“Gundari, doni enda enggo maju kel bas bidang teknologi, ilmu pengetahuan, bage pe ekonomi . . . Tapi lenga pernah bagenda parahna situasi [politik, ekonomi, ras lingkungen hidup]. Doni enda enggo menam kernep.”—Laporan Risiko Global 2018, Forum Ekonomi Dunia.

ENGKAI MAKA ENTEREM KALAK KUATIR KERNA MASA DEPAN MANUSIA BAGE PE DONI ENDA? CUBA SIPERDIATEKEN PIGA-PIGA MASALAH SI SANGANA SIADAPI.

• KEJAHATEN BAS INTERNET: Lit sada koran bas Australia ngataken, “Reh dekahna, Internet jadi ingan si berbahaya perban pedofilia (kalak si ngelecehken anak-anak secara seksual), pem-bully, troll, a bage pe peretas enggo mbue bas Internet. Pencurian identitas me salah sada kejahaten si meter kel perkembangenna bas doni enda. . . . Internet erban sipat-sipat si jahat ras kejam reh buena.” Bas Indonesia saja pe, lit kira-kira 60 juta kalak si jadi korban kejahaten bas Internet sedekah tahun 2016.

• EKONOMI SI LA ADIL: Menurut laporen Oxfam International, jumlah erta 8 kalak si bayakna kel seri ras jumlah erta 3,6 miliar penduduk si meserana bas doni enda. Nina laporen e ka, “Sistem ekonomi si la adil terus erban kalak si bayak reh bayakna janah kalak si mesera reh serana. Lalan arah kalak si mesera e eme diberu.” Lit si mbiar sistem ekonomi si la adil enda banci erban kerusuhen ntah pe pemberontaken.

• PERMUSUHEN RAS PENGANIAYAN: Bas tahun 2018, ilaporken Badan PBB bagin Urusan Pengungsi (UNHCR) bagenda, “Lenga pernah idah kami bage buena kalak si ngungsi.” Lit lebih 68 juta kalak si ngungsi janah buen arah kalak e ngungsi perban permusuhen ntah pe penganiayan. Bas laporen e pe ikataken maka hampir 30 kalak arus ngungsi tiap menit.

• MASALAH LINGKUNGEN HIDUP: Nina Laporan Risiko Global 2018, “Mbue jenis sinuan-sinuan ras jenis binatang sada per sada lanai lit. Selain si e, polusi udara bage pe laut si kotor enggo reh bahayana man kesehaten manusia.” Bas melala negri, jumlah serangga pe reh dekahna reh sitikna, padahal serangga erguna man sinuan-sinuan. Akibatna, iperkiraken ilmuwan maka banci kari lanai teringani doni enda. Terumbu karang pe enggo ceda. Iperkiraken ilmuwan, bas 30 tahun enda, kira-kira setengah terumbu karang enggo mate. Bas Indonesia saja, menurut data tahun 2017, kira-kira 30 persen nari ngenca terumbu karang si mejile.

Banci nge siban perubahen gelah doni enda reh amanna ras reh damena? Lit si erpengakap maka pendidiken me salah sada kuncina. Adi bage, pendidiken si uga nge maksudna? Bas artikel seterusna lit kari jawapenna.