“Amin pe kalak jahat turah bagi dukut, janah kerina kalak si ngelakoken si jahat reh makmurna, dungna ikernepken pagi kalak e seh rasa lalap.”​—MASMUR 92:7.

Bagi si enggo sipelajari bas artikel sebelumna, kejahaten pasti lalap reh buena. Tapi labo kita sengget ngidah si e, perban enggo ikataken bas Kitap si Badia i 2 Timotius 3:1-5 maka bas “wari-wari pendungi” reh buena kejahaten. Wari-wari pendungi nandangi kai nge maksudna i je? Enda maksudna wari-wari pendungi nandangi kalak si la nggit patuh man Dibata. Lanai ndekah ikernepken Dibata me kerina kalak si la nggit robah. Kenca si e, kalak si mehuli eme kalak si patuh man Dibata ngenca pagi si tading i doni. Bagi si ikataken bas Kitap si Badia, “Kalak si benar pagi si ndatken doni, ringan ia i je seh rasa lalap.”​—Masmur 37:29.

“Dibata si mere kedamen, engkernepken Setan.”​—ROMA 16:20.

Adi enggo ikernepken pagi Setan, malekat-malekat si jahat, ras kerina si la mehuli, dame me doni enda. Bagenda janji Penciptata, ‘La pagi lit si erban kam mbiar.’​—Miha 4:4.

“Kemah Dibata lit i tengah-tengah manusia. . . . Apusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit.”​—KETANGKASEN 21:3, 4.

Lanai pagi lit kesusahen ras penakit, perban enggo ipehuli Dibata kerina si enggo ceda perban Setan, Adam, ras Hawa bage pe perban kita la sempurna. Dungna, ‘kematen pe lanai pagi lit.’ Kalak si keleng atena Pencipta ras si patuh man baNa nggeluh pagi rasa lalap. Tapi i ja pagi kalak e tading?

“Taneh mesawang ras taneh si gersang ermeriah ukur pagi, gurun pasir pe ermeriah ukur janah dem bunga-bunga.”​—JESAYA 35:1.

Kenca imasapken Dibata pagi kerina si la mehuli, jadi Pardis me doni enda! Mbue kel pagi taman si mejile ras mbue pangan. (Masmur 72:16) Kerina laut, danau-danau, ras lau si maler jadi bersih ras melala i je mahluk hidup. Lanai pagi siinget maka pernah lit polusi i doni enda. Ibangun kalak pagi rumahna janah ia si ngianisa. Lanai pagi lit kalak si la lit inganna tading. Lanai lit si kelihen ntah pe si mesera.​—Jesaya 65:21, 22.

“Lit pagi kekeken.”​—PERBAHANEN RASUL-RASUL 24:15.

Merhat nge kam jumpa mulihi ras kalak si keleng atendu si enggo mate? Kalak si enggo mate, ipegeluh Dibata pagi mulihi ntah pe ipekekeNa bas Pardis i doni. Tandaindu pagi kalak e janah kalak e pe tandaina kam. Cuba bayangken uga riahna pagi ukur kena. Engkai maka banci kita tek enda pasti terjadi? Perban lit contoh arah Kitap si Badia kerna kalak si enggo pernah ipekeke Dibata, lit si enggo dewasa, lit ka anak-anak, alu bage kalak e ersada mulihken ras keluargana. Selain si e, sanga ipekeke Jesus kalak si enggo mate, biasana enterem kalak si ngidahsa.​—Lukas 8:49-56; Johanes 11:11-14, 38-44.