“Tutuslah tena erdahin guna ncariken keperlunna, gelah lit bas ia si man berenken ku kalak si deban si merluken.”​—EPESUS 4:28.

Ate Penciptata rajin min kita erdahin. TehNa maka e banci erban kita ermeriah ukur. Engkai? Perban kalak si tutus atena erdahin banci cukupina keperlunna ras keluargana. Banci ka sampatina kalak si merluken. Selain si e, ergai bosna ka ia janah banci saja la ia ipecat arah dahinna. Emaka, mbue kel gunana adi rajin kita erdahin. Ikataken bas Kitap si Badia maka hasil kerja keras eme “pemere arah Dibata.”​—Pengerana 3:13.

“Tek kami maka jujur kap pusuh peraten kami, janah ersura-sura kami gelah jujur bas kai pe.”​—HEBER 13:18.

Adi jujur kita, merga siakap banta, dame pusuhta, janah reh tabehna siakap tunduh. Selain si e, kalak si deban pe tek man banta janah ergaina kita. Si e kerina la banci igejapken kalak si la jujur. Kalak si la jujur banci ka lalap salah kapna bana ras mbiar ia tereteh.

“Ula min kena mata duiten, puaslah kena man kai si lit.”​—HEBER 13:5.

Memang perlu kita sen guna nukur pangan ras keperlun si debanna. Tapi bahaya kel adi merangap nandangi sen. Kalak si “merangap nandangi sen” buen waktuna ras gegehna guna ndarami terbuen sen. Akibatna, banci ceda hubungenna ras keluargana ras banci ka ia sakit. (1 Timotius 6:9, 10) Selain si e, banci ka ia tergoda ngelakoken perbahanen si la jujur. Lit kata-kata si pentar ngataken, “Kalak si setia, melala pagi datna pasu-pasu, tapi kalak si meter atena bayak, pasti lakokenna kesalahen.”​—Kuan-kuanen 28:20.

“Jagalah kepentaren ras kengasupen rukurndu.”​—KUAN-KUANEN 3:21.

Pendidiken si mehuli banci nampati kita gelah jadi kalak si terteki ras jadi orang tua si mehuli. Tapi, pendidiken si mehuli labo lalap jadi jaminen maka pasti kita ermeriah ukur ras sukses. Adi berhasil ateta bas geluhta, perlu kita pendidiken si mehulina si rehna arah Dibata nari. Kalak si nggit iajari Dibata “berhasil me kerina si lakokenna.”​—Masmur 1:1-3.