Man Orang Tua
6: Disiplin
ERTINA
Disiplin banci maksudna petunjuk ntah pe pengajaren. Disiplin arah orang tua banci nampati anak-anak guna erban keputusen si mehuli. Adi lakoken anak-anak kai si la mehuli, idisiplin orang tua me anak e gelah banci ipekenana kesalahenna.
ENGKAI MAKA E PENTING?
Enggo puluhen tahun dekahna, disiplin hampir lanai lit, perban mbiar orang tua disiplin e banci erban anakna kurang percaya diri. Tapi orang tua si pentar, ibanna aturen si masuk akal janah ilatihna anak-anakna guna matuhisa.
“Gelah anak-anak banci jadi kalak si dewasa si ertanggung jawap, kalak e arus ibere batasen. Adi la lit disiplin, anak-anak bali bagi kapal si la lit setirna, kapal e banci salah arah ntah pe erbalik.”—Pamela.
SI BANCI LAKOKENNDU
Lakokenlah kai si ikatakenndu. Adi anakndu la patuh man peraturen, arus hukumndu kalak e. Tapi adi patuh ia, ula kam lupa mujisa.
“Gundari buen anak-anak si ngelawan, emaka lalap kupuji anak-anakku adi nggit kalak e patuh. Adi kupuji kalak e, reh nukahna kapna ngaloken disiplin.”—Christine.
NINA PUSTAKA: “Kai si isuan kalak, e ka si peranina.”—Galati 6:7.
Masuk akal min kam. Ula pebelin-belinndu masalah si kitik. Sesuaikenlah disiplin si berendu ras umur bage pe kengasupen anakndu, janah sesuaiken ras uga belinna kesalahenna. Selain si e, biasana reh ulina hasilna adi disiplin si iberendu lit hubungenna ras kesalahen anakndu. Contohna, adi isalahgunaken anakndu HP-na, banci mis tabanndu piga-piga wari dekahna.
“Sanga ban anakku kesalahen, kupastiken lebe e sengaja ntah lang. Sipat si la mehuli si enggo jadi kebiasan, la seri ras kesalahen si kitik si banci ipersingeti saja.”—Wendell.
NINA PUSTAKA: “Ula ban merawa anak-anak kena gelah ula kitik ukurna.”—Kolose 3:21, cataten i teruh.
Cidahken kekelengen. Reh nukahna akap anak-anak ngaloken peraturen ras disiplin adi tehna maka si e iban perban keleng ate orang tuana ia.
“Sanga ban anak kami kesalahen, kataken kami maka bangga kami nandangi kerina si mehuli si enggo lakokenna. Petetap kami ukurna maka kesalahenna e labo erban sia-sia kerina si enggo lakokenna, adi nggit ia ipersingeti. Kataken kami ka maka nggit kami nampati ia.”—Daniel.
NINA PUSTAKA: “Kekelengen e sabar ras mehuli.”—1 Korinti 13:4.
