‘Perbulangen arus kelengina ndeharana bagi ia engkelengi dagingna. Kalak si engkelengi ndeharana engkelengi dirina kap, labo pernah lit kalak segat atena dagingna tapi berena man janah kelengina.’​—EPESUS 5:28, 29.

Perbulangen eme kepala bas keluarga. (Epesus 5:23) Tapi, perbulangen si mehuli la kasar ntah pe perate-ate. Ia si cari makan man keluargana. Lalap usahakenna erban meriah ukur ndeharana janah banna gelah gejapken ndeharana maka ia ikelengi. Ergaina ndeharana janah la paksakenna kerina bagi ukurna. (Pilipi 2:4) Terus terang ka ia nuriken ukurna man ndeharana, janah sanga ngerana ndeharana nggit ia megikenca. Labo ia merawa-rawa ntah pe “kasar” rananna ras perbahanenna man ndeharana.​—Kolose 3:19.

“Ndehara arus tuhu-tuhu mehamat man perbulangenna.”​—EPESUS 5:33.

Adi mehamat sekalak ndehara man perbulangenna janah idukungna keputusen perbulangenna, reh belinna me kedamen bas keluargana. Adi lit iban perbulangenna kesalahen, labo irendahkenna perbulangenna e, tapi tetap ia lembut ras mehamat. (1 Petrus 3:4) Sanga icakapkenna atena sada masalah ras perbulangenna, idaramina waktu si cocok janah cakapkenna alu mehuli.​—Pengerana 3:7.

“Sekalak dilaki . . . ersada ras diberuna, jenari jadi sada kalak e.”​—KEJADIN 2:24.

Sanga sekalak dilaki erjabu ras sekalak diberu, kalak e duana jadi sada keluarga janah hubungen kalak e seh kel deherna. Emaka gelah tetap paguh perjabunna, arus kalak e rusur ngerana-ngerana arah pusuh nari ras mperdiateken sada ras si debanna. Kalak e arus setia man teman geluhna, la ia selingkuh. Adi lit kalak si selingkuh, e banci erban ceda kel ukur teman geluhna. Perbahanen e banci erban perbulangen ras ndehara lanai siteken ras dungna banci sirang.​—Heber 13:4.

“Ajarkenlah kai si benar man anak si nguda denga, gelah enggo pe pagi ia metua, la ia nilah je nari.”​—KUAN-KUANEN 22:6.

Enggo ibereken Dibata tanggung jawap man orang tua guna ngajari anak-anakna. Enda termasuk ngajari kalak e gelah mehuli lagu langkahna janah orang tua arus jadi usihen si mehuli man anak-anakna. (Ulangen 6:6, 7) Orang tua si pentar, la lebihsa tanggapenna  sanga lit salah anakna. Orang tua arus “meter megiken, ula mis ngerana, janah ula mis merawa.” (Jakup 1:19) Adi perlu akap orang tua mpersingeti anakna, arus ilakokenna e alu cara si perkeleng labo merawa-rawa.

“O anak-anak, patuhlah man orang tua kena . . . ‘Hamatilah bapakndu ras mamakndu.’”​—EPESUS 6:1, 2.

Anak-anak arus patuh ras mehamat man orang tuana. Adi bage iban kalak e, reh tambahna me keriahen ukur bas keluargana, ikut ia erban keluargana dame, ras reh kompakna. Anak-anak si enggo dewasa mehamat man orang tuana alu ngurus keperlun kalak e. Enda termasuk njaga rumah orang tuana tetap sikap man inganen ntah pe mereken keperlun kalak e.​—1 Timotius 5:3, 4.