Ntisik nari merentah me Kerajan Dibata si enggo sitimai sedekah enda. Iban Kerajan e pagi doni enda jadi dame ras ersada. Bas Masmur 72:7 ikataken, “Dem pagi kedamen.” Tapi, ndigan nge reh Kerajan Dibata? Kai si ilakoken Kerajan e sanga mulai merentah doni? Kai si perlu ilakokenndu gelah banci jadi rakyatna?

Menurut Pustaka, lit piga-piga kejadin si mbelin si jadi “tanda” maka Kerajan Dibata enggo nandangi reh. Piga-piga kejadin e eme bangsa erperang ngelawan bangsa si deban, kurang pangan, penakit, gempa si megegeh, ras reh buena kejahaten.​—Matius 24:3, 7, 12; Lukas 21:11; Ketangkasen 6:2-8.

Bas Pustaka pe lit ikataken, “Bas wari-wari pendungi reh pagi masa si sulit janah bahaya. Sebap manusia pagi engkelengi dirina saja, mata duiten, . . . la patuh man orang tua, la meteh ngata bujur, la setia, la lit kekelengenna, la nggit arih-arih, tukang pitnah, la kuasaina dirina, kasar, la tena ngena si mehuli, . . . sombong, lanai diatena Dibata tapi kesenangenna saja si daramina.” (2 Timotius 3:1-4) Memang, mbarenda nari pe sipat-sipat si bage enggo lit. Tapi gundari, sipat-sipat e enggo reh kelekna i japa pe.

Kata-kata bas Pustaka e mulai terjadi bas tahun 1914. Enterem ahli sejarah, ahli politik, ras penulis ngataken maka doni enggo mulai berubah kenca tahun e. Contohna, bagenda itulisken ahli sejarah arah Denmark si gelarna Peter Munch, “Mbelin kel perubahen bas sejarah manusia kenca perang bas tahun 1914. Sope perang e, tek kel kalak maka doni enda banci reh ulina . . . Tapi rempet-rempet kerina kita ngadapi keadan si dem bencana, kebiaren, ras ate segat si erban la lit perasan aman.”

Tapi ula kita putus asa. Kerina kejadin si la mehuli e ncidahken maka Kerajan Dibata nandangi merentah ku doni enda. Enda tuhu-tuhu berita si meriah. Ikataken Jesus maka bas wari-wari pendungi, “berita si meriah kerna Kerajan e iberitaken pagi man manusia i belang-belang doni guna kesaksin man kerina bangsa, kenca si e reh kedungen e.”​—Matius 24:14.

Berita si meriah e me si sangana iberitaken Saksi-Saksi Jahwe. Majalah utama kalak e pe judulna Sora Ermomo Mbritaken Kinirajan Jahwe. Bas majalah e rusur ibahas kerna pasu-pasu si nandangi ibereken Kerajan Dibata man manusia ras doni enda.

Perdiatekenlah empat keterangen si penting enda:

1. Kerajan e labo pagi ipinpin ntah pe iwakili manusia si erkuasa gundari.

2. Peminpin-peminpin bas doni enda erusaha pagi ngelawan Kerajan Dibata guna mpertahanken kekuasanna, tapi bodoh kap perbahanen kalak e.​—Masmur 2:2-9.

3. Ikernepken Kerajan Dibata pagi pemerentahen si lit gundari bas sada perang. (Daniel 2:44; Ketangkasen 19:17-21) Perang si mbelin e igelari Harmagedon.​—Ketangkasen 16:14, 16.

4. Kerina kalak si patuh man Kerajan Dibata iselamatken pagi arah Harmagedon, janah banci kalak e masuk ku doni si mbaru si dem kedamen. Bas Pustaka, kalak e igelari “kelompok jelma si enterem.” Jumlah kalak e banci saja jutan kalak.​—Ketangkasen 7:9, 10, 13, 14.

Gelah banci jadi rakyat Kerajan Dibata, arus lit lebe pemetehta. Bagenda nina Jesus bas totona man Dibata, “Adi tandai kalak maka Kam ngenca Dibata situhu-tuhu, janah tandaina Jesus Kristus si isuruhNdu, alokenna pagi kegeluhen si rasa lalap.”​—Johanes 17:3.

Mbue kel gunana man banta adi sitandai uga kin Dibata Jahwe e. Mari sibahas dua gunana. Si pertama, reh paguhna me kinitekenta man Dibata perban enggo siidah mbue buktina. Kinitekenta e erban kita tek maka Kerajan Dibata tuhu-tuhu lit janah ntisik nari merentah ku doni enda. (Heber 11:1) Si peduaken, reh kelengna me ateta Dibata ras kalak si deban. Perban keleng ateta Dibata, nggit kita patuh man baNa. Kekelengenta man kalak si deban erban kita nggit ngikutken kata-kata Jesus si rusur ka igelari Aturen Emas. Bagenda nina, “Kai si ate kena lakoken kalak man kena, lakoken ka si bage man bana.”​—Lukas 6:31.

Penciptata bali bagi sekalak bapak si mehuli, ateNa min tuhu-tuhu meriah ukurta. Merhat Ia gelah sidatken “kegeluhen situhu-tuhu.” (1 Timotius 6:19) Kegeluhenta gundari labo “kegeluhen situhu-tuhu.” Enterem kalak si mesera kapna ndalani geluhna, erpala-pala kel kalak e gelah banci tetap nggeluh. Jadi uga kin “kegeluhen situhu-tuhu,” e? Mari sinen pasu-pasu kai saja pagi si ibereken Kerajan Dibata.