1. Tangtangna nari, kai si jadi ciri utama cara Dibata erdahin?

JAHWE ras Jesus lalap ras-ras erdahin mulai kenca Dibata nepa si nasa lit. Jesus tinepa Jahwe si pemena. Kenca si e, Jesus erdahin ras Bapana janah ia ”lit i deherNa desken sekalak anak buah ateNa.” (Kua. 8:30) Juak-juak Jahwe pe radu ras erdahin i bas ndalanken dahinna. Contohna, Nuah radu ras keluargana erbahan kapal. Kenca si e, kalak Israel ras-ras erdahin guna majekken tabernakel, mbongkarsa, janah mindah-mindahkenca. I bas rumah pertoton, kalak enda ras-ras rende janah mainken musik si mejile guna muji Jahwe. Umat Jahwe ngasup ngelakoken kerina dahin enda erkiteken kalak enda radu ras erdahin.​—Kej. 6:14-16, 22; Bil. 4:4-32; 1 Kro. 25:1-8.

2. (a) Usihen kai si itadingken runggun Kristen i bas abad si pemena? (b) Penungkunen kai si man bahasenta?

² Kalak Kristen i bas abad si pemena pe radu ras erdahin. Rasul Paulus njelasken maka amin gia la seri kengasupen ras tugas kalak e, tapi kalak enda ersada. Iikutkenna Jesus Kristus, peminpinna. Ipeseri Paulus kalak enda bagi sada  kula si ringringna radu ras erdahin. (Oge 1 Korinti 12:4-6, 12.) Tapi uga kita gundari? Uga kita banci radu ras erdahin i bas erberita si meriah, i bas runggun, bage pe i bas keluarganta?

3. Pengenehenen kai si idatken rasul Johanes?

³ I bas abad si pemena, rasul Johanes ndatken sada pengenehenen kerna pitu malekat si ngembus terompet. Paksa iembus malekat si pelimaken terompetna, iidah Johanes ”sada bintang si enggo ndabuh i langit nari ku doni.” Man bana ibereken sada kunci guna nalangi embang si la tersibar bagesna jenari erdipul cimber i bas nari. Janah rehen labang i bas cimber e nari. La icedaken labang e batang kayu ntah pe sinuan-sinuan, tapi si icedakenna ”manusia si la lit meterai i bas perdempakenna.” (Ket. 9:1-4) Ieteh Johanes maka sada terpuk labang banci erban kecedan si mesangat. Enda pernah terjadi i Mesir bas jaman Musa. (Kel. 10:12-15) Labang si niidah Johanes ngelambangken kalak Kristen si iminaki si mbarken berita penghakimen man agama palsu. Janah, jutan kalak si erpengarapen nggeluh i doni nggabungken diri ras kalak enda. Alu ras-ras, kalak enda ipersadaken i bas dahin erberita enda. Hasilna, melala jelma nadingken agama palsu janah ibebasken i bas pengaruh Setan nari.

4. Kai tugas umat Jahwe gundari, janah kai sada-sadana cara gelah banci ngelakokenca?

⁴ Kita itugasken guna mbarken ”berita si meriah” ku sebelang doni sope reh kedungen e. Enda sada dahin si seh kal belinna! (Mat. 24:14; 28:19, 20) Arus siundang kerina kalak si ”muas” guna minem ”lau kegeluhen”. Ertina, perlu siajarken kebenaren Pustaka si Badia man kerina kalak si nggit metehsa. (Ket. 22:17) Tapi si enda banci silakoken adi kita ”irakut” dingen ipersada janah radu ras erdahin bas runggun.​—Ep. 4:16.

5, 6. Uga persadanta teridah i bas dahin erberita?

⁵ Gelah banci sijumpai nterem jelma, arus lit pengaturen si mehuli i bas erberita. Kita banci ersada ngelakokenca erkiteken ndatken petunjuk bas runggun. Kenca siikuti perjumpan lako erberita, kita lawes guna nuriken berita si meriah. Sibereken ka publikasi kerna Pustaka si Badia. Situhuna, nggo jutan publikasi sibereken man kalak si deban i belang-belang doni. Maun-maun kita ipindo ikut erberita i bas kampanye khusus. Alu ikut i bas dahin e, kita ipersada ras jutan kalak si deban i belang-belang doni si sangana mberitaken berita si seri! Kita pe erdahin ras malekat, si nampati umat Dibata erberita.

⁶ Pasti meriah ukurta ngoge hasil dahin erberita si meriah i belang-belang doni i bas buku Tahunan. (Lenga lit i bas cakap Karo.) Selain si e, kita ersada ras turang seninanta i sebelang doni paksa sibereken undangen man kalak gelah reh ku kebaktinta. I je, kerina kita megiken informasi si seri. Khotbah, drama, bage pe pertunjuken si ngiahken kita guna mereken kai si mehulina man Jahwe. Kita pe ipersada ras turang seninanta i belang-belang doni paksa reh ku acara Peringeten tiap tahun. (1 Kor. 11:23-26) Ras kita  pulung bas tanggal si seri, 14 Nisan, kenca sundut matawari guna ncidahken pengerganta man Jahwe ras guna matuhi perentah Jesus. I bas minggu-minggu sope Peringeten, radu ras erdahin kita guna ngundang nterem jelma gelah reh ku acara si penting enda.

7. Kai hasilna adi radu ras kita erdahin?

⁷ Sada labang la mbelin pengaruhna. Bage ka pe, adi kita sisada la kita banci erberita man kerina jelma. Tapi erkiteken radu ras erdahin, ngasup kita nuriken man jutan jelma kerna Jahwe gelah iergaina janah ihamatina Ia.

8, 9. (a) Gambaren kai si ibereken Paulus guna ngajar kalak Kristen gelah tetap ersada? (b) Uga kita banci radu ras erdahin i bas runggun?

⁸ Ijelasken Paulus man kalak Epesus uga carana runggun iaturken. Janah ikatakenna ka maka kerina kalak i bas runggun perlu ”reh belinna.” (Oge Epesus 4:15, 16.) Paulus mereken contoh kula guna njelasken maka kerina kalak Kristen banci nampati runggun gelah tetap ersada janah ngikuti Jesus, Peminpin runggun. Ikatakenna maka ”kerina ringring e iranggut dingen ipersada alu penampat urat si lit i bas ringring e.” Emaka, kai si arus si lakoken, kerina kita si metua ntah pe si nguda, sehat ntah pe si sakit?

⁹ Jesus nangkuhken pertua guna ngaturken runggun, janah atena gelah siergai kalak e ras siikuti petunjuk si iberekenna man banta. (Heb. 13:7, 17) Labo lalap menukah ndalankenca. Tapi banci sipindo penampat Jahwe. KesahNa si badia banci nampati kita guna patuh man kerina petunjuk si ibereken pertua. Ukuri ka kai gunana man runggun adi kita meteruk rukur janah radu ras erdahin ras pertua. Runggunta banci ersada, janah kekelengenta reh paguhna sada ras si debanna.

10. Uga sinampati perpulungen nampati runggun gelah ersada?

¹⁰ Sinampati perpulungen pe ikut nampati runggun tetap ersada. Kalak e erdahin alu tutus nampati pertua. Contohna, ipastikenna gelah cukup publikasi guna pelayanen, janah ialo-alona kalak si reh ku perpulungen. Kalak enda pe tutus erdahin guna mpesikap Bale Kinirajan janah njagasa tetap bersih. Emaka ngata bujur kal kita nandangi kai si nggo ilakokenna. Adi radu ras kita erdahin ras kalak enda, banci kita ersada janah ngelayani Jahwe alu cara si ratur.​—Bandingken Perbahanen 6:3-6.

11. Kai si banci ilakoken kalak si nguda denga i bas nampati runggun gelah ersada?

¹¹ Melala pertua si nggo ertahun-tahun tutus erdahin guna runggun. Tapi erkiteken nggo reh tuana, kalak enda mungkin lanai banci erdahin bagi si mbarenda. Turang senina si nguda denga banci nampati. Adi ilatih, banci idalankenna lebih mbue tanggung jabap i bas runggun. Janah adi sinampati perpulungen e tutus erdahin, dungna kalak enda banci jadi pertua. (1 Tim. 3:1, 10) Lit piga-piga pertua si nguda denga si erbahan lebih mbue kemajun. Gundari ia ngelayani jadi pertua keliling janah nampati turang senina i bas melala runggun. Ngata bujur kita erkiteken turang seninanta si nguda denga rela ngelayani.​—Oge Masmur 110:3; Pengerana 12:1.

12, 13. Kai si banci nampati kerina anggota keluarga gelah radu ras erdahin?

¹² Uga kita banci nampati anggota keluarganta gelah radu ras erdahin? Salah sada carana eme arah kebaktin jabu tiap minggu. Adi orang tua ras anak-anak erlajar ras-ras kerna Jahwe, kekelengen sapih-sapih ia reh paguhna. I bas kebaktin jabu, kalak enda banci erbahan latihen guna erberita si erbahanca kalak enda banci lebih siap. I bas acara e, kalak enda pe banci megiken tep-tep anggota keluarga ncakapken Pustaka si Badia janah ngidah maka kerina anggota keluarga ngkelengi Jahwe janah ersura-sura erban meriah ukurNa. Ulihna, kalak enda reh rembakna.

¹³ Uga perbulangen ras ndehara banci radu ras erdahin? (Mat. 19:6) Adi kalak e duana ngkelengi Jahwe janah radu ras ngelayani Ia, kalak e banci ermeriah ukur janah kompak. Kalak enda pe perlu ncidahken kekelengen sapih-sapih ia, bagi si ilakoken Abraham ras Sara, Isak ras Ribka, bage pe Elkana ras Hanna. (Kej. 26:8; 1 Sam. 1:5, 8; 1 Pet. 3:5, 6) Hasilna, perbulangen ras ndehara banci ersada janah reh rembakna ras Jahwe.​—Oge Pengerana 4:12.

14. Adi teman geluhndu la ngelayani Jahwe, kai si banci ilakokenndu gelah perjabunndu tetap paguh?

¹⁴ Pustaka si Badia alu tangkas ngelarang kita erjabu ras kalak si la ngelayani Jahwe. (2 Kor. 6:14) Tapi, lit turang seninanta si teman geluhna labo Saksi Jahwe. Lit si ndatken kebenaren kenca ia erjabu, janah teman geluhna la nggit jadi Saksi. Si debanna erjabu ras umat Dibata, tapi dungna teman geluhna nadingken runggun. Amin gia bage, iusahaken turang seninanta e asa ngasupna njaga perjabunna tetap paguh alu ngikuti pedah Pustaka si Badia. Enda labo lalap menukah. Misalna, Mary ras perbulangenna, David, ngelayani Jahwe. Tapi dungna, David lanai reh pulung. Tapi tetap iusahakenna Mary gelah jadi ndehara si mehuli. Janah ncidahken sifat Kristen. Iajarkenna ka enemna anakna kerna Jahwe janah ia terus reh ku perpulungen bage pe ku kebaktin. Ertahun-tahun kenca si e, kenca anak-anakna nggo dewasa janah mandiri, Mary terus ngelayani Jahwe amin gia gundari keadanna reh serana. Tapi paksa si e, David mulai ngoge majalah-majalah si ibereken Mary. Dungna, mulai ia nggit reh pulung sekali-sekali. Kempuna, si umurna enem tahun, rusur nikapken ingan kundul. Adi David la reh, nina kempuna e, ”Sedih kal aku la kam reh bulang.” Kenca 25 tahun, dungna David mulihken ku Jahwe. Meriah kal ukurna ras ndeharana erkiteken banci ras-ras ngelayani Jahwe mulihi.

15. Uga pasangen si nggo cawir nampati pasangen si nguda denga?

¹⁵ Setan terus nerang keluarga-keluarga. Eme alasenna ngkai maka perbulangen ras ndehara si ngelayani Jahwe arus radu ras erdahin. La soal nggo ndekah ntah mbaru denga kam erjabu, ukuri kai saja si banci ikatakenndu ras ilakokenndu guna mpegegehi perjabunndu. Pasangen si nggo cawir banci jadi usihen man si nguda denga. Banci iundangna pasangen si nguda denga ikut i bas kebaktin jabuna. Gelah  iidah pasangen si nguda e maka perbulangen ras ndehara arus tetap ncidahken kekelengen janah kompak la soal asakai dekahna kalak e erjabu.​—Tit. 2:3-7.

16, 17. Kai si itimai kerina juak-juak Dibata si ersada?

¹⁶ Paksa kalak Israel lawes ku Jerusalem guna sada perayan, kalak enda radu ras erdahin. Isikapkenna kerina si iperluken i bas perdalanen. Kenca e, kalak enda radu berkat janah sisampat-sampaten. I bas rumah pertoton, kalak enda ras-ras muji janah nembah Jahwe. (Luk. 2:41-44) Gundari, kita sangana ersikap-sikap bengket ku doni si mbaru. Emaka, kita arus ersada janah siusahaken asa ngasupta guna radu ras erdahin. Perlu nge ibahanndu upaya si lebih mbelin?

¹⁷ Enterem jelma i doni enda, rusur la siangkan janah melala hal si banci erbahan rubat. Tapi ngata bujur kita man Jahwe erkiteken banci sigejapken kedamen janah banci ngangkai kebenaren! I belang-belang doni umat Dibata nembah Ia alu cara si ngena ateNa. Janah, khususna bas wari-wari pendungi enda, umat Jahwe lebih kompak asangken si nggo-nggona. Bagi si inubuatken Jesaya ras Miha, ras-ras kita nangkeng ku ”deleng TUHAN [JAHWE].” (Jes. 2:2-4; oge Miha 4:2-4.) I bas wari si pepagi, pasti meriah kal ukurta paksa kerina kalak i belang-belang doni ”irakut” dingen ipersada janah radu ras erdahin guna nembah Jahwe!