Salah sada sura-sura Perserikatan Bangsa-Bangsa (PBB) eme gelah kerina kalak i belang-belang doni banci kerja sama, siergan, ras banci njaga lingkungen. Engkai maka e penting? Sekalak pejabat PBB si gelarna Maher Nasser, nulisken bagenda bas UN Chronicle, “I belang-belang doni kerina kalak ngadapi masalah si seri. Contohna perubahen iklim, kejahaten, reh buena perbahanen si la adil, kerusuhen si la erngadi-ngadi, enterem kel pengungsi, teroris, penakit si menular, ras si debanna.”

Lit kalak hebat si ngataken maka doni enda arus ipinpin sada pemerentahen. Contohna eme sekalak filsuf, penulis, ras ahli politik Italia si gelarna Dante (1265-1321) bage pe sekalak ahli fisika si gelarna Albert Einstein (1879-1955). Tek Dante maka doni enda labo banci dame adi mbue pemerentahenna. Kutipna ka kata-kata Jesus Kristus, janah nina, “Kerajan si lit perpecahen i je, ugapa pe hancur nge.”​—Lukas 11:17.

Bas Perang Doni II, iledakken dua bom atom. La ndekah kenca dung perang e, itulis Albert Einstein pesan man Majelis Umum PBB janah isina banci ibaca jelma si enterem. Nina, “Perserikatan Bangsa-Bangsa arus mis ertindak guna erban sada pemerentahen i belang-belang doni gelah doni enda banci tuhu-tuhu aman.”

Tapi, bicara sada ngenca pemerentahen i doni enda, banci kin si merentah e merentah alu jujur, mehuli, ras ngasup ndungi kerina masalah? Ntah, salah gunakenna nge kekuasanna bali bagi pemerentahen si lit gundari? Bagenda nina Lord Acton ahli sejarah Inggris, “Adi jelma si erkuasa, biasana salah gunakenna kekuasanna, apai ka adi ia ngenca si erkuasa.”

Emaka, banci nge doni enda tuhu-tuhu aman ras dame adi sada ngenca pemerentahenna? Nina bas Pustaka, banci. Uga carana? Pemerentahen e arus Dibata si erbanca labo jelma. Perban, Dibata ngenca si lit hakNa merentah ciptanNa. Bas Pustaka, pemerentahen e igelari “Kerajan Dibata.”​—Lukas 4:43.

Kerajan enda me si ikataken Jesus Kristus bas contoh toto si ajarkenna, nina, “Reh min KerajanNdu. Jadi min peratenNdu i doni.” (Matius 6:9, 10) Kerajan e pagi si erban terjadi sura-sura Dibata, labo sura-sura jelma si egois ras merangap.

Kerajan Dibata pe igelari ka “Kerajan surga.” (Matius 5:3) Engkai? Perban Kerajan e merentah arah surga nari. Kerajan e la perlu sen ntah pe pajak arah rakyatna. Emaka, la lit rakyat si latih kapna ngukuri si e!

Perban pemerentahen e bentukna “kerajan,” peminpinna sekalak raja. Rajana eme Jesus Kristus. Dibata me si mereken kuasa man bana. Bagenda nina Pustaka kerna Raja e:

• “Lit kuasa bas tanna . . . Kuasana terus reh tambahna, janah kedamen la erngadi-ngadi.”​—Jesaya 9:6, 7.

• “Ibereken kuasa man bana bage pe kehamaten ras kerajan, gelah kerina kalak arah erbage bangsa ras bahasa ngelayani ia. Kekuasanna . . . la pernah masap.”​—Daniel 7:14.

•   “Kerajan Tuhanta [Dibatata] ras KristusNa enggo merentah manusia.”​—Ketangkasen 11:15.

Bagi si itotoken Jesus, Kerajan Dibata pagi si erban sura-sura Dibata i doni enda terjadi. Sanga merentah pagi Kerajan Dibata, kerina jelma erlajar ngurus lingkungen ras mpekena doni enda. Mejile pagi mulihi doni enda janah mbue sinuan-sinuan ras binatang.

Tapi si pentingna, iban Kerajan Dibata pagi pendidiken man rakyatna. Seri pagi patoken si ipelajari kerina kalak. Lanai pagi lit kerusuhen ntah pe kalak si la ersada. Bagenda nina Jesaya 11:9, “Lanai pagi lakoken kalak e kai si erban cilaka, janah lanai pagi kalak e ncedai . . . perban dem pagi doni alu pemeteh kerna Jahwe bagi lau ndemi laut.”

Lanai pagi lit istilah “kejahaten,” “polusi,” “kalak mesera,” ras “perang.” Kerina kalak si tading i doni enggo ersada ras erdame. Nina Masmur 37:11, “Meriah kel pagi ukur kalak e perban dem kedamen i je.” Enda me si iarapken PBB, tapi kalak e la ngasup ngelakokenca. Emaka turah penungkunen: Ndigan kin Kerajan Dibata merentah ku doni enda? Kai nge si tangtangna arus ilakoken Kerajan e? Kai nge si arus lakokenndu gelah banci jadi rakyatna? Mari sibahas penungkunen-penungkunen e.