Perbulangen ras ndehara si erban komitmen ntah pe janji, ianggapna perjabunna e sada hubungen si tahan rasa lalap. Enda erban aman akap kalak e duana. Usahaken kalak e gelah perjabunna tetap paguh amin pe lit masalah.

Lit perbulangen ras ndehara si tetap ras-ras tading perban la atena erban keluargana ras teman-temanna kecewa. Tapi, ndauh nge ulin adi tetap kalak e ras perban sikeleng-kelengen ras sihamaten.

NINA PUSTAKA: ‘Perbulangen la banci nadingken ndeharana.’​—1 Korinti 7:11.

“Adi lit tekadta mpertahanken perjabunta, la kita nukah tersinggung. Nggit kita mis ngampuni ras mindo maap. Adi lit masalah, sianggap e sada tentangen, labo sianggap la terdungi janah sirang me jalan keluarna.”​—Micah.

Sanga ngadapi masalah, perbulangen ras ndehara si la lit komitmenna mbelin kemungkinenna bagenda nina, ‘La kin kami cocok.’ Kenca si e, daramina cara gelah sirang.

“Sanga nandangi erjabu, enterem kalak si erpengakap maka adi la kari ermeriah ukur perjabunna, banci kalak e sirang. E tandana maka mulai tangtangna nari pe la lit komitmen kalak e.”​—Jean.

CUBA UKURI

Sanga lit masalah . . .

• Menyesal nge kam erjabu ras teman geluhndu?

• Ibayangkenndu nge dilaki ntah pe diberu si deban?

• Bagenda nge nindu “Lawes saja aku” ntah “Kudarami ateku kalak si ngergai aku”?

Adi ijawapndu ue man salah sada penungkunen e ntah lebih, gundari me waktuna mpegegehi komitmen kena.

CAKAPKENLAH RAS TEMAN GELUHNDU

• Enggo nge mulai kita lupa nandangi komitmen perjabunta? Adi ue, engkai?

• Kai si banci silakoken guna mpegegehi komitmen perjabunta?

SARAN

• Tulislah kai buktina keleng atendu teman geluhndu

• Tamalah foto teman geluhndu bas meja erdahinndu

• Teleponlah teman geluhndu tiap wari sanga kam bas ingan erdahinndu, ntah pe sanga bas ingan si ndauh arah ia nari

NINA PUSTAKA: “Si enggo persada Dibata, la banci sirangken manusia.”​—Matius 19:6.