Tapi sayang kel, anak-anak si rusur make perangkat elektronik, biasana . . .

• jadi candu make perangkat elektronikna.

• bully-na kalak ntah pe i-bully kalak ia bas Internet.

• reh nukahna idah kalak e pornografi amin pe la daramina.

KECANDUN

Piga-piga si banci ilakoken bas Internet bagi main game memang iban gelah candu kita. Menurut buku Reclaiming Conversation, “aplikasi si lit bas HP iban gelah lalap kita main HP.” Reh dekahna sigunaken aplikasi si lit iklanna, reh buena untung si idat pebisnis si erban iklan e.

CUBA UKURI: Lalap nge ate anakndu main perangkat elektronik? Uga carana gelah reh ulina kalak e nggunaken waktuna?​—EPESUS 5:15, 16.

SERANGEN ARAH INTERNET

Sanga nggunaken Internet, piga-piga kalak jadi kasar sipatna, ate-atena ngerana, janah la ukurina perasan kalak. Sipat-sipat enda banci erban kalak e jadi tukang bully.

Lit kalak si bage banna perban terkenal atena ras merhat ia iperdiateken kalak. Selain si e, lit ka kalak si i-bully kapna bana adi idahna postingen temanna si sangana pulung tapi la ia iajak.

CUBA UKURI: Kasar nge anakndu man kalak si deban sanga nggunaken Internet? (Epesus 4:31) Merawa nge ia sanga la nggit kalak erteman ras ia?

PORNOGRAFI

Nukah kel ngidah gambar ntah pe video porno bas Internet. Memang lit cara si banci igunaken orang tua guna mbatasi kai si inen anakna bas Internet, tapi tetap denga kalak e arus hati-hati.

Selain si e, kalak si ngirim pesan ntah pe kalak si ngaloken pesan si isina kerna pornografi banci ihukum. Kalak si ngelakoken perbahanen si bage ihukum perban ilanggarna kerna undang- undang pornografi anak, janah hukumenna sesuai ras undang-undang si lit ras sesuai umurna.

CUBA UKURI: Uga carana gelah anakndu la tergoda ngenen ras ngirim gambar si la mehuli bas Internet?​—EPESUS 5:3, 4.

AJARILAH ANAKNDU

Amin pe beluh anak-anak nggunaken perangkat elektronik, perlu denga kalak e iajari orang tuana. Nina bas sada buku Indistractable, anak si ibereken nggunaken HP ntah pe tablet sope lenga tehna cara nggunakenca alu mehuli “bali bagi mpediat anak-anak lompat ku kolam padahal lenga tehna erlangi. Enda seh kel bahayana.”

Banlah tandana saran si apai si atendu ikutkenndu ntah pe tulis saran si deban si ilakokenndu atendu.

• Kuajari anakku gelah la kasar bas Internet

• Kusampati anakku gelah ula sisada kapna bana

• Kubatasi kai si banci inen anakku bas Internet

• Ratur kuperiksa HP anakku

• Kutentuken asa kai dekahna anakku main perangkat elektronik bas sada wari

• La kupediat anakku main perangkat elektronik seh ngayak tengah berngi ntah pe adi la lit si ngawasisa

• Kuban peraturen la banci make perangkat elektronik sanga man ras-ras