PEMBAHASEN UTAMA | ENGKAI JESUS NGENANAMI KINISERAN RAS MATE?
Tuhu-Tuhu kin Enda Terjadi?
I bas musim semi tahun 33 M, Jesus kalak Nasaret iukum mate. Ituduh kalak ia nggo nesatken nterem jelma, ia ipekpeki alu kejam janah ipakuken i bas sada tiang. Mesui kal perpatena. Tapi, dungna Dibata mpekeke ia, janah 40 wari kenca si e, Jesus nangkih ku surga.
Kejadin si luar biasa enda isuratken i bas empat injil Kitap Junani Kristen, si biasana igelari Padan si Mbaru. Tuhu-tuhu kin enda terjadi? Penungkunen enda seh kal pentingna. Erkiteken adi kejadin enda labo tuhu-tuhu terjadi, sia-sia me kiniteken kalak Kristen janah arapen guna nggeluh si rasa lalap i Pardis terjeng nipi ngenca. (1 Korinti 15:14) Sebalikna, adi kejadin e tuhu-tuhu terjadi, enda ertina lit masa depan si mehuli man manusia, janah si enda perlu ituriken. Emaka, tuhu kin cataten injil e fakta ntah khayalen ngenca?
KENYATANNA
Cataten Injil labo dongeng. Cataten e tepat dingen jelas. Misalna, i bas Injil, melala gelar kuta si tuhu-tuhu lit janah banci denga idahi gundari. Lit ka cataten kerna tokoh sejarah, janah fakta enda idukung ahli-ahli sejarah.—Lukas 3:1, 2, 23.
Penulis-penulis i bas abad pemena ras si peduaken pe nuratken kerna Jesus. * Proses kematen Jesus si isuratken i bas Injil, sentudu ras cara kalak Romawi mereken ukumen kematen paksa si e. Selain si e, kejadin-kejadin si isuratken sentudu ras fakta janah terus terang. I bas Injil pe isuratken kerna perbahanen ajar-ajar Jesus si la mehuli. (Matius 26:56; Lukas 22:24-26; Johanes 18:10, 11) Kerina fakta enda mbuktiken alu tangkas maka cataten penulis-penulis Injil kerna Jesus terus terang, tepat dingen jelas.
TUHU-TUHU NGE JESUS IPEKEKE?
Enterem kalak tek maka Jesus pernah nggeluh, kenca e mate. Tapi, lit si ragu nandangi kinikekenna. Tangtangna ajar-ajar Jesus pe la tek paksa ibegina kerna kinikeken Jesus. (Lukas 24:11) Tapi, paksa piga-piga kali kalak enda ngidah Jesus bas peristiwa si berbeda, dungna kalak enda lanai ragu. I bas sada peristiwa, lebih 500 saksi mata ngidah Jesus si nggo ipekeke.—1 Korinti 15:6.
Ajar-ajar Jesus la mbiar nuriken kerna kinikeken Jesus, amin gia kalak enda banci saja itangkap janah ibunuh. Janah iturikenna ka si e man kalak si ngukum Jesus. (Perbahanen Rasul-rasul 4:1-3, 10, 19, 20; 5:27-32) Banci kin kalak enda pang nurikenca adi ia saja pe la tek maka Jesus e nggo ipekeke? Kenyatanna, kinikeken Jesus me si erbahan Kekristenen berkembang i bas paksa si e bage pe gundari.
Jelas me, cataten Injil kerna kematen ras kinikeken Jesus cataten sejarah si banci iteki. Alu mpelajarisa, banci kam tek maka peristiwa-peristiwa e tuhu-tuhu terjadi. Janah, adi iangkaindu alasenna ngkai maka kerina enda arus terjadi, banci kam reh tekna. Si enda ibahas i bas artikel selanjutna.
^ par. 7 Misalna, Tacitus, si tubuh kira-kira tahun 55 M. Isuratkenna maka ”Kristus, asal mula gelar [Kristen], ngenanami kiniseran si mesangat i bas pemerentahen Tiberius i bas tan salah sada pejabat Romawi, Pontius Pilatus”. Kisah Jesus pe ituriken Suetonius (abad si pemena), sejarawan Jahudi Yosefus (abad si pemena); bage pe Plinius Nguda, gubernur Bitinia (awal abad peduaken).
