Perberita Kerajan si ikelengi kami,

Bayangkenlah kam salah sada arah rasul Jesus si sangana cinder i Gunung Saitun. Cidahken Jesus bana i lebe-lebendu. Muat ia nangkih ku surga, nina, “Aloken kena pagi kuasa sanga nusur kesah si badia ku kena, janah kena pagi jadi saksiku i Jerusalem, i belang-belang Judea ras Samaria, seh ku ujung doni.” (Perb. 1:8) Uga nge tanggapenndu?

Mungkin mberatsa kapndu tugas e. Mungkin tersungkun-sungkun kam, ‘Uga kami mberitaken Kerajan Dibata “seh ku ujung doni” adi kami pe sitik ngenca?’ Banci saja ingetndu ka persinget si bereken Jesus sope ia mate. Nina, “Sekalak budak labo belinen asangken tuanna. Adi aku pe siksa kalak e, kena pe siksana ka nge. Adi kata-kataku patuhi kalak e, kata-kata kena pe patuhina ka. Kerina si e lakoken kalak e man kena perban gelarku, perban la tandai kalak e Ia si nuruh aku.” (Joh. 15:20, 21) Sanga ukurindu kata-kata e, mungkin tersungkun-sungkun kam, ‘Uga aku banci terus mberitaken Kerajan Dibata sanga lit tentangen ras penindasen?’

Situasita gundari bali bagi kalak Kristen bas abad pertama. Selaku Saksi Jahwe, tugasta pe mberitaken Kerajan Dibata “seh ku ujung doni” man “kalak arah kerina bangsa.” (Mat. 28:19, 20) Uga carana gelah berhasil kita ngelakoken pendahin e, khususna adi lit tentangen?

Arah buku Perbahanen Rasul-Rasul banci siteh cataten si luar biasa kerna uga rasul-rasul ras turang senina bas abad pertama M berhasil ngelakoken tugas kalak e alu penampat Jahwe. Buku enda irancang guna nampati kam mpelajari cataten e, janah banci gejapkenndu tempa-tempa ikut kam bas kejadin si luar biasa si icatat i je. Pasti takjup kari kam meteh uga buena persaman umat Dibata bas abad pertama ras umatNa si gundari. Idahndu ka kari maka labo pendahinta saja si seri, tapi carata iaturken ngelakoken pendahin e pe seri. Adi ukurindu si e, reh tekna kari kam maka bagin organisasi Jahwe si lit i doni lalap iarak-arak Jahwe.

Ngarap kel kami, janah lalap totoken kami gelah sanga pereksandu buku Perbahanen Rasul-Rasul, reh tekna kam maka igunaken Jahwe kesah si badia nampati kam megenggeng. Mbera-mbera teriahken kam guna terus mberitaken kerna Kerajan Dibata ras nampati kalak si deban erdalan bas dalan keselamaten.​—Perb. 28:23; 1 Tim. 4:16.