“Apusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit. Sebap kai si terjadi mbarenda enggo lanai lit.”​—Ketangkasen 21:4, Pustaka si Badia Terjemahen Doni si Mbaru.

Ndatken dahin si mehuli ras erban meriah.​—Jesaya 65:21-23.

Lanai pagi lit penakit ntah pe kesusahen.​—Jesaya 25:8; 33:24.

Nggeluh ermeriah ukur ras keluarga bage pe teman-temanta seh rasa lalap.​—Masmur 37:11, 29.

Enda piga-piga alasenna:

• Dibata ngasup nepati janjiNa. Bas Pustaka, Dibata Jahwe ngenca si igelari “Si Madakuasa,” sebap kuasaNa la lit batasna. (Ketangkasen 15:3) Emaka, pasti ngasup Dibata nepati janjiNa guna erban doni enda reh ulina. Pustaka ngatakenca, “Bas Dibata kai pe banci terjadi.”​—Matius 19:26.

• Merhat kel Dibata erban doni enda reh ulina. Contohna, merhat kel Dibata Jahwe erban kalak mate nggeluh mulihi.​—Jop 14:14, 15.

  Nina Pustaka, Jesus pernah mpepalem kalak si sakit. Engkai maka pepalemna? Perban merhat kel ia nampati kalak. Jesus bali bagi Bapakna. (Markus 1:40, 41) Emaka banci kita tek, ate Dibata Jahwe ras Jesus gelah kerina kita nggeluh ermeriah ukur.​—Johanes 5:19.

  Perban si e, la perlu kita sangsi pasti merhat Jahwe ras Jesus nampati kita ndatken masa depan si ermeriah ukur!​—Masmur 72:12-14; 145:16; 2 Petrus 3:9.