Nasehat gelah Banci Erdame ras Kalak si Deban
Ate Pencipta erdame min kita ras keluargata bage pe ras teman-temanta. Emaka bereNa kita nasehat si erguna kerna si e janah nasehat e enggo nampati enterem kalak. Mari siperdiateken piga-piga nasehatNa e.
Nggitlah Ngampuni
“Kena arus tetap sabar janah alu bulat ukur ampunilah sada ras si debanna.”—KOLOSE 3:13.
Kerina kita pernah erban salah. Banci saja sakit hati siban kalak, ntah kita si sakit hati ban kalak. Emaka kerina kita perlu ngampuni ras iampuni. Adi siampuni kalak, lanai ateta segat man bana. La ‘sibalas kejahaten alu kejahaten’ janah la siinget-inget lalap kesalahenna. (Roma 12:17) Tapi uga adi sakit hati kel kita janah mesera siakap ngelupaken salahna e? Adi bage si terjadi, manjar-anjarlah sicakapken ras ia. Tujunta gelah erdame, labo ndarami ise si salah ras ise si benar.—Roma 12:18.
Meteruk Ukurlah
“Alu meteruk ukur anggaplah kalak si deban ganjangen asangken kena.”—PILIPI 2:3.
Adi meteruk ukur kita, pasti siergai kalak si deban. Emaka meriah kap kalak ras kita. Teh kalak e maka pasti mehuli kita man bana, ermediate kita man bana, janah labo kita sengaja erban ia sakit hati. Tapi, adi ganjangen siakap kita asangken kalak si deban ntah pe bagi ukurta min ateta kerina, dungna banci kita lanai si tabehen janah turah me perubaten. Kisat me kalak ndeher ras kita janah sitik ngenca temanta, e pe adi lit ka.
Ula Erpilihen
“Dibata la erpilihen. Kerina kalak arah bangsa si apai pe, adi mbiar man Dibata janah ngelakoken kai si benar, pasti alokenNa.”—PERBAHANEN RASUL-RASUL 10:34, 35.
Labo ulin akap Penciptata piga-piga kalak asangken si debanna perban bangsana, bahasana, pendahinna, ntah pe warna kulitna. Sebap “ban Dibata kerina bangsa si ngiani doni enda arah sekalak jelma.” (Perbahanen Rasul-Rasul 17:26) E ertina, kerina kalak erturang ras ersenina. Adi siergai ras mehuli perbahanenta man kerina kalak, meriah siban ukur kalak e, kita pe reh riahna ukurta, janah meriah ka siban ukur Penciptata.
Jadilah Kalak si Lembut
‘Pakelah sipat si lembut.’—KOLOSE 3:12.
Adi lembut kita, meriah akap kalak ras kita. La kalak mbiar ngerana ras kita janah pang ia mpersingeti kita, perban tehna labo kita nukah tersinggung. Sanga merawa pe kalak man banta, adi tetap kita lembut, dungna banci ia tenang. Nina Kuan-kuanen 15:1, “Jawapen si lembut, erban pusuh lanai merawa, tapi ranan si kasar, banci erban merawa.”
Nggitlah Mere ras Meteh Ngata Bujur
“Riahen kap mere asangken ngalo.”—PERBAHANEN RASUL-RASUL 20:35.
Melala kalak gundari merangap janah mentingken bana. Akap kalak e bage me carana gelah ermeriah ukur. Tapi situhuna, kalak si nggit mere nge si banci tuhu-tuhu ermeriah ukur. (Lukas 6:38) Kalak si nggit mere ermeriah ukur perban kelengen atena jelma asangken barang. Kekelengen si bage me si ngiahken ia jadi kalak si bujur janah ncidahken pengergan man kalak si mere man bana. (Kolose 3:15) Cuba ukurindu: ‘Ras kalak si uga nge meriah kuakap erteman? Ras kalak si pelit ras la meteh ngata bujur nge? Ntah ras kalak si nggit mere ras meteh ngata bujur?’ Pelajarenna eme adi erteman atendu ras kalak si nggit mere ras meteh ngata bujur, kam pe arus jadi kalak si bage.—Matius 7:12.
Mungkin Menarik Ka Kapndu
PERDIATEKENLAH!
Doni si Dem Kesusahen—Reh Kompaknalah Kam ras Kalak si Keleng Atendu
Perdiatekenlah saran-saran si nampati kam gelah reh kompakna ras teman geluhndu, temanndu, ras anak-anakndu.
PERDIATEKENLAH!
Perasan Negatif man Kalak si Deban—Cidahkenlah Kekelengen
Adi sikelengi kalak si deban, banci lanai negatif perasanta bana. Perdiateken piga-piga carana.
