Kai Pengaruh Perangkat Elektronik man Perukurenndu?
Perlu kita terus erlajar gelah berhasil bas sekolah, bas ingan erdahin, ntah pe si debanna. Gundari nukah siakap ndatken informasi perban lit perangkat elektronik janah la perlu kita ndarat rumah nari. Kundul-kundul saja pe kita rumah, enggo banci sidat informasi.
Tapi, kalak si rusursa make perangkat elektronik biasana . . .
-
mesera kapna konsentrasi sanga mbaca.
-
mesera ia fokus ndahiken dahinna.
-
meter ia bosan sanga sisada.
SI PERLU TEHNDU
SANGA MBACA
Kalak si rusur make perangkat elektronik, biasana kurang sabar ia mbaca sada artikel ntah pe buku bas perangkat elektronik. Emaka, meter kel ia mbaca gelah mis datna intina arah kai si bacana e.
Memang, adi terjeng ndarami sada informasi saja ateta, erguna nge adi meter kita mbaca. Tapi, adi tuhu-tuhu ateta ngangkai kerna sada topik, la banci metersa kita mbaca.
CUBA UKURI: Sanga kubaca sada artikel si gedang, asa nge buena informasi si kudat? Kai nge gunana adi la metersa aku mbaca?—KUAN-KUANEN 18:15.
FOKUS
Lit si erpengakap maka perban enggo lit perangkat elektronik, banci lakokenna piga-piga dahin sekaligus (multitasking), contohna erlajar janahna ngirim pesan. Tapi situhuna, e erban kalak e la fokus. Akibatna, banci saja la mehuli hasilna duana dahin si lakokenna e, apai ka adi dahinna e perlu konsentrasi sanga ngelakokenca.
Memang perlu usaha gelah banci tetap fokus ntah pe konsentrasi. Tapi, e erguna kel. Sekalak remaja si gelarna Grace ngataken, “Menurutku, ulin adi sidahiken dahinta sada per sada asangken sekaligus. Sebap adi bage siban, la mbue siban kesalahen ras la kita stressa.”
CUBA UKURI: Mesera nge kapndu fokus perban perangkat elektronik, janah nukah nge kam lupa man kai si enggo pelajarindu?—KUAN-KUANEN 17:24.
SANGA SISADA
Lit kalak si la kapna meriah sisada, emaka pakena perangkat elektronik gelah la ia bosan. Bagenda nina Olivia, “Mis aku bosan adi 15 menit saja la kunen HP-ku, tabletku, ntah pe nonton TV.”
Situhuna, la soal asa kai pe umurta, perlu waktu sisada gelah banci siukuri alu mbages kai si sangana si pelajari.
CUBA UKURI: Sanga sisada aku, kupake nge waktuku e guna rukur?—1 TIMOTIUS 4:15.
SI BANCI LAKOKENNDU
PEREKSA CARANDU MAKE PERANGKAT ELEKTRONIK
Uga carana gelah perangkat elektronik banci nampati kam gelah reh ulina kengasupen rukurndu? Kai si banci lakokenndu gelah perangkat elektronik la ncedai kengasupenndu guna konsentrasi ras erlajar?
NINA PUSTAKA: “Jagalah kepentaren ras kengasupen rukurndu.”—KUAN-KUANEN 3:21.
