MAN PERBULANGEN RAS NDEHARA
3: Sihamaten
ERTINA
Adi perbulangen ras ndehara sihamaten, kalak e banci tetap sikeleng-kelengen amin pe beda pendapat. Bagenda nina buku Ten Lessons to Transform Your Marriage, “La ipaksaken kalak e pendapatna janah icakapkenna masalah alu terus terang. Nggit kalak e megiken pendapat pasangenna alu mehamat, janah darami kalak e jalan keluar si cocok man kalak e.”
NINA PUSTAKA: “Kekelengen e . . . la mentingken bana.”—1 Korinti 13:4, 5.
“Kuergai ndeharaku perban kuanggap ia penting. La kulakoken kai pe si banci erban ia sakit hati ntah pe si banci ncedai perjabun kami.”—Micah.
ENGKAI MAKA E PENTING?
Adi perbulangen ras ndehara la sihamaten, kalak e banci dungna sipandang-pandangen ras sitokoh-tokohen. Menurut penelitin, si e kerina jadi tanda maka perjabun e labo banci ertahan.
“Adi lalap sipandangi ntah pe sipermelaken ndeharata gelah tawa kalak si deban, e erban lanai kapna merga bana ras lanai ia tek man banta. E banci erban perjabunta ceda.”—Brian.
SI BANCI LAKOKENNDU
CUBA UKURI
Bas seminggu enda, cuba perdiateken rananndu ras perbahanenndu. Jenari ukuri penungkunen enda:
-
‘Rusur nge kupandangi pasangenku, ntah rusur nge kupuji ia?’
-
‘Alu cara kai saja banci kubuktiken maka mehamat aku man pasangenku?’
CAKAPKENLAH RAS TEMAN GELUHNDU
-
Ranan ras perbahanen si uga nge si erban kita nggejapken maka kita ihamati?
-
Ranan ras perbahanen si uga nge si erban la siakap kita ihamati?
SARAN
-
Tulislah telu cara uga atendu kam ihamati. Kenca si e, pindolah teman geluhndu ngelakoken si seri. Tukarkenlah daftar si tulis kena e janah usahakenlah ngelakoken kai si lit bas daftar e.
-
Tulis sipat kai saja si erban jadi atendu teman geluhndu. Kenca si e, kataken man bana maka ergaindu kel sipat-sipatna e.
“Adi mehamat aku man perbulangenku biasana kucidahken arah perbahanenku maka kuergai ia janah merhat aku erban meriah ukurna. Labo perlu alu cara si luar biasa. Arah ranan ras perbahanen si sederhana pe banci kubuktiken maka kuergai ia.”—Megan.
Intina, labo saja kerna enggo mehamat kapndu kam man teman geluhndu, tapi enda kerna enggo nge gejapken teman geluhndu maka ia ihamati ntah lang.
NINA PUSTAKA: “Pakelah kekelengen, perkuah ate, mehuli, meteruk ukur, lembut, bage pe sabar.”—Kolose 3:12.
