Man Anak Muda
11: Rajin
ERTINA
Kalak si rajin meriah akapna kerja keras guna ncukupi keperlunna ras nampati kalak si deban, amin pe pendahin e labo akap kalak penting.
ENGKAI MAKA E PENTING?
Meriah ntah lang siakap, mbue kel tanggung jawap bas geluh enda. Gundari, enterem kalak si la meriah akapna kerja keras. Tapi adi rajin kita, enda erguna man banta.—Pengerana 3:13.
“Adi kerja keras aku, meriah ras puas kuakap. Perasan puas e me si erban meriah kuakap kerja keras. Selain si e, adi rajin kita, merim me gelarta.”—Reyon.
NINA PUSTAKA: “Kerina kerja keras pasti lit gunana.”—Kuan-kuanen 14:23.
SI BANCI LAKOKENNDU
Arus usahakenndu gelah meriah kapndu ngelakoken dahinndu. Emaka cuba lakoken enda.
Usahakenlah ngelakoken kerina tugasndu alu mehuli. La soal dahin e dahin i rumah, PR, ntah pe cari makan, lakokenlah e alu bulat ukur. Adi enggo banci lakokenndu sada tugas alu mehuli, usahakenlah gelah reh ulina kam ngelakokenca. Contohna, reh ternalah dungi dahin e. Adi reh beluhna kita, reh riahna siakap ngelakoken dahinta.
NINA PUSTAKA: “Pernah nge idahndu kalak si beluh bas dahinna?Tedis pagi ia i lebe raja-raja, labo i lebe-lebe kalak biasa.”—Kuan-kuanen 22:29.
Ukurilah gunana man kalak si deban. Adi sidalanken tanggung jawapta alu mehuli, kalak si deban pasti ndatken manpaatna. Contohna, adi rajin kita ngelakoken dahin rumah, banci reh urakna dahin anggota keluargata.
NINA PUSTAKA: “Riahen kap mere asangken ngalo.”—Perbahanen Rasul-Rasul 20:35.
Lakokenlah lebihen asangken si ipindo. Adi si ipindo kalak ngenca lakokenndu, banci saja kapndu kam erdahin guna ngikutken pemindon kalak saja. Tapi adi pilihndu guna ngelakoken terbuen, banci gejapkenndu maka kam me si ngendaliken geluhndu, labo kalak si deban. Alu bage, reh riahna kapndu erdahin.—Matius 5:41.
NINA PUSTAKA: “Perbahanenndu si mehuli e lakokenndu alu meriah ukur, labo perban terpaksa.”—Pilemon 14.
Seimbanglah kam bas erdahin. Rajin labo ertina erdahin lalap. Kalak si rajin e meriah kapna erdahin, tapi lit waktuna santai.
NINA PUSTAKA: “Ulin sitik istrahat asangken melala kerja keras ras usaha ngayaki angin.”—Pengerana 4:6.
