Man Orang Tua
7: Nilai Moral
ERTINA
Nilai moral eme aturen lagu langkah si man ikuten. Contohna, usahakenndu nge lalap jujur? Adi bage, pasti merhat kam anakndu pe jujur.
Kalak si lit bas ia nilai moral, pasti lakokenna kai si mehuli. Pasti ukurina kalak si deban, rajin, ras adil. Kerina sipat-sipat e arusna ipebelin mulai kitik-kitik nari.
NINA PUSTAKA: “Ajarkenlah kai si benar man anak-anak, gelah enggo pe pagi ia metua, la ia nilah je nari.”—Kuan-kuanen 22:6, cataten i teruh.
ENGKAI MAKA E PENTING?
Bas jaman si canggih enda, nilai moral seh kel pentingna. Bagenda nina sekalak pernanden si gelarna Karyn, “Pengaruh si la mehuli banci reh arah perangkat elektronik kai pe janah katawari pe. Anak-anak banci saja sangana kundul i sebelah kami, tapi tontonna kai si la mehuli!”
NINA PUSTAKA: “Kalak si dewasa . . . terlatih ia bas mbedaken kai si benar ras kai si salah.”—Heber 5:14.
Sipat-sipat si mehuli seh kel pentingna. Enda termasuk kata-kata si sederhana (bagi ngataken “tolong” ras “bujur”) bage pe ngukurken kalak si deban. Gundari, enterem kalak si lanai mehuli sipatna perban pentingen akapna perangkat elektronik asangken kalak si deban.
NINA PUSTAKA: “Kai si ate kena lakoken kalak man kena, lakoken ka si bage man bana.”—Lukas 6:31.
SI BANCI LAKOKENNDU
Ajarkenlah nilai moral man anakndu. Contohna, sada penelitin mbuktiken maka mbelin kemungkinenna anak remaja la erhubungen seks sope erjabu adi enggo ajarken orang tuana maka si e salah.
SARAN: Pakelah berita si lit mbaru-mbaru enda guna mbenaken percakapen kerna lagu langkah si mehuli. Contohna, adi lit berita kerna pembunuhen, banci katakenndu, “Engkai maka banci lit kalak si bage jahatna me? Menurutndu, engkai maka banci ia bage?”
“Mesera akap anak-anak nentuken si apai si benar ras si salah adi la pernah iajarken kerna si e man bana.”—Brandon.
Ajarilah anakndu gelah sopan. Anak si kitik denga pe banci erlajar ngataken “tolong” ras “bujur” janah ngukurken kalak si deban. Buku Parenting Without Borders ngataken, “Adi enggo teh anak-anak maka kalak e bagin arah keluarga, sekolah, ras masyarakat, mbelin kemungkinenna lakoken kalak e pagi kai si erguna man kalak si deban, labo man bana saja.”
SARAN: Berelah tugas man anak-anakndu i rumah gelah teh kalak e maka penting ngelayani kalak si deban.
“Adi anak-anak rusur nampati i rumah, tehna kai si arus ilakokenna amin pe lanai ia tading ras orang tuana perban enggo terbiasa ia ngelakoken si e kerina.”—Tara.
