Cita-cita labo terjeng nipi ntah pe sura-sura. Gelah sidat cita-citata, perlu siban rencana, nggit kita erban penyesuaien, janah nggit kita kerja keras.

Lit cita-cita jangka pendek (banci idat piga-piga wari ntah piga-piga minggu), jangka menengah (piga-piga bulan), ras jangka panjang (setahun ntah pe lebih). Gelah banci sidat cita-cita jangka panjang, perlu siban lebe cita-cita jangka pendek ras menengah.

Adi sidat cita-citata, banci kita lebih percaya diri, reh kompakna ras teman-temanta, janah reh riahna ukurta.

Percaya diri: Adi enggo sidat cita-cita jangka pendek, lebih percaya diri kita guna ndatken cita-cita si jangka panjang. Banci ka kita lebih percaya diri bas ngadapi masalah tiap wari, misalna nulak tekanen teman.

Pertemanen: Biasana meriah ukur kalak erteman ras kalak si lit cita-citana janah nggit ia kerja keras ndatkenca. Selain si e, salah sada cara si mehulina gelah reh kompakna kita ras temanta eme adi kita ras temanta nggit erusaha ndatken cita-cita si seri.

Keriahen ukur: Adi siban cita-citata janah berhasil kita ndatkenca, puas ras meriah siakap.

“Meriah kuakap adi lit cita-citaku. E erban aku terus sibuk janah lit target si arus kudatken. Sanga berhasil kudat sada target, banci ningku, ‘Ih, banci kepeken kudatken targetku! Meriah kel kuakap.’”​—Christopher.

NINA PUSTAKA: “Kalak si nimai mehuli lebe wari, lalap ia la merdang, lalap la rani.”​—Pengerana 11:4, Pustaka si Badia ras Ende-enden Edisi ke-4 © LAI 2003.

Lakokenlah enda janah datken cita-citandu.

Tentukenlah cita-citandu. Banlah daftar kerna cita-citandu janah urutken si apai atendu lebe idatkenndu.

Ban rencana. Lakoken enda man tiap cita-citandu:

• Tentuken waktu si masuk akal guna ndatkenca.

• Rencanaken kai saja si arus lakokenndu.

• Ukurilah tentangen si banci saja terjadi, ras uga cara ngatasisa.

Lakokenlah. Ula timaindu ngasa enggo sikapkenndu kerina maka dalankenndu. Tapi cuba sungkuni bandu, ‘Kai nge si perlu lebe kulakoken guna ndatken cita-cita e?’ Kenca si e, lakokenlah. Nen kemajun kai si enggo lakokenndu kenca berhasil kam ngelakoken tiap langkah.

NINA PUSTAKA: “Rencana kalak rajin pasti berhasil.”​—Kuan-kuanen 21:5.