Orang tua banci jadi usihen adi lakoken kalak e kai si ajarkenna. Contohna, ajarkenndu anakndu gelah lalap jujur. Tapi sanga lit tamu, suruhndu anakndu ngataken, “La rumah Bapak.” Padahal kam i rumah. Pasti mesera akap anak e jadi kalak si jujur.

“La banci arapken orang tua lakoken anak-anakna kai si suruhna adi ia pe la lakokenna. Anak-anak e bali bagi spons, serapna kerina si enggo sikataken ras silakoken. Janah pasti protes ia adi la sesuai perbahanenta ras kai siajarken.”​—David.

NINA PUSTAKA: “Kataken kena man kalak, ‘Ula nangko,’ tapi engkai kena nangko?”​—Roma 2:21.

Biasana, si rusur iusih anak-anak ras anak remaja eme orang tuana. Pengaruh orang tua ndauh belinen asangken pengaruh teman-temanna. E ertina orang tua me si cocokna ngajari anak-anakna. Tapi orang tua pe arus ndalanken kai si ajarkenna.

“Banci saja enggo rugup babahta ngeranai, tapi la siteh begiken anakta kita ntah lang. Tapi, sanga la silakoken kai si enggo sikataken, mis teh anakta. Sadar ntah lang kita, situhuna lalap perdiateken anak-anakta perbahanenta.”​—Nicole.

NINA PUSTAKA: “Kepentaren si rehna surga nari . . . la munapik.”​—Jakup 3:17.

Pereksalah bandu. Film si uga nge tontonndu? Uga nge perbahanenndu man teman geluhndu ras man anak-anakndu? Kalak si uga nge teman-temanndu? Ermediate nge kam man kalak si deban? Intina, dalankenndu nge kai si suruhndu ilakoken anak-anakndu?

“Aku ras perbulangenku la nuruh anak-anak kami ngikutken aturen si la dalanken kami.”​—Christine.

Mindo maaplah adi lakokenndu si salah. Teh anakndu maka kam la sempurna. Adi la kam mela mindo maap man teman geluhndu ras anakndu, ajarkenndu anak-anakndu jadi kalak si jujur ras meteruk ukur.

“Perlu begi anak-anak siakui kesalahenta janah mindo maap kita. Adi la siban bage, kalak e pe la pagi akuina salahna.”​—Robin.