PASAL 21
“Aku Bersih arah Dareh Kerina Kalak”
Semangat kel Paulus bas pelayanen janah berekenna nasehat-nasehat man pertua-pertua
Arah Perbahanen Rasul-Rasul 20:1-38
1-3. (a) Uga nge ceritana maka Etikus mate? (b) Kai si ilakoken Paulus, janah pelajaren kai si banci sidat kerna Paulus arah kejadin e?
PAKSA si e enggo tengah berngi. Paulus sangana i Troas bas sada ruangen i loteng, janah enterem kel jelma i je. Gedang Paulus ngerana man turang seninana perban paginna berkat atena. Melala kel lampu minak bas ruangen e, emaka melas janah sesak kel ruangen e. Bas jendela kundul me sekalak dilaki si nguda denga si gelarna Etikus. Sanga Paulus ngerana, terpedem ia. Dungna ndabuh ia arah lantai telu nari.
2 Perban Lukas sekalak dokter, banci saja ia me si tangtangna mis kiam ku darat janah pereksana uga keadan Etikus. Lanai lit si banci ilakoken kalak e man Etikus, “sanga iangkat, ia enggo mate.” (Perb. 20:9) Tapi kenca si e, amparken Paulus bana i datas Etikus janah katakenna man jelma si enterem, “Ula nai kena erceda ate, nggeluh nge ia.” Iban Paulus mukjizat, ipekekena Etikus.—Perb. 20:10.
3 Arah kejadin e teridah maka mbelin kel kesah si badia Dibata. Kematen Etikus labo salah Paulus. Tapi la ia nggit kematen Etikus erban turang senina bas acara si penting e sedih ntah pe lanai tek man Jahwe. Kekeken Etikus e erban turang senina terapuli ras terpegegehi. Alu bage banci kalak e terus erberita alu semangat. Jelas me, penting kel akap Paulus kegeluhen kalak si deban. Enda ngingetken kita man kata-kata Paulus si isina: “Aku bersih arah dareh kerina kalak.” (Perb. 20:26) Mari sibahas usihen Paulus gelah kita pe ngergai kegeluhen.
“Berkat Ia ku Makedoni” (Perb. 20:1, 2)
4. Pengalamen si la mehuli kai si mbaru denga idat Paulus?
4 Bagi si enggo sibahas bas pasal sebelumna, mbaru denga Paulus ndatken pengalamen si la mehuli. Pelayanen Paulus i Epesus erban terjadi kerusuhen si mbelin. Tukang-tukang pirak ikut bas kerusuhen e perban mbiar kalak e lanai banci datna sen arah ibadah man Dewi Artemis. Bas Perbahanen Rasul-Rasul 20:1 ikataken, “Kenca lanai guntar, lebuh Paulus murid-murid janah pegegehina. Kenca si e, ngata lawes ia jenari berkat ia ku Makedoni.”
5, 6. (a) Asa kai dekahna Paulus tading i Makedoni, janah kai si lakokenna man turang senina si lit i je? (b) Uga perasan Paulus kerna turang seninana?
5 Bas perdalanen ku Makedoni, singgah Paulus i pelabuhen Troas piga-piga waktu dekahna. I je ngarap kel Paulus banci ia jumpa ras Titus si enggo iutus ku Korinti. (2 Kor. 2:12, 13) Tapi, kenca teh Paulus maka Titus la banci reh, lawes me Paulus ku Makedoni, janah banci saja tading ia i je kira-kira sada tahun dekahna guna ‘mpegegehi murid-murid si lit i je alu rananna.’ a (Perb. 20:2) Dungna, reh me Titus ku Makedoni. Babana berita si meriah kerna tanggapen turang senina i Korinti man surat Paulus si pertama. (2 Kor. 7:5-7) Si e ngiahken Paulus guna mulihi nulis surat man kalak e. Gundari suratna e sitandai 2 Korinti.
6 Menarik kel, ikataken Lukas maka sanga reh Paulus ndahi turang senina i Epesus ras Makedoni, terpegegehi kel kalak e. Enda ncidahken maka keleng kel ate Paulus man turang seninana! Paulus la bagi kalak Parisi si ulin kapna bana asangken kalak si deban. Meriah akap Paulus ngelayani Dibata radu ras turang seninana. (Joh. 7:47-49; 1 Kor. 3:9) La pernah anggap Paulus ulin ia asangken kalak si deban amin pe perlu berekenna nasehat si tegas man kalak e.—2 Kor. 2:4.
7. Uga pengawas-pengawas si gundari ngusih Paulus?
7 Gundari, pertua-pertua bas runggun bage pe pertua keliling rusaha kel ngusih Paulus. Sanga mereken nasehat pe, usahaken kalak e gelah carana mpeseh nasehat e banci erban turang senina terpegegehi. Usahaken kalak e ngangkai perasan turang senina, pangen akap kalak e mpegegehi asangken nalahken turang senina. Bagenda nina sekalak pertua keliling si erpengalamen, “Enterem turang seninata merhat nge ngelakoken kai si benar. Tapi mon-mon, lit situasi si erban kalak e kecewa, mbiar, janah la tehna kai si arus lakokenna.” Pengawas-pengawas banci jadi sumber gegeh man turang senina si bage.—Heb. 12:12, 13.
“Begina Lit Rencana Jahat . . . man Bana” (Perb. 20:3, 4)
8, 9. (a) Engkai maka rencana Paulus guna erlayar ku Siria la surung? (b) Engkai maka segat ate kalak Jahudi man Paulus?
8 Arah Makedoni, lawes Paulus ku Korinti. b Kenca tading ia i je telu bulan dekahna, lit rencanana guna nerusken perdalanenna ku Kenkerea jenari naik kapal ku Siria. Alu bage, Siria nari banci ia lawes ku Jerusalem guna naruhken sumbangen man turang senina si mesera. c (Perb. 24:17; Rom. 15:25, 26) Tapi, rempet lit kejadin si erban berubah rencana Paulus. Bas Perbahanen Rasul-Rasul 20:3 ikataken, “Begina lit rencana jahat kalak Jahudi man bana”!
9 La ateta mamang, segat kel ate kalak Jahudi man Paulus perban anggap kalak e ia murtad. Sope si e, enggo ertobat iban Paulus sekalak kepala ingan pulung kalak Jahudi i Korinti si gelarna Krispus. (Perb. 18:7, 8; 1 Kor. 1:14) Selain si e, kalak Jahudi i Korinti pe pernah erban tuduhen kerna Paulus man Galio, gubernur Akaya. Tapi ianggap Galio tuduhen kalak e la lit dasarna, emaka merawa kel kalak e. (Perb. 18:12-17) Banci saja, akap kalak Jahudi i Korinti mis Paulus ku Kenkerea guna erlayar ingan e nari. Emaka iban kalak e rencana jahat guna nyerang ia i je. Kai si ilakoken Paulus?
10. Jelaskenlah engkai maka Paulus labo perbiar amin pe la ia lawes ku Kenkerea!
10 La Paulus lawes ku Kenkerea, tapi ipilihna mulih arah dalanna ia reh ku ingan e, eme arah Makedoni. Si e ilakokenna guna keselamatenna bage pe guna ngelindungi sen sumbangen si ibabana. Memang, perdalanen arah jalur darat pe bahaya nge. Paksa si e, rusur lit perampok si cebuni segedang dalan. Penginapen pe lenga tentu aman. Tapi, lebih aman akap Paulus ngelewati dalan e asangken lawes ku Kenkerea. Selain si e, Paulus labo sisada. Lit si nemani ia, eme Aristarkus, Gayus, Sekondus, Sopater, Timotius, Tropimus, ras Tikikus.—Perb. 20:3, 4.
11. Kai si lakoken kalak Kristen si gundari guna ngelindungi diri, janah usihen kai si iban Jesus kerna si e?
11 Bali bagi Paulus, kalak Kristen si gundari pe rusaha ngelindungi diri sanga erberita. Bas ingan-ingan tertentu, la kalak e sisada erberita. Erberita kalak e secara kelompok ntah pe silang-langna lit dua kalak. Uga adi kita itindas? Memang, iteh kalak Kristen maka pasti nge adapi kalak e penindasen. (Joh. 15:20; 2 Tim. 3:12) Tapi, labo sengajaken kalak e gelah kena bahaya. Mari siperdiateken contoh Jesus. Sanga ibenteri kalak atena ia alu batu, “cebuni ia, jenari ndarat ia arah rumah pertoton nari.” (Joh. 8:59) Bas pudi wari, sanga iban kalak Jahudi rencana guna munuh ia, “lanai terang-terangen Jesus erdalan i lebe-lebe jelma si enterem i tengah-tengah kalak Jahudi. Tapi, lawes ia ku Eperaim deher taneh mesawang.” (Joh. 11:54) Sanga perlu, lindungi Jesus dirina gelah banci lakokenna sura-sura Dibata. Kalak Kristen si gundari pe bage.—Mat. 10:16.
“Meriah Ukur Kalak e” (Perb. 20:5-12)
12, 13. (a) Uga perasan turang senina sanga Etikus ipekeke? (b) Arapen kai si banci ngapuli kita gundari?
12 Kenca Paulus ras rombongenna ras-ras ngelewati Makedoni, lit kemungkinenna sirang kalak e ntisik. Tapi dungna pulung ka kalak e i Troas. d Bas Pustaka ikataken, “Kenca lima wari, dahi kami kalak e i Troas.” e (Perb. 20:6) I Troas me Etikus ipekeke bagi si enggo sibahas bas awal pasal enda. Bayangkenlah uga perasan turang senina ngidah Etikus ipekeke. Nina Pustaka, “Meriah ukur kalak e.”—Perb. 20:12.
13 Memang gundari labo lit siidah kalak mate si ipekeke mulihi. Tapi, banci ‘meriah ukurta’ perban lit arapen kekeken bas Pustaka. (Joh. 5:28, 29) Memang, perban Etikus la sempurna, dungna mate ka nge ia. (Rom. 6:23) Tapi, kalak si ipekeke bas doni si mbaru lit arapenna nggeluh seh rasa lalap! Selain si e, kalak si ipekeke guna merentah radu ras Jesus i surga, banci datna kegeluhen si la banci mate. (1 Kor. 15:51-53) Emaka, kalak si ipilih guna nggeluh i surga bage pe biri-biri si deban banci ‘ermeriah ukur.’—Joh. 10:16.
“I Lebe-Lebe Jelma si Enterem bage pe arah Rumah ku Rumah” (Perb. 20:13-24)
14. Kai si kataken Paulus man pertua-pertua Epesus sanga jumpa kalak e i Miletus?
14 Paulus ras rombongenna lawes arah Troas nari ku Asos. Kenca si e lawes kalak e ku Mitilena, Kios, Samos, ras Miletus. Ate Paulus seh min ia i Jerusalem bas Perayan Pentakosta. Emaka, inangkihina kapal si la singgah i Epesus. Tapi, perban ngerana ate Paulus man pertua-pertua i Epesus, pindona gelah reh kalak e ndahi ia i Miletus. (Perb. 20:13-17) Kenca seh kalak e, nina Paulus man kalak e, “Enggo teh kena uga kegeluhenku i tengah-tengah kena mulai kin tangtangna aku reh ku Propinsi Asia. Erdahin aku jadi budak man Tuhan alu meteruk ukur. Melala iluhku mambur janah melala kuadapi percuban arah kalak Jahudi si ersura-sura munuh aku. Amin pe bage, la aku mbiar mpeseh kerina si erguna man kena ntah pe ngajar i lebe-lebe jelma si enterem bage pe arah rumah ku rumah. Kujelasken kerina man kalak Jahudi ras kalak Junani kerna pertobaten man Dibata bage pe kerna kiniteken man Tuanta Jesus.”—Perb. 20:18-21.
15. Kai saja kelebihen erberita arah rumah ku rumah?
15 Gundari, mbue cara erberita. Bali bagi Paulus, kita erberita i japa pe lit jelma, bagi i dalan, i terminal, ntah pe i pajak. Tapi, erberita arah rumah ku rumah tetap jadi cara utama si igunaken Saksi Jahwe. Engkai? Salah sada alasenna eme erberita arah rumah ku rumah banci erban reh buena kesempaten kalak megiken berita si meriah, janah e mbuktiken maka Jahwe la erpilihen. Selain si e, erberita arah rumah ku rumah erban kita banci nampati kalak si meteruk ukur sesuai ras keperlunna. Cara erberita si bage pe banci erban kinitekenta reh paguhna janah erban kita megenggeng. Ciri khas kalak Kristen situhu-tuhu eme semangat erberita si meriah “i lebe-lebe jelma si enterem bage pe arah rumah ku rumah.”
16, 17. Kai buktina Paulus perpang, janah uga kalak Kristen si gundari ngusih ia?
16 Ijelasken Paulus man pertua-pertua i Epesus maka la tehna bahaya kai si nimai ia i Jerusalem. Nina Paulus man kalak e, “Amin pe bage, labo kuakap merga geluhku. Si pentingna banci aku kiam seh ku ujung perlumban enda janah kudungi pelayanen si enggo kualoken arah Tuan Jesus, eme mberitaken berita si meriah alu jelas kerna kiniulin Dibata si luar biasa.” (Perb. 20:24) Paulus la mbiar. La pediatna situasi kai pe, bagi masalah kesehaten ntah pe tentangen erban ia la ndungi tugas pelayanenna.
17 Kalak Kristen si gundari pe ngadapi mbue tentangen. Lit si ilarang pemerentah, lit ka si itindas. Lit si ngadapi penakit, lit ka si ngadapi perasan negatip. Anak-anak muda pe ngadapi tekanen arah temanna i sekolah. Tapi bali bagi Paulus, la sipediat kai pe erban kita lanai “mberitaken berita si meriah alu jelas.”
“Perdiatekenlah Diri Kena ras Kerina Rarasen” (Perb. 20:25-38)
18. Kai si lakoken Paulus gelah banci bebas arah utang dareh, janah uga pertua-pertua Epesus ngusih ia?
18 Sanga reh pertua-pertua arah Epesus ndahi Paulus, bereken Paulus nasehat si terus terang man kalak e. Ingetkenna kalak e kerna uga ia mperdiateken turang senina. Tangtangna, katakenna maka banci saja lanai bo pernah kalak e jumpa. Kenca si e, nina, “Aku bersih arah dareh kerina kalak, sebap la aku mbiar erberita man kena guna mpeseh kerina sura-sura Dibata alu jelas.” Uga pertua-pertua Epesus ngusih Paulus gelah bebas kalak e arah utang dareh? Nina Paulus man kalak e, “Perdiatekenlah diri kena ras kerina rarasen, sebap kena enggo ipilih alu kesah si badia jadi pengawas kalak e guna mpermakani runggun Dibata si enggo tukurNa alu dareh AnakNa.” (Perb. 20:26-28) Ipersingeti Paulus kalak e maka nandangi reh “srigala-srigala si merawa” ku runggun janah ‘pesehna ajaren sesat gelah murid-murid Jesus jadi pengikutna.’ Kai si arus ilakoken pertua-pertua e? Nina Paulus, “Tetaplah erjaga-jaga janah ingetlah maka telu tahun dekahna kupersingeti kena suari ras berngi alu iluh mambur.”—Perb. 20:29-31.
19. Kai si terjadi kira-kira 60 tahun kenca Jesus mate, janah kai si terjadi 200 ras 300 tahun kenca si e?
19 Kira-kira 60 tahun kenca Jesus mate, reh me “srigala-srigala si merawa.” Kira-kira tahun 98 Masehi, itulis Rasul Johanes, “Gundari pe enggo enterem musuh Kristus. . . . Sange kalak e ras kita, tapi ndarat kalak e perban kalak e la seri ras kita. Adi seri kalak e ras kita, pasti ras denga kita.” (1 Joh. 2:18, 19) Kira-kira 200 tahun kenca Jesus mate, peminpin-peminpin kalak murtad erpengakap maka kalak e kelompok si istimewa ras ganjangen asangken turang senina bas runggun. Kira-kira 300 tahun kenca Jesus mate, peminpin Roma eme Konstantin, idukungna agama Kristen si palsu e. Ajarken peminpin kalak murtad e “ajaren sesat.” Campurken kalak e ajaren Pustaka ras ajaren bage pe kebiasan kafir.
20, 21. Kai buktina Paulus nggit erkorban, janah uga pertua Kristen si gundari banci ngusih ia?
20 Paulus la bagi peminpin-peminpin kalak murtad ndai. Adi kalak e, manpaatkenna turang senina. Tapi Paulus, erdahin ia guna ncukupi keperlunna gelah la mberat akap runggun. Amin pe Paulus kerja keras nampati turang seninana, tujunna labo gelah ia dat sen arah kalak e. Emaka, persingeti Paulus pertua-pertua Epesus gelah kalak e pe nggit erkorban. Nina Paulus, “Arus sampati kena kalak si lemah janah arus inget kena kata-kata Tuan Jesus eme, ‘Riahen kap mere asangken ngalo.’”—Perb. 20:35.
21 Bali bagi Paulus, pertua-pertua Kristen si gundari pe nggit erkorban. Kalak e beda kel ras peminpin-peminpin agama susunen Kristen si ndarami sen arah jemaatna. Iteh pertua-pertua e maka lit bereken Dibata man bana tanggung jawap guna “mpermakani runggun Dibata.” Dalanken kalak e tugas e alu la mentingken bana. Kalak si sombong ras si atena ihamati la cocok jadi bagin runggun Kristen. Kalak si melebesa ras si ndarami “kemulian man diri sendiri,” dungna ihina.—Kua. 11:2; 25:27.
“Tangis kalak e kerina.”—Perbahanen Rasul-Rasul 20:37
22. Engkai maka keleng kel ate pertua-pertua Epesus man Paulus?
22 Keleng kel ate Paulus man turang seninana. Emaka, kalak e pe engkelengi ia. Sanga ia muat berkat, “tangis kalak e kerina, dakepna janah emana Paulus.” (Perb. 20:37, 38) Kalak Kristen tuhu-tuhu ngergai ras engkelengi kalak si bagi Paulus, si nggit mereken waktu, gegeh, ras senna guna mpegegehi turang seninana. Kenca sibahas usihen Paulus si seh kel jilena, setuju nge kam adi sikataken labo Paulus melebesa sanga katakenna “aku bersih arah dareh kerina kalak”?—Perb. 20:26.
a Nen kotak “ Surat-Surat si Itulis Paulus i Makedoni.”
b Mbelin kemungkinenna itulis Paulus surat man kalak Roma sanga ia i Korinti.
c Nen kotak “ Taruhken Paulus Penampat man Turang Senina.”
d Bas Perbahanen Rasul-Rasul 20:5, 6, igunaken Lukas kata “kami.” Enda ertina bas perdalanen Paulus ku Troas, jemputna Lukas i Pilipi.—Perb. 16:10-17, 40.
e Perdalanen kalak e Pilipi nari ku Troas perlu waktu lima wari dekahna. Si e banci saja terjadi perban la mejile angin. Bas perdalanen kalak e sebelumna, dua wari ngenca Pilipi nari ku Troas.—Perb. 16:11.