Kai Pengaruh Perangkat Elektronik man Hubungenndu ras Temanndu?
Pasti ngata bujur kel kita perban gundari enggo banci kita ngirim pesan, e-mail, video call, ras lit ka media sosial. Gundari dua kalak si inganna beda pe enggo gampang komunikasi. Igunaken kalak e perangkat elektronik alu mehuli.
Tapi, lit kalak si perangkat elektronik ngenca ipakena guna komunikasi ras temanna. Kalak si bage, biasana . . .
-
la angkana uga perasan temanna.
-
melungen kapna janah sisada akapna bana.
-
egois sipatna.
SI PERLU TEHNDU
SEPENGGEJAPEN
Perlu waktu ras kesabaren gelah banci siangkai uga perasan kalak. Mesera siakap ngelakoken si e adi sibuk kita mbaca pesan bage pe ngenen media sosial.
Adi mbuesa pesan si masuk, banci saja mesera kapndu mbalas pesan arah temanndu, dungna gelah enggo balasndu saja kerina pesan e. Lanai tehndu si apai si penting janah lanai tehndu lit kepe temanndu si merluken penampat.
CUBA UKURI: Sanga pakendu perangkat elektronik ngerana-ngerana ras temanndu, kai buktina “sepenggejapen” kam ras ia?—1 PETRUS 3:8.
PERASAN MELUNGEN
Piga-piga peneliti erban survei maka enterem kalak la meriah ukurna kenca inenna media sosial. Iban peneliti e kesimpulen maka adi sekalak jelma ngenen gambar-gambar ntah pe postingen kalak, situhuna e erban “melungen kapna ras lanai kapna erguna geluhna.”
Selain si e, adi rusur nenndu postingen kalak bas media sosial, e banci mpengaruhi perasanndu. Akibatna, perban meriah lalap idahndu kegeluhen kalak bas media sosial, dungna lanai akapndu meriah geluhndu.
CUBA UKURI: Sanga gunakenndu media sosial, uga carana gelah la bandingkenndu kam ras kalak si deban?—GALATI 6:4.
SIPAT EGOIS
Lit sekalak guru si perdiatekenna maka piga-piga muridna nggit erteman ras kalak si banci nguntungken ia ngenca. * Emaka, lit kalak si anggapna temanna e bali bagi aplikasi. Adi perlu ia bukana janah adi la ia perlu tutupna.
CUBA UKURI: Arah postingenku, kalak si nggit ersaing ntah mentingken bana nge aku teridah?—GALATI 5:26.
SI BANCI LAKOKENNDU
UKURI CARANDU NGGUNAKEN PERANGKAT ELEKTRONIK
Adi benar carandu nggunaken perangkat elektronik, e banci nampati kam gelah lancar komunikasi ras teman-temanndu. Banci ka erban kam reh kompakna ras kalak e.
NINA PUSTAKA: “Kekelengen . . . la mentingken bana.”—1 KORINTI 13:4, 5.
Ban tandana saran si apai saja si ikutkenndu atendu, ntah pe saran si deban si lakokenndu atendu.
-
Asangken ngirim pesan singkat ntah pe e-mail, rusurenlah kam langsung ngerana
-
Sanga ngerana-ngerana, simpanlah HP-ndu (ban la lit sorana)
-
Ula rusursa inenndu media sosial
-
Nggitlah kam megiken
-
Hubungi temanndu si sangana susah
^ par. 17 Enda ibuat arah buku Reclaiming Conversation.
