Tapi, adi la kam hati-hati nggunaken perangkat elektronik, e banci . . .

• ngurangi waktundu ras teman geluhndu.

• erban kam tetap erdahin amin pe lanai bas waktuna.

• erban kam ras teman geluhndu lanai siteken janah banci ka lanai setia.

WAKTU

Nina Michael, “Mon-mon sanga aku ras diberuku, sisada kuakap bangku perban sibuk ia lalap ngenen HP-na. Rusur katakenna, ‘Ndai nari lenga lit kunen HP-ku lah.’” Sekalak perbulangen si gelarna Jonathan ncakapken kerna situasi si bage, nina, “Amin pe perbulangen ras ndehara sangana ras, kalak e tempa-tempa lit bas ingan si la seri.”

CUBA UKURI: Sanga ras teman geluhndu kam, rusur nge la perdiatekenndu ia ngerana perban lit telepon ntah pe pesan si masuk ku HP-ndu?​—EPESUS 5:33.

DAHIN

Lit dahin si erban sekalak jelma arus banci lalap ihubungi ntah pe arus banci lalap ibalasna e-mail amin pe enggo mulih ia ku rumah. Lit ka pendahin si la bage, tapi mon-mon arus denga ia tetap erdahin amin pe enggo dung jam erdahin. Sekalak perbulangen si gelarna Lee ngataken, “Amin pe aku sangana ras diberuku, mesera kuakap la ngenen pesan ntah pe telepon si masuk ku HP-ku si rehna arah ingan dahinku.” Selain si e, sekalak ndehara si gelarna Joy ngataken, “Perban aku erdahin arah rumah nari, la kugejap enggo dekahen aku erdahin. Mesera kel kuakap mbagi waktuku man keluargaku bage pe pendahinku.”

CUBA UKURI: Sanga teman geluhndu ngerana, tuhu-tuhu nge begikenndu ia?​—LUKAS 8:18.

KESETIAN

Menurut sada survei, enterem perbulangen ras ndehara rubati perban curiga nandangi postingen teman geluhna bas media sosial. Lit ka si ngakui maka la atena iteh teman geluhna kerna postingenna e.

E me sebapna enterem si ngataken maka media sosial e bagi “racun bas perjabun.” Media sosial pe banci erban kalak dungna selingkuh. Emaka wajar nge enterem pengacara si ngataken maka media sosial eme salah sada si erban melala kalak si cerai.

CUBA UKURI: Erbuni-buni nge kam ngerana ras kalak si labo teman geluhndu?​—KUAN-KUANEN 4:23.

UTAMAKENLAH KAI SI LEBIH PENTING

Kalak si rusur la sempat man, banci dungna lit masalah kesehatenna. Bage ka pe, kalak si rusur la sempat ngerana ras teman geluhna, banci dungna lit rusur masalah bas perjabunna.​—Epesus 5:28, 29.

Bahaslah ras teman geluhndu saran-saran si lit i teruh enda. Kenca si e, pilih si apai ate kena si ilakoken kena. Ntah tulis saran si deban si lakoken kena ate kena gelah la ceda perjabun kena perban perangkat elektronik.

• Silang-langna sekali sada wari ras-ras man

• Tetapken waktuna ndigan la nggunaken perangkat elektronik

• Ban rencana ngelakoken sada kegiaten dua-dua saja

• Bas berngi wari, mateken perangkat elektronik janah ula ban ndeher ras ingan medem

• Silang-langna 15 menit tiap wari, ngerana ras teman geluhku janah la iganggu perangkat elektronik

• Tiap wari tetapken ndigan waktuna la nggunaken Internet