Adi banci kam terteki, orang tuandu, teman-temanndu, ras bosndu banci ngandalken kam. Kalak si terteki ikutina peraturen, tepat janji, ras lalap jujur.

Biasana, adi reh tekna kalak man bandu reh buena kebebasen iberena man bandu.

“Cara si mehulina gelah banci tek orang tuandu man bandu, eme alu mbuktiken maka kam enggo dewasa ras ertanggung jawap, amin pe sanga la kam ras kalak e.”​—Sarahi.

NINA PUSTAKA: “Teruslah pastiken uga kin kena situhuna.”​—2 Korinti 13:5.

Adi merhat kam gelah reh tekna kalak man bandu ntah pe gelah mulihi ia tek man bandu, cuba lakoken enda.

Jujur. Adi erbual kam, mis kalak lanai tek man bandu. Tapi, adi jujur ras terus terang kam, apai ka adi akuindu kesalahenndu, tek me kalak man bandu.

“Adi kerina erdalan alu mehuli, nukah siakap jujur. Si meserana eme sanga arus akuindu kesalahenndu. Tapi adi akuindu kesalahenndu, kalak si deban banci reh tekna man bandu.”​—Caiman.

NINA PUSTAKA: “Ersura-sura kami gelah jujur bas kai pe.”​—Heber 13:18.

Banci iandalken. Bas sada survey i Amerika, lit 78 persen pegawai kantor ngataken maka “sipat banci iandalken me salah sada arah telu sipat si idarami kel bas perusahan si atena milih pegawai.” Emaka, adi gundari nari usahakenndu jadi kalak si banci iandalken, e banci erguna seh ngasa kam dewasa.

“Adi ertanggung jawap aku janah kulakoken tugasku i rumah amin pe la isuruh-suruh, pasti perdiateken orang tuaku kai si kulakoken e. Reh rusurna kuban bage, reh tekna kalak e man bangku.”​—Sarah.

NINA PUSTAKA: “Tek aku maka lebihen asa si kupindo e pe nggit nge kam ngelakokenca.”​—Pilemon 21.

Sabar. Adi sekalak jelma reh galangna, banci mis idah kalak. Tapi sipat-sipat si reh ulina, la banci mis idah kalak.

“Gelah orang tua ras kalak si deban tek man banta, arus kita erusaha janah e perlu waktu. La bias sekali ngenca kita jadi kalak si terteki.”​—Brandon.

NINA PUSTAKA: ‘Pakelah kesabaren.’​—Kolose 3:12.