Adi kam ras anakndu banci ras-ras nuriken perukuren ras perasan, e ertina enggo mehuli komunikasi kena.

Banci saja mesera siakap ngerana man anak remaja. Sanga kitik denga ia, nggit ia nceritaken kerinana. Tapi kenca remaja, enggo jarang ia cerita. Dungna, mesera kapndu ngangkai perukuren ras perasanna. Tapi, amin pe anakndu si enggo remaja bagi tempa la nggit ngerana ras kam, situhuna perlu kel kalak e ngerana ras kam.

Ercakap-cakaplah ras anakndu bas waktu si cocok akapna. Banci jadi, kenca tengah berngi maka meriah akap anakndu ercakap-cakap ras kam.

“Banci saja sikataken ateta, ‘Engkai maka gundari atendu ngerana? Sada wari enda me enggo ras kita!’ Tapi, adi nggit anakndu ngerana ras kam, e enggo mejile. Ate orang tua, terus terang min anakna ngerana ras ia.”​—Lisa.

“La kuakap cocok adi berngisa medem. Tapi sedekah enda, riahen akap anak-anakku ercakap-cakap ras aku kenca tengah berngi.”​—Herbert.

NINA PUSTAKA: “Tiap kalak arus min ngukuri kepentingen kalak si deban, labo kepentingenna saja.”​— 1 Korinti 10:24.

Ula tersimpangken. Bagenda nina sekalak perbapan, “Mon-mon sanga anak-anakku cerita, si deban ka nge kuukuri, tapi mis teh kalak e.”

Pernah nge nanamindu si bage? Sanga ngerana kam ras anak-anakndu, matekenlah TV janah ula kam sibuk ngenen HP-ndu. Begiken ia janah ula kam anggap remeh nandangi ceritana amin pe si ceritakenna e persoalen si kitik.

“Arus sipetetap ukur anakta maka ermediate kita man perasanna. Adi lang, lanai kari nggit kalak e ngerana alu terus terang, ntah pe banci dungna pindona penampat kalak si deban.”​—Maranda.

“Ula lebihsa tanggapenta, amin pe salah cara rukur anakta.”​—Anthony.

NINA PUSTAKA: “Perdiatekenlah cara kena megiken.”​—Lukas 8:18.

Ercakap-cakaplah bas suasana si santai. Mon-mon, reh nukahna akap anak-anak terus terang adi la langsung nen orang tuana ayona.

“Imanpaatken kami waktu kami sanga bas motor. Perban ia kundul i sampingku, labo i lebe-lebeku, reh nukahna kapna terus terang ngerana.”​—Nicole.

Banci ka kam ngerana-ngerana ras anakndu sanga kena man.

“Sanga man berngi, ceritaken kami kerina si terjadi bas wari e. Dungna, kompak kami janah teh kami maka adi lit masalah, anggota keluarga kami nggit nampati.”​—Robin.

NINA PUSTAKA: “Meter megiken, ula mis ngerana.”​—Jakup 1:19.