labo jadi teman situhu-tuhu man Paulus. Iteh Pelik maka kalak si ngikutken “Dalan Tuan” e labo ngelawan pemerentah ntah pe ngiahken kalak guna ngelawan pemerentah. (Perb. 19:23) Iteh Pelik ka maka labo lit undang-undang Roma si ilanggar Paulus, tapi ipediat Pelik Rasul Paulus tetap ipenjara gelah “ngena ate kalak Jahudi” ia.
21. Kai si terjadi man Paulus kenca Porkius Pestus jadi gubernur, janah kai si mpegegehi Paulus?
21 Bagi si ikataken bas ayat terakhir Perbahanen Rasul-Rasul pasal 24, Paulus bas penjara denga sanga Porkius Pestus nggantiken Pelik jadi gubernur. Emaka melala pemeriksan pengadilen si arus iikuti Paulus. Iserahken me Paulus arah sada pejabat ku pejabat si debanna. Rasul Paulus si perpang e ‘ibaba ku lebe raja-raja ras gubernur-gubernur.’ (Luk. 21:12) Bagi si nandangi sinen bas pasal berikutna, dungna Paulus mereken kesaksin man kaisar, eme penguasa si meganjangna bas jamanna. Amin pe arus adapina si e kerina, kiniteken Paulus la pernah lemah. Pasti terpegegehi kel ia sanga kataken Jesus man bana, “Ula kam mbiar!”
a Nen kotak “ Pelik—Gubernur Judea.”
b Tertulus ngata bujur man Pelik perban “dame kel” banna bangsa kalak e. Padahal situhuna, reh urakna nge kedamen sanga Pelik jadi gubernur asangken sanga kalak si deban jadi gubernur. Selain si e, labo arah ukur Tertulus nari sanga katakenna “bujur kel” man perubahen si iban Pelik. Situhuna, enterem kalak Jahudi si rate segat man Pelik perban mesui banna geluh kalak e janah kejam perbahanenna sanga pengadina atena pemberontaken kalak e.—Perb. 24:2, 3.