PASAL 20
“Terberita . . . janah Erkuasa” amin pe Itentang
Apolos ras Paulus nampati enterem kalak megiken berita si meriah
Arah Perbahanen Rasul-Rasul 18:23–19:41
1, 2. (a) Bahaya kai nge si iadapi Paulus ras teman-temanna i Epesus? (b) Kai si nandangi sibahas bas pasal enda?
GEJEK kel dalan-dalan si lit i Epesus. Terbegi me sora kalak serko bage pe sora kalak si kiamen. Kalak si merawa enggo pulung, janah kentisik nari pasti terjadi kerusuhen. Itangkap kalak e janah isarenna dua teman Paulus sendalanen. Dalan si mbelang si lit toko-toko pe mis kosong. Kalak si lit i je lawes ku stadion si lit i kota e. Bas stadion e banci siat 25.000 kalak. Teremen kalak si reh ku je labo itehna kai si erban terjadi kerusuhen e. Akap kalak e rumah pertoton ras dewi si keleng kel atena, eme Artemis, sangana terancam. Emaka mulai kalak e serko nina, “Terpujilah Artemis, dewi kalak Epesus!”—Perb. 19:34.
2 Bas situasi e, igunaken Setan ka serangen massa guna mpengadi dahin erberita. Memang labo kekerasen ngenca cara si igunaken Setan. Bas pasal enda sibahas kari piga-piga cara licik si igunaken Setan guna ngganggu dahin erberita ras ncedai persadan kalak Kristen abad pertama. Tapi si pentingna, sinen me kari maka kerina cara Setan e gagal. Sebap “kata Jahwe terus terberita alu cara si luar biasa janah erkuasa.” (Perb. 19:20) Engkai maka banci italuken kalak Kristen e Setan? Sebap Jahwe si nampati kalak e. Gundari pe, banci kita tetap erberita ras tetap ersada perban Jahwe si nampati kita. Tapi, bali bagi kalak Kristen abad pertama, arus lit usahata. Alu penampat kesah si badia Jahwe, perlu sipebelin sipat-sipat si banci nampati kita gelah berhasil ngelakoken pelayanenta. Si pertama, mari sibahas usihen Apolos.
“Melala Pemetehna kerna Kitap si Badia” (Perb. 18:24-28)
3, 4. Kai nge si isadari Akuila ras Persila kerna Apolos, janah uga kalak e nampati ia?
3 Bas perdalanen utusen injilna si peteluken, sanga Paulus bas dalan muatna ku Epesus, lit sekalak Jahudi si gelarna Apolos si enggo seh bas kota e. Asalna arah Aleksandria nari, kota si terkenal i Mesir. Melala kelebihen Apolos. Beluh kel ia ngerana. Selain si e, “melala pemetehna kerna Kitap si Badia” janah “semangat kel ia.” Pang kel ia ngerana man kalak Jahudi si lit bas ingan pulung kalak Jahudi.—Perb. 18:24, 25.
4 Sanga Apolos ngerana, lit Akuila ras Persila i je. Pasti meriah kel ukur kalak e sanga begina Apolos “ngajar kerna Jesus alu tepat.” Memang kai si ijelasken Apolos kerna Jesus enggo tepat. Tapi, la ndekah kenca si e, isadari Akuila ras Persila maka ‘peridin Johanes ngenca si iteh Apolos.’ Amin pe Apolos beluh ngerana ras meganjang sekolahna, janah pasangen si sederhana e dahinna erban kemah ngenca, pang kalak e ngerana man Apolos. Malahen, “baba kalak e ia janah jelasken kalak e dalan Dibata alu lebih tepat man bana.” (Perb. 18:25, 26) Uga nge tanggapen Apolos? Arah tanggapen Apolos teridah maka ia meteruk ukur. E me salah sada sipat si pentingna man kalak Kristen.
5, 6. Kai nge si erban Apolos lebih erguna man Jahwe, ras kai si banci sipelajari arah Apolos?
5 Perban nggit Apolos ngaloken penampat arah Akuila ras Persila, reh beluhna me ia bas erberita. Dungna lawes ia ku Akaya, i je “melala kel sampatina” kalak Kristen. Selain si e, erberita ia man kalak Jahudi si lit i je. Kalak e la tek maka Jesus eme Mesias si ijanjiken. Nina Lukas, “Semangat ia mbuktiken alu jelas . . . maka ajaren kalak Jahudi e salah. Tuduhkenna man kalak e arah Kitap si Badia maka Jesus kap Kristus.” (Perb. 18:27, 28) Apolos jadi pasu-pasu si mbelin man runggun Kristen. Perban Apolos, melala dungna kalak si nggit erlajar “kata Jahwe.” Kai si banci sipelajari arah Apolos?
6 Meteruk ukur eme sipat si arus lit bas kalak Kristen. Kita kerina lit kelebihenta masing-masing. Banci jadi lit keahlinta, pengalamenta, ntah pe mbue pemetehta. Amin gia bage, adi la kita meteruk ukur, la kita erguna man Jahwe. Malahen e banci jadi jerat man banta, dungna banci kita jadi kalak si sombong. (1 Kor. 4:7; Jak. 4:6) Adi tuhu-tuhu kita meteruk ukur, pasti sianggap kalak si deban ganjangen asangken kita. (Pil. 2:3) Labo kita merawa sanga lit kalak si mpersingeti kita, janah nggit kita iajari. Pasti la sipaksaken pendapatta adi pendapatta e la sesuai ras petunjuk si ibereken organisasi Jahwe. Adi terus kita meteruk ukur, pasti tetap kita igunaken Jahwe ras Jesus guna ngelakoken peratenNa.—Luk. 1:51, 52.
7. Engkai Paulus ras Apolos jadi usihen bas ncidahken sipat meteruk ukur?
7 Adi meteruk ukur kita, la cian ateta man kalak si deban. Cuba bayangkenndu, pasti merhat kel Setan erban kalak Kristen bas abad pertama lanai ersada. Apolos ras Paulus lit kelebihenna masing-masing ras beluh kalak e ngajar. Pasti meriah kel akap Setan adi duana kalak e sician-cianen janah ersaing gelah jadi kalak si mbelinna pengaruhna man runggun. Situhuna, e menukah kel terjadi antara kalak e duana. Piga-piga kalak Kristen bas Korinti ngataken, “Aku pengikut Paulus,” si deban ngataken, “Adi aku pengikut Apolos.” Meriah nge ukur Paulus ras Apolos ngidah turang senina si lanai ersada e? Lang! Alu meteruk ukur puji Paulus Apolos perban semangat ia erberita. Iberekenna ka tugas tambahen man Apolos. Apolos pe nggit ngikuti petunjuk Paulus. (1 Kor. 1:10-12; 3:6, 9; Tit. 3:12, 13) Paulus ras Apolos meteruk ukur janah nggit kerja sama. Kalak e jadi usihen man banta gundari.
“Usahakenna gelah Tek Kalak kerna Kerajan” (Perb. 18:23; 19:1-10)
8. Arah ja nge Paulus mulihken ku Epesus, janah engkai?
8 Erjanji Paulus maka reh ka nge pagi ia mulihi ku Epesus janah tepatina janjina e. a (Perb. 18:20, 21) Tapi, perdiateken uga carana ia reh mulihi. Terakhir, ia sangana i posna i Antiokia Siria. Situhuna, arah Antiokia Siria banci ia naik kapal arah Selukia nari gelah mis seh ku Epesus. Tapi ipilihna “ngelewati daerah pelosok.” Mbelin kemungkinenna perdalanen Paulus si icatat bas Perbahanen Rasul-Rasul 18:23 ras 19:1 lit kira-kira 1.600 kilometer dauhna. Engkai maka ipilih Paulus perdalanen si ndauh e? Perban tujunna eme “mpegegehi kerina murid-murid.” (Perb. 18:23) Bali bagi perdalanen utusen injil Paulus si pertama ras si peduaken, perdalanen utusen injil Paulus si peteluken pe merluken melala pengorbanen arah ia nari. Tapi, labo sia-sia akap Paulus pengorbanenna e. Gundari pe, pertua keliling ras ndeharana ngusih semangat Paulus. Pasti siergai ras ngata bujur kita perban nggit kalak e erkorban.
9. Engkai maka lit piga-piga murid si arus iperidiken mulihi, janah kai si banci siusih arah kalak e?
9 Kenca seh i Epesus, jumpa Paulus ras kira-kira 12 murid Johanes Peridiken. Kalak e iperidiken alu peridin Johanes. Peridin e lanai berlaku. Selain si e, sitik ngenca ntah banci saja la lit pemeteh kalak e kerna kesah si badia. Emaka ituriken Paulus informasi si terbaru man kalak e. Bali bagi Apolos, kalak e meteruk ukur ras meriah akapna erlajar. Kenca iperidiken i bas gelar Jesus, aloken kalak e me kesah si badia janah banci lakoken kalak e piga-piga mukjizat. Jelas me, ipasu-pasu Jahwe kalak si ngikutken petunjuk si terbaru arah organisasiNa.—Perb. 19:1-7.
10. Engkai maka pindah Paulus arah ingan pulung kalak Jahudi ku gedung sekolah, janah uga kita banci ngusih ia?
10 Kenca si e, semangat Paulus erberita bas ingan pulung kalak Jahudi sedekah telu bulan. Amin pe “usahakenna gelah tek kalak kerna Kerajan Dibata,” lit si la nggit megiken Paulus janah mulai nentang ia. Asangken keri waktu Paulus ngerana man kalak si ‘ncikuraki Dalan Tuan,’ iputuskenna erberita tiap wari i gedung sekolah. (Perb. 19:8, 9) Kalak si atena meteh terbuen kerna Kerajan Dibata arus pindah arah ingan pulung kalak Jahudi ku gedung sekolah. Adi jumpa kita ras si mada jabu si la nggit megiken kita, ntah pe sijawapen saja atena ras kita, banci siusih Paulus. Laweslah kita arah ingan e, melala denga kalak si bali bagi biri-biri si nggit megiken berita si meriah.
11, 12. (a) Uga Paulus terbukti kerja keras janah nggit erban perubahen? (b) Uga Saksi-Saksi Jahwe kerja keras janah nggit erban perubahen bas erberita?
11 Banci jadi, tiap wari Paulus erberita i gedung sekolah e. Erberita ia kira-kira jam 11 ciger seh ngasa jam 4 karaben. (Nen keterangen tambahen nwtsty-IN man Perb. 19:9) Mbelin kemungkinenna bas waktu e melas kel wari, janah bas jam e pe enterem kalak ngadi erdahin guna man ras istrahat. Adi iikuti Paulus jadwal e sedekah dua tahun, ertina enggo lebih 3.000 jam ia erberita. b E me alasen si deban engkai maka reh teremna kalak megiken Kata Dibata. Kerja keras kel Paulus, janah nggit ia erban perubahen. Nggit ia ngubah waktu ras ingan erberita gelah banci sampatina terbuen kalak. Kai hasilna? “Kerina kalak i Propinsi Asia, termasuk kalak Jahudi ras Junani megi kata Tuhan.” (Perb. 19:10) Emaka, ser-ser me berita si meriah si ipeseh Paulus.
Sisesuaikenlah waktu ras carata erberita gelah banci kita erberita man enterem kalak
12 Saksi-Saksi Jahwe si gundari pe kerja keras janah nggit erban perubahen gelah banci nampati terbuen kalak. Siusahaken njumpai kalak i japa pe ras ndigan pe kalak e banci ijumpai. Erberita kita i dalan, i pajak, bage pe bas ingan parkir. Erberita ka kita arah telepon bage pe surat. Janah siusahaken erberita arah rumah ku rumah bas waktu si biasana enterem kalak i rumah.
Perb. 19:11-22)
“Terberita . . . janah Erkuasa” amin pe Lit Malekat-Malekat Jahat (13, 14. (a) Isampati Jahwe Paulus ngelakoken kai? (b) Kesalahen kai si iban anak-anak Sekewa, janah gundari uga kalak si ngaku Kristen ngelakoken kesalahen si seri?
13 Ipebetehken Lukas man banta maka berhasil kel Paulus sanga erberita. Paulus banci berhasil perban isampati Jahwe ia ngelakoken “perbahanen-perbahanen si luar biasa ras si dem kuasa.” Sapu tangan ras baju Paulus pe banci mpepalem kalak si sakit janah mpelawes malekat jahat. c (Perb. 19:11, 12) Enterem kalak si luar biasa kapna ngidah malekat-malekat jahat banci ipelawes. Tapi, labo kerina kalak bage tanggapenna.
14 Lit piga-piga “kalak Jahudi si erdalan-dalan guna mpelawes malekat jahat.” Usih kalak e atena mukjizat Paulus. Piga-piga arah kalak e usahakenna mpelawes malekat jahat alu mbelasken gelar Jesus ras Paulus. Contohna eme pitu anak Sekewa, imam kepala Jahudi. Tapi nina malekat jahat e man kalak e, “Kutandai nge Jesus, janah kuteh ise Paulus. Tapi kena ise?” Lompat me si kerasuken ndai, serangna pituna penipu e. Serangna kalak e bali bagi binatang buas, emaka mis kel kalak e kiam alu la ruis janah luka-luka. (Perb. 19:13-16) Enda sada kemenangen man “kata Jahwe.” Arah kejadin enda siteh maka mbelin kel kuasa si bere Jahwe man Paulus tapi kuasa e la berekenNa man kalak si lit bas agama palsu. Gundari, jutan kalak erpengakap maka ngelebuh gelar Jesus saja enggo bias ntah pe ngaku “Kristen” saja enggo bias. Tapi bagi si ikataken Jesus, kalak si ngelakoken peraten Bapakna ngenca si ndatken arapen situhu-tuhu bas masa depan.—Mat. 7:21-23.
15. Uga kita ngusih kalak Epesus?
15 Enterem kalak Epesus si nggunaken ilmu sihir. Igunaken kalak e jimat, mantra, ras buku ilmu sihir. Tapi, kenca anak-anak Sekewa ipermelaken, enterem kalak si dungna jadi kalak Kristen. Tadingken kalak e kai pe si lit hubungenna ras malekat-malekat jahat. Enterem kalak Epesus si mpedarat buku-buku ilmu sihirna, janah itutungna buku-buku e i lebe-lebe jelma si enterem amin pe merga kel buku e. d Itulis Lukas, “Emaka kata Jahwe terus terberita alu cara si luar biasa janah erkuasa.” (Perb. 19:17-20) Enda tuhu-tuhu kemenangen si mbelin man Jahwe bage pe umatNa. Agama palsu ras ilmu sihir enggo terbukti talu. Kalak si setia e jadi usihen man banta. Gundari melala kel kalak i sekelilingta si ngelakoken perbahanen si lit hubungenna ras malekat-malekat jahat. Emaka adi lit bas kita kai pe si lit hubungenna ras malekat-malekat jahat, mislah siambekken bagi si ilakoken kalak Epesus. Sipedauhlah perbahanen si erban ciga ate e amin gia mesera ngelakokenca.
“Guntar Epesus” (Perb. 19:23-41)
“O teman-teman, pasti teh kena maka makmur kita perban bisnista enda.”—Perbahanen Rasul-Rasul 19:25
16, 17. (a) Uga Demetrius erban guntar kota Epesus? (b) Ja nari siteh maka kalak Epesus fanatik?
16 Ijelasken Lukas me kerna sada taktik Setan. Itulis Lukas maka “guntar Epesus perban Dalan Tuan.” Labo lebihsa kai si ikatakenna e. e (Perb. 19:23) Lit sekalak dilaki si gelarna Demetrius. Dahinna erban patung-patung pirak. Ikatakenna man tukang-tukang si deban maka kalak e banci bayak perban patung-patung berhala si idayaken kalak e. Ikatakenna ka man kalak e maka berita si ipeseh Paulus banci erban bisnis kalak e rugi, perban kalak Kristen la nembah berhala. Selain si e, iteh Demetrius maka kalak e bangga kel man kota ras bangsana. Emaka persingetina kalak e maka adi ibegiken kalak kari berita Paulus, Dewi Artemis ras kuil Artemis si terkenal i belang-belang doni “lanai pagi ergai kalak.”—Perb. 19:24-27.
17 Berhasil Demetrius erban kalak e nulak berita Paulus. Merawa tukang-tukang pirak e janah mulai kalak e serko, “Terpujilah Artemis, dewi kalak Epesus!” Kenca si e, guntar kota e janah gejek bali bagi si ituriken bas awal pasal enda. f Perpang kel Paulus janah dahina atena ingan ertarung e, tapi la bere murid-murid ia lawes ku je gelah la ia dat masalah. Lit sekalak dilaki si gelarna Aleksander, cinder ia guna ngerana man jelma si enterem e. Perban ia kalak Jahudi, banci saja ijelaskenna atena kai bedana kalak Jahudi ras kalak Kristen. Tapi keterangenna e labo penting iakap jelma si enterem e. Sanga iteh kalak e maka ia kalak Jahudi, la bere kalak e ia ngerana. Lalap kataken kalak e, “Terpujilah Artemis, dewi kalak Epesus!” Ikataken kalak e bage kira-kira dua jam dekahna. Gundari pe melala kel kalak si fanatik, e erban kalak e lanai masuk akal.—Perb. 19:28-34.
18, 19. (a) Uga wali kota mpetenang jelma si enterem i Epesus? (b) Uga pemerentah mon-mon ngelindungi umat Jahwe, janah kai si perlu silakoken gelah kita banci ilindungi?
18 Dungna petenang wali kota me jelma si enterem e. Wali kota e masuk akal. Tangtangna, ikatakenna man jelma si enterem e maka kalak Kristen labo mbahayaken rumah pertoton bage pe dewi kalak e. Kenca si e, ikatakenna ka maka labo lit kejahaten si ilakoken Paulus ras teman-temanna nandangi rumah pertoton Artemis. Ikatakenna ka maka adi la pas akap jelma si enterem e nandangi kai si ilakoken Paulus ras teman-temanna, banci kalak e ngadu man pemerentah. Tapi si mbelinna kel pengaruhna man jelma si enterem e, eme sanga katakenna maka kalak e banci iaduken perban pemberontaken si ilakoken kalak e ngelanggar undang-undang Roma. Emaka mis bubar jelma si enterem ndai. Kata-kata wali kota si masuk akal ndai mis erban kalak e tenang. Uga terna kalak e merawa bage ka me terna kalak e tenang.—Perb. 19:35-41.
19 Sope kejadin e, enggom pernah ilindungi pejabat si pentar pengikut Jesus, janah kejadin e labo si terakhir. Lit idah Rasul Johanes pengenehenen kerna wari-wari pendungi. Bas pengenehenen e, idahna doni eme kalak si masuk akal bas doni enda mbendut lau eme penindasen si ilakoken Setan nandangi pengikut Jesus. (Ket. 12:15, 16) Si e enggo terjadi. Bas melala kasus, nggit pejabat si pentar ngelindungi hak Saksi Jahwe guna erberita bage pe perpulungen. Nggit kalak e ngelindungi kita perban idahna perbahanenta si mehuli. Mbelin kemungkinenna perban mehuli perbahanen Paulus mbarenda, lit pejabat pemerentah Epesus si ngergai ia ras ngelindungi ia. (Perb. 19:31) Mbera-mbera perbahanenta si jujur ras mehamat erban kalak si deban ngergai kita. Melala kel hasil si mehuli si banci sidat adi mehuli perbahanenta.
20. (a) Uga nge perasanndu sanga idahndu kata Jahwe terus terberita janah erkuasa bas abad pertama bage pe gundari? (b) Kai nge tekadndu?
20 Pasti luar biasa kel siakap sanga siteh “kata Jahwe terus terberita . . . janah erkuasa” bas abad pertama. Luar biasa ka siakap ngidah si e terjadi bas jamanta gundari. Enda sada kemenangen man banta. Kai nge si banci silakoken gelah ikut kita terlibat bas ndatken kemenangen e? Erlajarlah arah contoh-contoh si enggo sibahas. Tetaplah meteruk ukur. Mislah ikutken petunjuk arah organisasi Jahwe. Semangatlah erberita. Tulaklah kai pe si lit hubungenna ras malekat-malekat jahat, janah usahakenlah jadi kalak si jujur ras mehamat, gelah tertarik kalak man kebenaren.
a Nen kotak “ Epesus—Ibu Kota Asia.”
b Sanga Paulus i Epesus, itulisna ka surat 1 Korinti.
c Banci jadi, sapu tangan e iiketken Paulus bas perdempakenna gelah keringatna la masuk ku matana. Selain si e, bas bahasa aslina ikataken maka lit ka uis si iiketken Paulus bas awakna sanga ia erdahin. E ncidahken maka sanga la ia erberita, erdahin ia erban kemah, banci jadi bas pagi-pagi si lampas.—Perb. 20:34, 35.
d Ikataken Lukas maka erga buku e kira-kira 50.000 logam pirak. Adi si imaksud Lukas e eme dinar, kalak bas abad pertama arus erdahin tiap wari sedekah 50.000 wari ntah pe kira-kira 137 tahun gelah banci datna sen bage buena.
e Lit si erpengakap maka kejadin enda me maksud Paulus sanga ikatakenna man kalak Korinti “lanai akap kami lit arapen kami nggeluh.” (2 Kor. 1:8) Tapi banci saja maksudna kejadin si deban si lebih berbahaya. Sanga itulis Paulus maka ia ‘ngelawan binatang-binatang buas i Epesus,’ banci saja maksudna pengalamenna ngelawan binatang-binatang buas bas ingan ertarung, ntah pe pengalamenna itindas penentang. (1 Kor. 15:32) Jadi, kata-kata Paulus e banci maksudna binatang buas situhu-tuhu ntah kalak si nentang.
f Persadan tukang pirak e banci saja paguh kel. Contohna, kira-kira sada abad kenca si e, persadan tukang roti erban guntar kota Epesus.