Pendidiken arah Pustaka luar biasa kel perban banci ngubah kegeluhen. Mari sinen dua contoh enda:

RICARDO: Sanga umurku 15 tahun, nukah denga aku ipengaruhi kalak si deban. Emaka dungna jadi anggota geng aku. Teman-temanku si lit bas geng e, mbelin kel pengaruhna man bangku. Dungna merhat aku masuk penjara sepuluh tahun dekahna! Memang aneh sura-suraku e. Tapi bas inganku tading, iergai kalak kel kalak si pernah masuk penjara. Emaka merhat aku bagi kalak e.

Bali bagi anggota geng si debanna, aku pe make narkoba. Kulakoken seks bebas janah meriah kuakap ngelakoken kejahaten. Bas sada berngi, sitembaken aku ras anggota geng si deban. Kuakap mate nge kari aku, tapi kepeken selamat. Kenca kejadin e, mulai tuhu-tuhu kuukuri tujun geluhku. Kuban ateku perubahen bas geluhku. Tapi la kuteh ja nari mbenakenca janah la kuteh ise si banci nampati aku.

Enterem keluargaku si la ermeriah ukur. Mbue kel masalah kalak e. Tapi lit sada mamaku si la bage geluhna. Ia ras keluargana kalak si bujur, janah ikutken kalak e ajaren Pustaka. Pernah ikataken kalak e maka gelar Dibata eme Jahwe. Emaka, la ndekah kenca terjadi perubaten antara geng ndai, ertoto aku man Jahwe. Kugelari gelarNa janah kupindo gelah isampatiNa aku. Sengget kel aku perban paginna reh Saksi Jahwe nuktuk rumahku. Dungna erlajar Pustaka aku ras ia.

La ndekah kenca si e, lit tentangen si mberat si arus kuadapi. Teman-temanku si mbarenda, rusur nelpon aku. Ajakna ka aku pulung-pulung. La aku nggit ikut amin pe mesera kuakap nulaksa. Ertekad aku terus erlajar Pustaka. Hasilna luar biasa kel! Geluhku enggo ndauh reh ulina janah meriah kel ukurku.

Mbarenda ertoto aku gelah ipenjaraken sedekah sepuluh tahun perban merhat aku jadi anggota geng si iergai. Tapi ngata bujur aku perban la pernah aku masuk penjara. Bas pudi wari, ertoto aku gelah bereken Dibata kesempaten jadi perberita sepenuh waktu, silang-langna sepuluh tahun dekahna. Merhat aku nampati kalak, perban aku pe mbarenda isampati kalak. Ijawap Dibata totoku e. Enggo lit 17 tahun dekahna aku jadi perberita sepenuh waktu.

Tapi teman sada gengku mbarenda, enterem si ipenjaraken ertahun-tahun dekahna. Lit ka si enggo mate. Mbarenda kuergai kalak e. Tapi gundari pengerganku ndauh bagesen man mamaku ras keluargana. Ngata bujur kel aku perban pang kalak e beda ras si deban janah ikutkenna ajaren Pustaka. Si pentingna arah si e kerina, ngata bujur aku man Dibata perban ituduhkenNa dalan si mehulina man bangku.

 ANDRES: Aku lahir ras ipebelin bas daerah si mesera pergeluh kalak i je. Bas ingan e, enggo biasa lit narkoba, preman, pembunuhen, ras pelacuren. Bapakku meriah akapna minem-minem janah enggo kecandun kokain ia. Bapak ras mamakku pe rusur rubati.

Sanga aku nguda denga kel, mulai aku minem-minem ras kupake narkoba. Rusur aku bas dalan-dalan guna nangko ras ndayaken kai si enggo kutangko. Bas pudi wari usahaken bapakku gelah kompak ras aku, tapi salah carana. Ajarina aku uga carana gelah narkoba bage pe barang-barang terlarang si debanna banci masuk ku negri kami jenari idayaken kami. Emaka banci meter dat kami melala sen. Bas sada wari, reh polisi ku rumah janah tangkapna aku. Ihukum aku lima tahun penjara perban kasus percobaan pembunuhen.

Bas sada wari sanga erpagi-pagi, kubegi pengumumen arah penjara si ngataken maka kerina tahanen iundang guna ngikuti pembahasen Pustaka ras Saksi Jahwe. Ikut aku ku acara e. Masuk akal kuakap pembahasenna, janah mulai aku erlajar Pustaka ras Saksi Jahwe. Ajarken kalak e patoken Dibata kerna lagu langkah. Ikutken kalak e kerina ajaren Pustaka, la ipilih-pilihina.

Sadar aku maka perlu aku penampat gelah banci robah, apai ka sanga lit tahanen si ngancam aku perban la ia senang ngidah aku erlajar Pustaka. Emaka ertoto aku mindo gegeh ras kepentaren man Jahwe, janah jawapNa totoku e. Dungna, pang aku erberita man tahanen si deban.

Sanga seh waktuna aku ibebasken, gugup kel aku. Perban gugupna, mbiar aku ndarat penjara nari. Sanga erdalan aku ku darat, melala tahanen si ndadaken tanna. Lit ka si cirem janah nina, “Selamat ya Pak Pendeta, enggo banci kam mulih.”

Ngata bujur kel aku man Dibata perban keleng kel ateNa aku janah lalap sampatiNa aku. La banci kubayangken uga kegeluhenku adi la min ndai kualoken pendidiken arah Dibata. a