1-4. Engkai maka Paulus lawes ku Jerusalem, janah kai si nandangi terjadi man bana i je?

 SANGA lawes ate Paulus ras Lukas arah Miletus, sedih kel kalak e. Pertua-pertua Epesus pe sedih kel. Sedekah enda enggo sikeleng-kelengen kalak e kerina. Cinder me duana utusen injil e i datas kapal. Enggo baba kalak e kerina si iperluken bas perdalanen e. Baba kalak e ka sen sumbangen janah lanai kalak e sabar mereken sumbangen e man turang senina si mesera i Judea.

² Rembus me angin ku layar kapal e. Berkat me kapal e arah pelabuhen. Itatap Paulus, Lukas, ras pitu teman kalak e me turang senina si sedih bas pelabuhen. (Perb. 20:4, 14, 15) Paulus ras teman-temanna terus ndadaken tanna seh ngasa lanai idahna turang senina e.

³ Lit kira-kira telu tahun dekahna Paulus ngelayani radu ras pertua-pertua i Epesus. Tapi gundari, suruh kesah si badia ia lawes ku Jerusalem. Sitik buena, enggom teh Paulus kai si nandangi terjadi man bana i je. Sebelumna, kataken Paulus man pertua-pertua e, “Suruh Dibata aku arah kesah si badia gelah lawes ku Jerusalem, amin pe la kuteh kai kari si terjadi man bangku i jah. Bas tiap kota si kudalani, mulih-ulih aku ipersingeti arah kesah si badia maka penjara ras kiniseran enggo nimai aku.” (Perb. 20:22, 23) Amin pe bahaya, nggit Paulus lawes ku Jerusalem. Penting kel akapna ngikutken petunjuk “kesah si badia.” Labo meriah akap Paulus itindas. Tapi, si pentingna akapna eme ngelakoken peraten Dibata.

⁴ Adi kam uga? Sanga sibaktiken dirita man Jahwe, enggo erjanji kita guna ngelakoken peraten Jahwe, janah e siban si pentingna bas geluhta. Bas pasal enda, sipelajari kari terdauhen kerna usihen Rasul Paulus, si e banci nampati kita ngusih ia.

5. Jalur si apai si ilewati Paulus ras teman-temanna bas perdalanen ku Tirus?

⁵ Kapal si inangkihi Paulus ras teman-temanna ‘erlayar terus’ ku  Kos. Maksudna, perban mejile angin, banci kapal e seh ku Kos bas wari e. (Perb. 21:1) Mbelin kemungkinenna erberngi kapal e i je. Paginna, berkat kapal e ku Rodus ras Patara. I Patara ntah pe pantai selatan Asia Kecil, nangkih me kalak e ku kapal si galang. Erlayar kalak e ku Punike. Bas perdalanen, ilewati kalak e “Pulau Kiprus i sebelah kiri.” (Perb. 21:3) Engkai maka itulis Lukas, penulis buku Perbahanen Rasul-Rasul, maka kalak e ngelewati Pulau Kiprus?

6. (a) Engkai maka terpegegehi kel Paulus sanga idahna Pulau Kiprus? (b) Kesimpulen kai si banci banndu sanga ukurindu uga Jahwe nampati kam ras masu-masu kam?

⁶ Banci saja ceritaken Paulus man teman-temanna uga pengalamenna sanga i Pulau Kiprus. Bas perdalanen utusen injilna si pertama kira-kira siwah tahun sope si e, Paulus, Barnabas, ras Johanes Markus jumpa ras Elimas si tukang sihir. Itentang Elimas kel kalak e. (Perb. 13:4-12) Sanga idah Paulus Pulau Kiprus janah iukurina pengalamenna sanga bas pulau e, banci saja terpegegehi kel Paulus janah ngasup ia ngadapi kai si nandangi terjadi man bana i Jerusalem. Kita pe pasti terpegegehi kel adi siinget pasu-pasu Jahwe man banta janah siukuri uga Jahwe nampati kita megenggeng.  Alu bage, banci seri perasanta ras Daud, si nulis, “Melala kap kesusahen kalak si benar, tapi selamatken Jahwe ia arah kerina e.”​—Ms. 34:19.

7. Kai si lakoken Paulus ras teman-temanna kenca kalak e seh i Tirus?

⁷ Teh Paulus maka penting kel hubungenna ras turang seninana, janah meriah ukurna radu ras turang seninana. Sanga Paulus ras teman-temanna seh i Tirus, bagenda itulis Lukas, ‘Darami kami murid-murid i je, kenca si e, jumpa kami ras kalak e.’ (Perb. 21:4) Teh Paulus ras teman-temanna maka lit turang seninana i Tirus. Emaka, idarami kalak e turang senina e, janah dungna jumpa kalak e. Salah sada pasu-pasu si banci sidat perban kita ngelayani Dibata eme ku ja pe kita lawes, pasti kita jumpa ras turang seninata. Cara rukur kalak e seri ras cara rukurta, janah pasti kita alo-alona. Kalak si engkelengi Dibata ras ngelayani Ia, pasti lit teman-temanna i belang-belang doni.

8. Kai nge ertina kata-kata bas Perbahanen Rasul-Rasul 21:4?

⁸ Lit pitu wari dekahna Paulus ras teman-temanna tading i Tirus. Ituriken Lukas maka paksa si e lit kejadin si erban kalak e sengget. Nina, “Alu penegu-negu kesah si badia mulih-ulih kataken [turang senina i Tirus] man Paulus gelah ula ia lawes ku Jerusalem.” (Perb. 21:4) Payo nge ate Jahwe Paulus la pedah lawes ku Jerusalem? Lang. Memang, ituriken kesah si badia maka Paulus nandangi isiksa i Jerusalem. Tapi, labo lit ilarang kesah si badia Paulus lawes ku Jerusalem. Emaka, mbelin kemungkinenna, perban iteh turang senina i Tirus maka Paulus nandangi isiksa i Jerusalem, kuatir kalak e janah katakenna gelah Paulus la pedah lawes ku Jerusalem. Lindungi kalak e atena Paulus, janah si e wajar. Tapi, Paulus ertekad guna ngelakoken sura-sura Dibata. Emaka teruskenna perdalanenna ku Jerusalem.​—Perb. 21:12.

9, 10. (a) Kai nge si ukuri Paulus sanga pindo turang senina i Tirus gelah ia la lawes ku Jerusalem? (b) Uga nge perukuren kalak bas doni enda gundari, tapi kai si ikataken Jesus?

⁹ Sanga pindoken turang senina gelah Paulus la lawes ku Jerusalem, banci saja inget Paulus uga tanggapen murid-murid Jesus sanga kataken Jesus maka ia nandangi lawes ku Jerusalem, isiksa, ras ibunuh. Perban sedihna, nina Petrus man Jesus, “Mekuahlah atendu bandu, Tuan. Labo terjadi si e man bandu.” Nina Jesus man bana, “Laweslah ku pudiku, Setan! Kam kap si ngambati aku, perban kai si ukurindu labo perukuren Dibata tapi perukuren manusia.” (Mat. 16:21-23) Ertekad Jesus ngelakoken tugas si enggo bereken Dibata man bana. Perasan Paulus pe bali bagi Jesus. Turang senina i Tirus bali bagi Rasul Petrus. Mehuli nge sura-sura kalak e, tapi la angkana kai sura-sura Dibata.

¹⁰ Enterem kalak gundari enda pangen kapna ngelakoken kai si menukah  ilakoken, janah la ate kalak e ngelakoken kai si penting adina mesera ngelakokenca. Enterem kalak si ndarami agama si la mbue tuntutenna. Tapi, ikataken Jesus maka kita la banci bage. Nina man murid-muridna, “Ise si atena ngikutken aku, lanai banci nggeluh man dirina sendiri, arus angkatna tiang siksanna janah terus ikutkenna aku.” (Mat. 16:24) Ngikutken Jesus eme dalan geluh si mehulina, tapi la nukah ngelakokenca.

11. Ja nari siteh maka keleng ate turang senina i Tirus man Paulus janah dukung kalak e Paulus?

¹¹ Iterusken Paulus, Lukas, ras teman-temanna me perdalanen kalak e. Arah kai si turiken Pustaka sanga kalak e berkat teridah maka keleng kel ate turang senina i Tirus man Paulus, janah dukung kalak e pelayanen Paulus. Kerina kalak e nemani Paulus ras teman-temanna ku pantai. Ras-ras kalak e sujud bage pe ertoto, jenari sirang kalak e. Kenca si e, Paulus, Lukas, ras teman-temanna nangkih ku kapal janah terusken kalak e perdalanenna ku Ptolomais. I je jumpa kalak e ras turang senina janah tading kalak e ras turang senina sada wari dekahna.​—Perb. 21:5-7.

12, 13. (a) Kai si ilakoken Pilipus segedang geluhna? (b) Engkai maka Pilipus jadi usihen si mejile man perbapan gundari?

¹² Paulus ras teman-temanna lawes ku Kesarea. a Sanga seh kalak e i je, “masuk [kalak e] ku rumah Pilipus janah tading ras ia. Ia sekalak perberita.” (Perb. 21:8) Pasti meriah kel ukur kalak e jumpa ras Pilipus. Kira-kira 20 tahun sope si e, Pilipus iangkat rasul-rasul i Jerusalem guna ngaturken dahin mbagiken pangan man runggun Kristen si mbaru denga ibentuk. Enggo ertahun-tahun dekahna Pilipus jadi perberita si semangat. Sanga terjadi penindasen man kalak Kristen i Jerusalem, lawes Pilipus ku Samaria janah erberita ia bas ingan e. Bas pudi wari, erberita Pilipus man sekalak pejabat istana arah Etiopia nari janah iperidikenna pejabat e. (Perb. 6:2-6; 8:4-13, 26-38) Pilipus enggo setia ngelayani Jahwe ertahun-tahun dekahna!

¹³ Paksa si e Pilipus enggo tading i Kesarea. I je, Pilipus tetap denga perberita si semangat. Ja nari siteh kerna si e? Perban kataken Lukas maka Pilipus e  “sekalak perberita.” Empat anak Pilipus si diberu pe ernubuat. b Enda ncidahken maka usih kalak e Pilipus. (Perb. 21:9) Tek kita, tutus ate Pilipus nampati keluargana engkelengi Jahwe ras ngelayani Jahwe. Gundari pe, perbapan ngusih kai si lakoken Pilipus. Usahaken kalak e jadi usihen bas erberita, janah usahakenna ka gelah meriah akap anak-anakna erberita.

14. Kai nge hasilna sanga reh Paulus ndahi turang seninana, janah uga kita banci ngusih kalak e gundari?

¹⁴ Ku japa pe Paulus lawes, daramina turang seninana janah ergaul ia ras kalak e. Pasti meriah akap turang senina e ngalo-ngalo Paulus ras teman-temanna. Kerehen Paulus pasti erban kiniteken kalak e reh paguhna sada ras si debanna. (Rom. 1:11, 12) Gundari pe bage, amin pe sederhana kel kegeluhenta, pasti mbue sidat gunana adi nggit kita ngalo-ngalo pertua keliling ras ndeharana.​—Rom. 12:13.

15, 16. Kai si ipeseh Agabus ras kai pengaruhna man kalak si megikenca?

¹⁵ Sanga tading Paulus ras Pilipus, reh me Agabus. Kalak si tading bas rumah Pilipus e tehna maka Agabus sekalak nabi. Pernah nubuatken Agabus kerna kelihen si mekelek bas jaman Klaudius. (Perb. 11:27, 28) Banci saja tersungkun-sungkun kalak e, ‘Engkai maka reh Agabus? Kai nge si nandangi ipesehna?’ Iperdiateken kalak e ibuat Agabus ikat pinggang Paulus. Ikat pinggang e eme uis si gedang si banci jadi ingan sen ntah pe barang si deban. Iket Agabus tanna ras nahena sendiri alu ikat pinggang e. Kenca si e ngerana ia janah serius kel kai si katakenna. Nina, “Enda me si ikataken arah kesah si badia, ‘Kalak si mpuna ikat pinggang enda, iiket kalak Jahudi i Jerusalem pagi alu cara si bagenda. Serahken kalak e ka pagi ia ku tan kalak arah bangsa si deban nari.’”​—Perb. 21:11.

 ¹⁶ Arah nubuat e banci siteh maka Paulus pasti lawes ku Jerusalem. Nubuat e pe ncidahken maka sanga Paulus erberita man kalak Jahudi, iserahken kalak e Paulus “ku tan kalak arah bangsa si deban nari.” Nubuat e erban kuatir kel kalak si lit bas rumah e. Itulis Lukas, “Megi si e, kami ras kalak si lit i je mindo gelah Paulus ula lawes ku Jerusalem. Tapi nina Paulus, ‘Engkai maka kena tangis? Engkai maka ban kena ate kena lemah semangatku? Teklah kena, ula kenca iiket, mate i Jerusalem pe enggom aku siap guna gelar Tuan Jesus.’”​—Perb. 21:12, 13.

17, 18. Ja nari siteh maka paguh kel tekad Paulus, janah uga tanggapen teman-temanna?

¹⁷ Bayangkenlah kai si terjadi. Lukas bage pe turang senina si deban mindo kel gelah Paulus la lawes ku Jerusalem. Piga-piga arah kalak e tangis. Sanga idah Paulus maka keleng kel ate kalak e man bana janah kuatir kalak e kerna ia, ikataken Paulus alu lembut maka si ilakoken kalak e ‘erban lemah semangatna.’ Tapi, tekad Paulus enggo bulat. Sebelumna, la pediatna turang senina i Tirus erban ia la surung lawes ku Jerusalem. Gundari pe, la pediatna turang senina i Kesarea erban ia la surung lawes ku Jerusalem. Jelaskenna man kalak e engkai maka arus ia ku Jerusalem. Perpang kel Paulus janah paguh kel tekadna! Bali bagi Jesus, ertekad Paulus lawes ku Jerusalem. (Heb. 12:2) Labo ate Paulus mate, tapi bicara arus pe ia mate, anggapna kematenna e sada kehamaten selaku pengikut Jesus Kristus.

¹⁸ Uga tanggapen turang senina? Ergai kalak e keputusen Paulus. Nina Pustaka, “Perban la begikenna kami, lanai paksa kami ia, janah ning kami, ‘Mbera-mbera peraten Jahwe si terjadi.’” (Perb. 21:14) La ipaksaken kalak e pendapatna man Paulus. Nggit kalak e megiken Paulus janah teh kalak e maka arus ikutken kalak e peraten Jahwe amin pe la sesuai ras sura-sura kalak e. Imulai Paulus me perdalanenna si ujungna eme kematen. Pasti nukahen akap Paulus adi kalak si engkelengi ia la erban lemah tekadna.

19. Pelajaren penting kai si banci sidat arah pengalamen Paulus?

¹⁹ Lit pelajaren penting si banci sidat arah Paulus. Adi lit kalak si atena erkorban guna ngelayani Jahwe, ula min siban lemah tekadna. Pelajaren e berlaku bas melala situasi. Contohna, enterem orang tua si sedih akapna sanga anakna lawes ku ingan si ndauh guna ngelayani Jahwe. Tapi, usahaken kalak e la erban lemah tekad anakna. Contohna Phyllis, si tading bas Inggris. Turikenna uga perasanna sanga anak sada-sadana lawes jadi utusen injil ku Afrika. Nina, “Sedih kel kuakap. Latih kuakap ngukuri maka ia tading bas ingan si ndauh. Tapi, bangga ka nge aku. Rusur ia kutotoken. Enda keputusenna janah la ateku ngubah keputusenna e. Selain si e, sedekah enda pe, enggo kuajari ia guna mpelebe Kerajan Dibata. Enggo 30 tahun ia ngelayani i luar negri. Tiap wari aku ngata bujur man Jahwe perban setia ia bas tugasna.” Mehuli kel hasilna adi sipegegehi turang seninata si nggit erkorban guna ngelayani Jahwe!

20, 21. Kai buktina meriah ukur Paulus radu ras turang seninana, janah engkai maka meriah kapna ras kalak e?

²⁰ Kenca dung Paulus ersikap-sikap, berkat me ia ras teman-temanna. Turang senina si dilaki arah Kesarea pe ikut ras ia. Enda mbuktiken maka kalak e teman si setia janah nggit ndukung Paulus. Sedekah perdalanen Paulus ku Jerusalem, ia ras teman-temanna lalap ndarami turang senina. Contohna i Tirus, darami kalak e murid-murid janah tading kalak e pitu wari dekahna. I Ptolomais, jumpa ka kalak e ras turang senina janah ras kalak e sada wari dekahna. I Kesarea, tading kalak e piga-piga wari i rumah Pilipus. Kenca si e, lit piga-piga murid arah Kesarea si ikut naruhken Paulus ras teman-temanna ku Jerusalem. I Jerusalem, jumpa kalak e ras Menason si enggo ndekah jadi murid Jesus. Dungna, seh me kalak e i Jerusalem. Nina Lukas, “Meriah ukur turang senina ngalo-ngalo kami.”​—Perb. 21:17.

²¹ Jelas me, meriah ukur Paulus radu ras turang seninana. Terpegegehi ia sanga rembak ras turang seninana. Kita pe bage. Tek kita, penampat turang senina me si erban Paulus banci megenggeng ngadapi tentangen arah kalak si atena munuh ia.