1, 2. (a) Jelasken ngkai maka iperidiken sada hal si serius. (b) Kai si perlu ipastiken sekalak jelma sope iperidiken?

KAM singuda-nguda anak perana lit nge sura-surandu iperidiken? Adi lit, enda mejile. Iperidiken sada kinihamaten si mbelin. Enggo sibahas maka iperidiken sada keputusen si serius. Enda ncidahken man jelma si nterem maka kam nggo mbaktiken diri man Dibata Jahwe. Ertina, kam nggo erjanji ngelayani Ia rasa lalap alu erbahan peratenNa jadi hal si pentingna. Erkiteken enda janji si serius man Dibata, sope iperidiken, kam arus matang, nggo iangkaindu kai ertina mbaktiken diri man Dibata janah sura-surandu e rehna i bas pusuhndu nari.

² Banci saja lenga siap iakapndu kam iperidiken. Ntah pe, banci saja nggo siap akapndu bandu tapi menurut orang tuandu perlu denga itimaindu ngasa kam lebih dewasa ras erbuena pengalamenndu. Adi bage, ula kitik ukurndu. Asum kam nimai, bahanlah kemajun rohani gelah banci meter kam iperidiken. Emaka, kam banci ertekad guna:  (1) mpegegehi kinitekenndu, (2) mperobahi perbahanenndu, ras (3) nambahi pengerganndu.

3, 4. Kai si banci ipelajari singuda-nguda anak perana i bas Timotius nari?

³ Cuba ukuri kai jabapenndu kerna penungkunen enda: Engkai maka aku tek Dibata lit? Engkai maka aku tek Pustaka si Badia rehna i bas Dibata nari? Engkai maka kupatuhi perentah-perentah Dibata labo kalak i doni enda? Alu njabap penungkunen enda ”banci idatndu kai sura-sura Dibata, kai si mehuli, kai si ngena ateNa, janah kai si sempurna.” (Rom. 12:2) Engkai maka arus ilakokenndu e?

⁴ Perdiateken usihen Timotius. Iangkaina Pustaka si Badia alu mehuli erkiteken nande ras ninina ngajari ia. Tapi ipebetehkan Paulus man Timotius, ”Tetaplah ndalanken kebenaren si rehna i bas Dibata nari si enggo iajarken man bandu dingen enggo tuhu-tuhu kam tek.” (2 Tim. 3:14, 15) Salah sada erti kata ”tuhu-tuhu tek” eme ”yakin janah lanai sangsi nandangi kebenaren kerna sada hal”. Emaka, Timotius arus tek maka kebenaren banci idatken i bas Pustaka si Badia nari. Ialokenna kebenaren labo erkiteken isuruh nande ras ninina. Tapi ibuktikenna sendiri maka kai si ipelajarina e benar, janah ia pe tuhu-tuhu tek.​—Oge Roma 12:1.

5, 6. Engkai maka penting igunakenndu ’kengasupenndu rukur’ gundari nari?

⁵ Adi kam uga? Mungkin mulai kitik-kitikndu nari nggo itandaindu kebenaren. Emaka, mulai gundari nari, ukuri kai alasenna kam tek maka e kebenaren. Hasilna, kinitekenndu banci reh paguhna, janah keputusenndu la ipengaruhi temanndu, doni enda, ntah pe perasanndu sendiri.

⁶ Adi gundari nari nggo igunakenndu ’kengasupenndu rukur’, banci ijabapndu penungkunen teman-temanndu, misalna: ’Engkai maka kam tek Dibata e lit? Adi keleng ate Dibata kita, ngkai maka ipediatNa hal-hal buruk terjadi? Ise si njadiken Dibata?’ Adi kam nggo siap, penungkunen e labo erbahan kam ragu. Malahen ngiahken kam guna terus erlajar Pustaka si Badia.

7-9. Jelasken uga seri panduan belajar, ”Apa yang Sebenarnya Alkitab Ajarkan?” banci mpegegehi kinitekenndu.

⁷ Adi ipelajarindu Pustaka si Badia alu megermet, banci ijabapndu penungkunen-penungkunen kalak, erban kam lanai sangsi, janah mpegegehi kinitekenndu. (Perb. 17:11) Melala publikasinta si banci nampati kam. Contohna, brosur Asal Mula Kehidupan—Lima Pertanyaan yang Patut Direnungkan? ras buku Apakah Ada Pencipta yang Mempedulikan Anda? (Lenga lit i bas cakap Karo.) Enterem ka singuda-nguda anak perana si ndatken manfaat i bas jw.org, i bas seri panduan belajar ”Apa yang Sebenarnya Alkitab Ajarkan?”. Banci idaramindu i bas bagin AJARAN ALKITAB. Seri enda ibahan guna nampati kam mpegegehi kinitekenndu kerna sada topik i bas Pustaka si Badia.

⁸ Adi rusur kam erlajar Pustaka si Badia, banci saja nggo ietehndu jabapen piga-piga penungkunen i bas panduan belajar e. Tapi tek nge kam adi e kebenaren? Panduan belajar nampati kam ngukuri alu megermet piga-piga ayat Pustaka si Badia, jenari ngiahken kam guna nulisken kai alasenna maka kam tek. Alu bage, banci ijelaskenndu kinitekenndu  kempak kalak si deban. Adi banci ibukandu internet janah ngenehen seri ”Apa yang Sebenarnya Alkitab Ajarkan?” banci igunakenndu e bas pelajaren pribadindu.

⁹ Gelah siap kam iperidiken, arus ibuktikenndu sendiri maka enda me kebenaren. Nina sekalak turang seninanta si nguda denga, ”Sope kuputusken guna iperidiken, kupelajari Pustaka si Badia. Tek aku maka enda me agama si benar. Tep-tep wari, kinitekenku reh paguhna.”

10. Engkai maka perbahanen kalak Kristen si nggo iperidiken arusna sentudu ras kinitekenna?

¹⁰ Nina Pustaka si Badia, ’Kiniteken la sue ras perbahanen, mate kap.’ (Jak. 2:17) Adi tek kam nandangi kebenaren, teridah i bas perbahanenndu. Emaka kam banci ”nggeluh bagi si ngena ate Tuhan, janah erpengendes man Dibata”.​—Oge 2 Petrus 3:11.

11. Jelasken kai ertina ”nggeluh bagi si ngena ate Tuhan”.

¹¹ Kai ertina ”nggeluh bagi si ngena ate Tuhan”? Enda ertina, lagu langkahndu bersih. Contohna, ukuri kai si terjadi enem bulan si nggo lewat. Paksa kam igoda ngelakoken kai si salah, ietehndu nge kai si arus ilakoken? (Heb. 5:14) Ingetndu nge ndigan tepatna itulakndu godan ntah pe tekanen teman sebaya? I bas sekolah, jadi usihen nge lagu langkahndu? Tetap nge kam setia man Jahwe ntah icubakenndu seri ras teman-temanndu gelah ula kam itokohina? (1 Pet. 4:3, 4) Tentu saja, la lit si sempurna. Maun-maun, kalak si nggo ndekah ngelayani Jahwe pe banci saja mela ntah pe mbiar mbela kinitekenna. Tapi, kalak si nggo mbaktiken diri man Dibata megah akapna jadi saksiNa, janah icidahkenna alu lagu langkahna si bersih.

12. Kai saja si termasuk i bas ”erpengendes man Dibata” janah uga arusna perasanndu kerna si e?

¹² Kai saja si termasuk i bas ”erpengendes man Dibata”? Enda termasuk kegiatenndu i bas runggun, bagi perpulungen ras erberita. Tapi termasuk ka kegiaten si la niidah kalak si deban. Misalna, pertoton ras pelajaren pribadi. Kalak si nggo mbaktiken kegeluhenna man Jahwe labo iakapna enda kerina jadi beban. Pengejapenna bali bagi si igejapken Raja Daud, si ngataken, ”O Dibata ngena ateku ndalanken peratenNdu, pengajarenNdu kubuniken i bas pusuhku.”​—Msm. 40:9.

13, 14. Kai si banci nampati kam gelah ”erpengendes man Dibata”? Turiken piga-piga pengalamen.

¹³ Guna nampati kam, netapken cita-cita, nehenlah lembar kerja i bas buku Pertanyaan Kaum Muda—Jawaban yang Praktis, Jilid 2 i bas halamen 308 ras 309. (Lenga lit i bas cakap Karo). I je, banci ituliskenndu jabapen kerna penungkunen-penungkunen enda: ”Spesifik nge pertotonndu, janah i bas pertotondu teridah nge kelengndu man Jahwe?”, ”Kai saja bahan pelajaren pribadindu?”, ”Erberita si meriah nge kam amin gia orang tuandu la ikut erberita?” Kam pe banci nulisken kai si atendu ipesikapndu kerna pertotonndu, pelajaren pribadi, ras pelayanenndu.

¹⁴ Enterem singuda-nguda anak perana si iperidiken atena nggejapken maka lembar kerja e tuhu-tuhu erguna. Nina Tilda, sekalak turang seninanta si nguda denga, ”Kupake lembar kerja enda guna netapken tujun. Sada per  sada tujunku e banci kudalanken, janah sada tahun kenca si e aku siap iperidiken.” Sekalak turang seninanta si nguda denga si gelarna Patrick nggejapken hal si seri. Nina, ”Kueteh nge kai sura-surangku, tapi alu nuliskenca, enda erbahan aku lebih erusaha ndatkenca.”

15. Jelasken ngkai maka pembaktin arus erpalasken keputusen pribadi.

¹⁵ Salah sada penungkunen i bas lembar kerja e: ”Tetap nge kam ngelayani Jahwe amin gia orang tuandu ras teman-temanndu ngadi ngelayani Ia?” Sanga kam mbaktiken diri man Jahwe janah iperidiken, kam erban hubungen pribadi ras Ia. Emaka, i bas ngelayani Dibata, la kam banci bergantung man orang tuandu bage pe kalak si deban. Adi kam ’nggeluh bagi singena ate Jahwe janah erpengendes man baNa’, enda ncidahken maka kam tuhu-tuhu tek enda me kebenaren janah atendu ngikutken Dibata. Alu bage, kam banci ncukupi sarat guna iperidiken.

16, 17. (a) Kai si arusna ngiahken sekalak jelma jadi kalak Kristen? (b) Uga pengergan nandangi tebusen banci igambarken?

¹⁶ I bas sada wari, sekalak dilaki si angkaina kal Undang-undang Musa nungkun man Jesus, ”Perentah si apai kin si pentingna kal i bas kerina Undang-undang agama?” Erjabap Jesus, ”Kelengilah Tuhan Dibatandu asa ukurndu, asa tendindu, dingen asa gegehndu lit.” (Mat. 22:35-37) Ijelasken Jesus maka kekelengen man Jahwe min si ngiahken sekalak jelma iperidiken janah jadi kalak Kristen. Salah sada cara si mehulina mpegegehi kekelengenndu man Jahwe eme ngukuri alu mbages kerna tebusen, pemere Dibata si seh kal mehergana man manusia. (Oge 2 Korinti 5:14, 15; 1 Johanes 4:9, 19.) Paksa ilakokenndu si e, enda ngiahken kam guna ncidahken pengerganndu.

¹⁷ Pengerganndu nandangi tebusen banci igambarken bagenda: Bayangken kam nandangi gedap janah lit sekalak jelma si nelamatken kam. Langsung nge kam mulih ku rumah, janah ilupakenndu kai si nggo ilakoken kalak ndai man bandu? Tentu lang! Pasti terus ikatakenndu bujur man bana! Bage ka pe, kita arus terus ngataken bujur man Jahwe ras Jesus erkiteken tebusen. Kita rutang kegeluhen man kalak enda! Kalak enda nggo nelamatken kita i bas dosa ras  kematen nari. Erkiteken keleng ate kalak enda kita, lit arapenta guna nggeluh si rasa lalap i doni si jadi Pardis!

18, 19. (a) Engkai maka la kam perlu mbiar jadi sikerajangen Jahwe? (b) Adi kam ngelayani Jahwe, kegeluhenndu reh ulina. Jelasken.

¹⁸ Ngataken bujur nge kam nandangi kai si ilakoken Jahwe man bandu? Adi bage, nggo waktuna kam mbaktiken diri ras iperidiken. Pembaktin eme janji man Dibata guna ngelakoken peratenNa rasa lalap. Perlu nge kam mbiar ebahan janji e? Lang! Ate Jahwe kam ndatken kai si mehulina, janah iupahiNa kalak si ngelakoken peratenNa. (Heb. 11:6) Adi baktikenndu dirindu man Dibata ras iperidiken, kegeluhenndu labo reh kelekna tapi reh ulina! Nina sekalak turang senina si umurna 24 tahun si iperidiken paksa anak-anak denga, ”Bicara terbelinen min ndai aku iperidiken, banci saja lebih mbue pemahamenku, tapi alu mbaktiken diri sanga nguda denga, enda ngelindungi aku i bas ngayaki sura-sura doni.”

¹⁹ Jahwe tuhu-tuhu la seri ras Setan si la mperdiateken kam janah terus ndarami keuntungen bas kam nari. Adi iikutkenndu Setan, la banci iberekenna si mehuli man bandu. Uga ia banci mereken si mehuli adi bas ia pe la lit si mehuli? La lit berita si meriah i bas ia bage pe arapen. Masa depan si la mehuli ngenca banci iberekenna man bandu, perban masa depanna pe bage!​—Ket. 20:10.

20. Kai si banci ilakoken singuda-nguda anak perana gelah siap mbaktiken diri ras iperidiken? (Nehen kotak ” Penampat guna Erbahan Kemajun Rohani”.)

²⁰ Mbaktiken kegeluhen man Jahwe eme keputusen si mehulina. Enggo nge kam siap? Adi nggo, kam la perlu mbiar erban janji e. Tapi adi lenga kam siap, gunaken saran i bas artikel enda. Ipebetehken Paulus man turang senina i Pilipi gelah terus erbahan kemajun. (Pil. 3:16) Adi idalankenndu nasehat enda, minter atendu mbaktiken diri man Jahwe janah iperidiken.