Jati diri lit hubungenna ras prinsip geluhndu, kai si itekindu, ras sipat-sipatndu. Jadi intina, jati diri me si nentuken kalak si uga kam.

Adi lit jati dirindu, tetap paguh pendirinndu janah la kam menukah ipengaruhi teman-temanndu.

“Enterem kalak si bagi patung si ipajang bas toko baju. La banci pilih patung e baju si apai atena pakena, kalak si nentukenca.”​—Adrian.

“Kuusahaken gelah tetap pendirinku amin pe bas keadan si sulit. Banci kuteh ise temanku si mehuli adi meriah aku ras ia janah ergaina pendirinku.”​—Courtney.

NINA PUSTAKA: “Ula nai kena ipengaruhi doni enda. Tapi robahlah alu ngubah perukuren kena.”​—Roma 12:2.

Ukurilah, ‘Kalak si uga nge aku gundari?’ janah, ‘Jadi kalak si uga nge ateku?’ Guna meteh jawapenna cuba ukuri kai kelebihenndu, kekurangenndu, ras kai si itekindu. Jawaplah penungkunen-penungkunen enda.

Kelebihen: Kai nge bakatku ras keterampilenku? Kai nge kelebihenku? (Contohna: Kalak si tepat waktu nge aku? banci ngendaliken diri? rajin? nggit mere?) Kai saja nge si mehuli si enggo kulakoken?

SARAN: Mesera nge kapndu ndarami kai si mehuli bas kam? Adi bage, cuba sungkuni orang tuandu ntah pe teman kompakndu, kai nge si mehuli si idah kalak e bas kam ras kai alasenna.

NINA PUSTAKA: “Tiap kalak arus pereksana perbahanenna, janah ermeriah ukur ia perban dirina, labo perban bandingkenna ia ras kalak si deban.”​—Galati 6:4.

Kekurangen: Sipat kai nge si perlu kupehuli? Katawari nge aku nukah tergoda ngelakoken kai si salah? Arus nge aku erusaha ngendaliken diri?

NINA PUSTAKA: “Adi ninta, ‘La lit dosata,’ sitipu kap banta.”​—1 Johanes 1:8.

Kai si itekindu: Aturen kai nge si kuikutken kerna lagu langkah janah kai alasenna? Tek nge aku lit Dibata, janah kai nge si erban aku tek? Perbahanen kai saja nge si la kuakap mehuli ras engkai? Adi kuakap uga nge masa depan manusia?

NINA PUSTAKA: “Kengasupen rukur lalap pagi njagai kam, janah pengertin pagi si ngelindungi kam.”​—Kuan-kuanen 2:11.