“Dosa masuk ku doni arah sekalak manusia, dosa e maba kematen. Akibatna, kematen enggo ngelangketi kerina manusia.”​—ROMA 5:12.

Sanga ciptaken Dibata Adam ras Hawa eme dua jelma si pertama nggeluh i doni, ibereNa kalak e perukuren ras daging si sempurna. Ban Dibata ka kalak e tading bas Pardis i doni, bas taman si mejile si igelari Taman Eden. BerekenNa ka ipan kalak e kerina buah arah batang kayu si lit bas taman e, tapi lit sada batang kayu si la banci pan kalak e buahna. Sayang kel, ipilih Adam ras Hawa man buah arah batang kayu si ilarang e. Si ilakoken kalak e dosa. (Kejadin 2:15-17; 3:1-19) Perban kalak e la patuh, ipelawes Dibata kalak e arah Taman Eden nari. Kenca si e, susah me akap kalak e, anak-anakna pe susah akapna. Dungna kerina kalak e metua ras mate. (Kejadin 3:23; 5:5) Perban kita pe keturunen Adam ras Hawa, e me si erban kita sakit, metua, ras mate.

“Kerina doni enda lit bas kuasa si jahat.”​—1 JOHANES 5:19.

“Si jahat” maksudna Setan. Setan eme sada malekat si mberontak ngelawan Dibata. (Johanes 8:44; Ketangkasen 12:9) Dungna, malekat-malekat si deban pe mberontak ras ikutkenna Setan. Kalak e igelari malekat-malekat jahat. Ipake malekat-malekat jahat e gegehna  guna nipu jelma ras erban kalak e la patuh man Pencipta. Ipengaruhina ka enterem kalak gelah ngelakoken kai si jahat. (Masmur 106:35-38; 1 Timotius 4:1) Meriah akap Setan ras pengikutna erban jelma susah.

“Kai si isuan kalak, e ka si peranina.”​—GALATI 6:7.

Bas melala situasi, kerina kita susah perban kita enggo erdosa ras ipengaruhi doni si ikuasai Setan enda. Tapi, mon-mon kita nge si nambahi kesusahenta. Engkai maka bage ninta? Adi siban keputusen si salah ntah pe si la mehuli, biasana siperani hasil si la mehuli. Tapi, adi siban keputusen si mehuli, siperani me hasil si mehuli. Contohna, sekalak dilaki si jujur, rajin erdahin, ras keleng atena keluargana pasti iperanina melala hasil si mehuli janah banna keluargana ermeriah ukur. Tapi, kalak si perjudi, pemabuk, ntah pe perkisat ibanna me ia ras keluargana susah. Adi sibegiken Penciptata, kita jadi kalak si pentar perban ateNa siperani min melala hasil si mehuli termasuk ‘kedamen si mbelin kel.’​—Masmur 119:165.

‘Bas wari-wari pendungi manusia pagi engkelengi dirina saja, mata duiten, la patuh man orang tua, la kuasaina dirina, kasar, la tena ngena si mehuli.’​—2 TIMOTIUS 3:1-5.

Gundari, enterem kalak sipat-sipatna bali bagi si ikataken bas ayat e. Perbahanen kalak e pe jadi bukti maka kita enggo nggeluh bas “wari-wari pendungi.” Ikataken ka bas Kitap si Badia maka tanda wari-wari pendungi eme perang, kurang pangan, gempa, ras wabah penakit. (Matius 24:3, 7, 8; Lukas 21:10, 11) Enda kerina erban kesusahen ras kematen.