Sanga lit acara gawah-gawah si iban bas sada sekolah, piga-piga remaja si dilaki ituduh ngelakoken kekerasen seksual man sekalak murid dilaki. Kerina kalak e sekolah bas sekolah swasta si mejile bas Kanada. Kenca kejadin e, bagenda itulis Leonard Stern bas surat kabar Ottawa Citizen, “Sekolah si meganjang, kebeluhen, ras kebayaken labo jaminen maka la ilakoken anak-anak muda kai si la mehuli.”

Bagenda ka nina Stern, “Pasti setuju kita maka si pentingna iajarken orang tua man anak-anakna eme carana mbedaken kai si benar ras si salah. Tapi, enterem orang tua pentingen akapna nilai si meganjang ntah pe pendahin si mbue gajina.”

Pendidiken i sekolah memang penting, tapi labo lit pendidiken sekolah si banci nampati kita ngelawan sura-sura si salah. Adi bage, pendidiken kai nge si banci nampati kita mbedaken si benar ras si salah?

Pustaka bali bagi cermin. Adi sipelajari Pustaka, banci reh jelasna siteh kai saja kekurangenta ras keterbatasenta. (Jakup 1:23-25) Tapi labo e saja ngenca. Pustaka banci nampati kita robah ras mpebelin sipat-sipat si banci nampati kita erdame ras kalak si deban. Sipat-sipat e eme mehuli, bujur, sabar, ngasup nguasai diri, ras kekelengen. Kekelengen pe banci “mpersadaken kerina alu sempurna.” (Kolose 3:14) Engkai maka kekelengen seh kel pentingna? Cuba perdiateken kai nina Pustaka kerna kekelengen.

• “Kekelengen e sabar ras mehuli. Kekelengen e la percian, la tual, la sombong, sopan, la mentingken bana, janah la nukah merawa. Kekelengen e la ngkira kesalahen kalak. Kekelengen e ermeriah ukur perban kai si benar, labo perban kai si la benar. Kekelengen e ngasup nggengken kai pe, . . . janah sabar bas kai pe. Kekelengen e la erkeri-kerin.”​—1 Korinti 13:4-8.

• “Kalak si lit kekelengenna labo ngelakoken kai si jahat man kalak si deban.”​—Roma 13:10.

• “Si pentingna, sikeleng-kelengenlah kena alu tutus, sebap kekelengen nutupi melala dosa.”​—1 Petrus 4:8.

Adi sangana kam ras kalak si engkelengi kam, pasti tenang ras aman akapndu. Tek kam maka labo isakitina kam. Usahakenna erban meriah ukurndu.

Kekelengen pe banci erban kalak nggit erkorban ras robah. Contohna Billy. Mbaru denga lahir kempuna si pertama janah merhat ia rusur jumpa ras kempuna e. Tapi megegeh ia ngisap janah la bere kelana ia ngisap i deher kempuna e. Kai si ilakoken Billy? Amin pe enggo 50 tahun ia ngisap, nggit ia ngadi ngisap perban kempuna e. Bage me hebatna kekelengen!

Kekelengen perlu ipelajari. Orang tua me si utamana perlu ngajarken kekelengen man anak-anakna. Icukupina keperlun anak-anakna janah ilindungina kalak e. Itambarina anak-anakna sanga kalak e sakit ntah pe sanga lit si luka. Orang tua si mehuli, rusur ngerana-ngerana ras ngajari  anak-anakna. Idisiplinna ka anak-anakna janah ajarkenna kai bedana si benar ras si salah. Selain si e, orang tua si mehuli jadi usihen man anak-anakna.

Sayang kel, piga-piga orang tua la ilakokenna tanggung jawapna. Amin gia bage, anak kalak e banci jadi kalak si mehuli. Enterem kalak enggo berhasil ngubah kegeluhenna la soal uga carana ia ipebelin. Kalak e gundari enggo jadi kalak si mehuli ras ertanggung jawap. Bas artikel seterusna iceritaken kari dua pengalamen si mbuktiken kerna si e!