TIAP tahun, lebih enem juta kalak lawes ku kerangen aras si mesuni i Semenanjung Shima i Jepang. Kalak enda ndahi Kuil Agung Ise, guna nembah dewi matawari Shinto si gelarna, Amaterasu Omikami. Si nggo isembah kira-kira dua ribu tahun dekahna. Kalak si reh tangtangna mbersihken dirina alu mburihi tan ras babahna. Kenca si e, kalak enda tedis i lebe-lebe kuil guna ngelakoken ritual si ibenai alu mungkuk, ertepuk tan, kenca si e ertoto man dewi. * Kalak si eragama Shinto niijinken lit agamana si deban. Janah, piga-piga pengikut agama Budha, kalak si ngaku Kristen, bage pe pengikut agama si deban labo masalah iakapna ngelakoken ritual agama Shinto i bas ingan badia e.

Melala agama si terkenal i doni enda lit ingan-ingan si badiana, * janah jutan kalak reh ku je. I negeri-negeri si rayatna ngaku Kristen, melala gereja ras ingan badia si ibahan khusus guna Jesus, Maria, ras santo-santo. Ingan badia si deban si bali bagi e, ipajekken bas ingan si nina kalak ingan terjadina kejadin-kejadin si lit i bas Pustaka si Badia ntah pe ”mukjizat” jaman modern. Ingan e pe ipajekken i bas ingan-ingan penimpanen barang-barang si badia i bas jaman si nai. Nterem kalak lawes ku ingan si badia e erkiteken tek ia maka pertotonna banci lebih ibegiken adi ia ertoto i je. Si debanna jiarah ku je guna mbuktiken kinitekenna.

Payo nge lebih ibegiken janah ijabap Dibata pertotonta adi kita ertoto i bas ingan si badia? Meriah nge ukur Dibata nandangi kalak si jiarah ku ingan si badia? Intina, perlu nge kalak Kristen nembah Dibata i bas ingan-ingan si badia? Adi sieteh jabapen i bas penungkunen-penungkunen e, banci sieteh ibadat si uga kin si erban meriah ukur Dibata.

I bas percakapen Jesus ras diberu Samaria, banci sieteh uga pandangen Dibata nandangi ibadat i ingan si badia. Paksa si e, Jesus sangana erdalan mentasi Samaria, kenca e ngadi ia i tepi sumur deher kota Sihar. Kenca e, reh sekalak diberu ku sumur e guna muat lau ras iperkuanken Jesus ia. Kalak enda ngerana-ngerana, jenari ikataken diberu e maka seh kal bedana agama kalak Jahudi ras agama kalak Samaria. Nina diberu e, ”Nini-nini kami i das uruk ah nembah Dibata, tapi nini kalak Jahudi i Jerusalem me inganna ersembah man Dibata.”​—Johanes 4:5-9, 20.

 Uruk si ikataken diberu e maksudna Deleng Gerisim, si letakna kira-kira 50 kilometer i sebelah utara Jerusalem. Pernah ipajekken kalak Samaria rumah pertoton i je guna ngerayaken perayan, contohna Paskah. Tapi, la ibahas Jesus perbedan si lit i bas kalak e. Nina, ”O bibi, teklah kam man bangku. Reh me pagi paksana maka lanai kalak i deleng ah nembah Dibata bage pe lanai i Jerusalem.” (Johanes 4:21) Jabapen Jesus pasti erban ia mamang, terlebih ka kalak Jahudi si ngatakenca! Engkai maka lanai pagi lit ibadat i bas rumah pertoton i Jerusalem?

Nina Jesus ka, ”Reh me paksana, janah situhuna enggo seh pe, i ja arah kesah si badia manusia ersembah man Dibata alu payo.” (Johanes 4:23) I bas abad ku abad, kalak Jahudi erpengakap maka rumah pertoton si mejile i Jerusalem eme pusat ibadat kalak e. Kalak enda lawes ku je telu kali setahun guna mereken persembahen man Dibatana, Jahwe. (Keluaren 23:14-17) Tapi ikataken Jesus maka nandangi berubah me si e kerina janah ”manusia” kari nembah Dibata ’arah kesah si badia ras alu payo’.

Rumah pertoton kalak Jahudi eme bangunen nyata si banci niidah. Tapi, nembah Dibata arah kesah si badia ras alu payo la banci niidah janah labo i bas ingan-ingan tertentu saja. Jadi, ijelasken Jesus maka ibadat kalak Kristen si tuhu-tuhu la perlu ilakoken i bas ingan tertentu saja, ntah i Deleng Gerisim, i bas rumah pertoton i Jerusalem, ntah pe i bas ingan badia si debanna.

Sanga ngerana ras diberu Samaria, Jesus pe ngataken maka ”reh me paksana” perubahen i bas ibadat man Dibata. Ndigan? Enda terjadi paksa Jesus mate janah ndungi sistem ibadat kalak Jahudi si erpalasken undang-undang Musa. (Roma 10:4) Tapi ikataken Jesus ka maka paksana ”enggo seh.” Engkai? Erkiteken selaku Mesias, nggo ipepulungna ajar-ajarna si patuh man perentah enda, ”Dibata kesah kap, e maka arah kesah e ngenca maka banci manusia nembah Dibata alu payo.” (Johanes 4:24) Tapi kai ertina nembah Dibata arah kesah ras alu payo?

Paksa ikataken Jesus nembah Dibata arah kesah, maksudna eme nembah Dibata alu bimbingen kesah si badia, salah sada fungsina eme guna nampati kita ngangkai Pustaka si Badia. (1 Korinti 2:9-12) Janah si imaksudken Jesus nembah Dibata alu payo eme pemeteh si tepat dingen jelas kerna  ajaren Pustaka si Badia. Jadi, ibadatta banci erban meriah ukur Dibata adi sentudu ras ajaren Pustaka si Badia ras ibimbing kesah si badia, labo erkiteken ilakoken i bas ingan tertentu.

Jadi, uga arusna pandangen kalak Kristen nandangi ingan-ingan si badia? Siinget kata–kata Jesus maka Dibata arus isembah arah kesah ras alu payo. Jadi i lebe-lebe Dibata, la lit istimewana ibadat si ilakoken i ingan si badia. Janah, Pustaka si Badia pe mpebetehken man banta maka nembeh ate Dibata nandangi penembahen berhala. Nina Pustaka si Badia, ”Kiamkenlah, ola kal sembah berhala-berhala” janah ”jagai dirindu i bas dibata-dibata si perguak nari!” (1 Korinti 10:14; 1 Johanes 5:21) Emaka, kalak Kristen la nggit nembah Dibata i bas ingan khusus si iakap kalak badia ntah pe si lit hubungenna ras penembahen berhala.

Tapi, enda labo ertina Pustaka si Badia ngelarang kita ertoto, erlajar, ntah pe erban perenungen i bas sada ingan tertentu. Kita banci pulung guna erlajar janah mbahas hal-hal rohani i bas ingan si metungung dingen ratur. Labo ka salah adi siinget ateta kalak si nggo mate alu erban batu nisan. Mungkin enda caranta nginget kalak si nggo mate janah bukti maka keleng ateta ia. Tapi, adi sianggap ingan e jadi ingan si badia ntah pe ingan guna nembah berhala, enda ertina kita la patuh nandangi kata-kata Jesus.

Jadi, labo kam perlu lawes ku ingan badia gelah pertotonndu lebih ibegiken Dibata. Ia pe la senang adi kam lawes jiarah ku ingan si badia. Pustaka si Badia ngataken maka Dibata Jahwe, ”Tuhan si engkuasai langit ras doni. Janah Ia labo ringan i bas ingan sembah-sembahen si ibahan manusia.” Tapi, kita banci tetap rembak ras Dibata. I japa pe banci kita ertoto man Dibata janah banci ibegikenNa pertotonta erkiteken Ia ”labo ndauh i bas kita nari sekalak-sekalak.”​—Perbahanen Rasul-rasul 17:24-27.