Injil Lukas nuratken maka Jesus mbuka gulungen Jesaya, iogena, janah igulungna mulihi. I bas pendungi Injilna, Johanes pe nuratken maka la siat gulungenna adi isuratkenna kerina perbahanen Jesus.​—Lukas 4:16-20; Johanes 20:30; 21:25.

Uga gulungen enda ibahan? Sada lembaren si gedang ntah pe gulungen ibahan i bas kulit, perkamen, ntah pe papirus si ipersada. Kenca e, lembaren si gedang e igulung alu sada batang tongkat janah tulisenna lit arah bas. Isina itulisken i bas bentuk kolom-kolom si gendek arah das nari ku teruh gulungen e. Adi gedang gulungenna, gulungen e ipersada alu dua batang tongkat. Singoge mbuka gulungen e alu dua tan guna ndatken ayat si idaramina.

The Anchor Bible Dictionary nuratken, ”sada gulungen si cukup gedang (biasana kira-kira 10 meter) banci siat sada kitap, ras si mejilena kitik ukurenna adi itutup.” Misalna, iperluken gulungen kira-kira siwah setengah meter guna nuratken Injil Lukas. Maun-maun, bagin das ras teruh gulungen ikeret, iperhalus alu batu apung, ras ibere warna.

Mulai kenca terbentukna keimamen kalak Israel, sada ngenca dilaki si itangkuhken jadi Imam si Mbelin janah penangkuhen enda berlaku asa umur geluhna. (Bilangen 35:25) Harun si pemena si ndatken jabaten enda. Keduduken si istimewa enda biasana isusurken bapana ku anakna sintua. (Keluaren 29:9) Nterem dilaki i bas kesusuren Harun si ngelayani jadi imam, tapi sitik ngenca si jadi Imam si Mbelin.

Paksa Israel ikuasai bangsa asing, penguasa si labo kalak Israel ate-atena saja nangkuhken janah mpengadi Imam si Mbelin kalak Jahudi. Kalak si mbaru itangkuhken enda megati ipilih i bas keluarga si terhormat nari janah teremen i bas kesusuren Harun. Istilah ”imam-imam si mbelin” alu jelas ngertiken kalak si ihamati i bas keimamen. Banci saja si termasuk i bas kalak enda eme kepala-kepala i bas 24 regu imam, kalak si penting i bas keluarga Imam si Mbelin, bage pe mantan Imam si Mbelin si ipengadi, contohna Hanas.—1 Kronika 24:1-19; Matius 2:4; Markus 8:31; Perbahanen Rasul-rasul 4:6, NW.