KEGELUHEN KRISTEN

Sampatilah Kalak si La Tertarik man Agama gelah Banci Tandaina Dibata

MAINKEN

Pernah nge kam ragu erberita man kalak si la tertarik man agama? Banci saja akapndu la kalak e nggit megiken. Tapi ingetlah, enterem kalak si tangtangna la tertarik man agama, termasuk kalak si la tek man Dibata, dungna jadi Saksi Jahwe. Biasana si perlu ilakoken eme nampati kalak e guna mereksa bukti-bukti maka Dibata e lit.—Rom 1:20; 10:14.

TONTONLAH VIDEO INGETLAH—KALAK SI LA ERKINITEKEN BANCI DUNGNA ERKINITEKEN!—KALAK SI LA TERTARIK MAN AGAMA, JANAH JAWAP PENUNGKUNEN ENDA:

Uga pengalamen Tommaso banci nampati kam gelah tetap positip man kalak si la tertarik man agama?

Jawapenndu

Cara ngelakokenca

Adi kalak si jumpa ras kita sanga erberita la tek Dibata e lit, cidahken man bana maka merhat kel kita meteh engkai maka bage perukurenna. Tapi ula kita sijawapen janah tetaplah lembut. (2Tim 2:24) Bahaslah topik-topik si menarik akapna. Nggit nge ia mbahas bukti-bukti si enggo erban enterem kalak tek maka Pencipta e lit? Adi nggit ia, gunakenlah bacan ras video si irancang khusus guna si e, bagi brosur Benarkah Kehidupan Diciptakan? ras Asal Mula Kehidupan—Lima Pertanyaan yang Patut Direnungkan. Gelah menukah ndaramisa, duana brosur enda enggo itamaken bas Alat-Alat Pengajarenta bas bahasa Indonesia.

Tangtangna, banci saja ragu kam mbahas Pustaka ras kalak si la tek maka Dibata e lit. Adi bage si gejapkenndu, pindolah penampat arah perberita si lebih erpengalamen. Selain si e, ingetlah maka banci sampati Jahwe kita gelah beritata banci kena ku pusuh kalak si nggit ngaloken kebenaren, amin pe tangtangna la ia tek Dibata e lit.—Perb 13:48.