Erbage-bage masalah si sangana siadapi banci erban lanai siakap aman ras dame janah banci erban masa depanta lanai terjamin. Menurutndu, banci nge idungi manusia masalah e?

Gelah sada masalah banci tuhu-tuhu idungi, perlu sidarami kai sumber masalahna. Contohna, sekalak dilaki si gelarna Tom sakit. La ndekah kenca ibaba ku rumah sakit, mate ia. Kai nge sebapna? Nina dokter si lit bas rumah sakit e, “Sanga sakit ia, obat penghilang rasa sakit ngenca bere dokterna. La lit si tersuruh ukurna ndarami penyebap penakitna e.”

Cara manusia ndungi masalah bas doni enda pe bage. Contohna, gelah la mbue kejahaten, iban pemerentah undang-undang, ipasangna kamera CCTV, janah tambahina anggota polisi. Memang enda banci ngurangi kejahaten, tapi labo ndungi masalah. Engkai? Perban perbahanen sekalak jelma biasana rehna arah perukuren, perasan, ras sura-surana.

Sanga terjadi krisis ekonomi bas negarana, bagenda nina Daniel si tading bas Amerika Selatan, “Mbarenda tenang geluh kami. La pernah begi kami kerna perampoken ersenjata. Tapi gundari la lit kota ntah pe kuta si aman. Krisis ekonomi enda erban sipat-sipat si la mehuli reh jelasna teridah. Manusia merangap janah seh kel ukurna muat erta kalak bage pe munuh kalak si deban.”

Elias a kiam arah kerusuhen si terjadi bas Timur Tengah. Dungna erlajar Pustaka ia. Bagenda nina, “Bas inganku tading, enterem keluarga, kelompok agama, bage pe politik si ngiahken anak muda ikut erperang. Menurut kalak e, anak-anak e banci kari jadi pahlawan. Padahal, imbang kalak e pe bage ka nge nina man anak muda si lit bas inganna! Dungna, kuteh maka peminpin-peminpin manusia labo terteki.”

Enda sesuai ras kata-kata si lit bas Pustaka:

• “Perukuren manusia jahat mulai kin kitik-kitikna nari.”​—Kejadin 8:21.

• “Pusuh manusia liciken asangken kai pe janah nekat. Ise si ngasup ngangkaisa?”​—Jeremia 17:9.

• “Bas pusuh nari ndarat perukuren si jahat, pembunuhen, . . . perbahanen seks si salah, nangko, kesaksin si palsu.”​—Matius 15:19.

Manusia labo ngasup mbeneken sipat-sipat si la mehuli si enggo rurat bas pusuhna. Reh dekahna, sipat-sipat e enggo reh kelekna. Enda teridah arah erbage-bage masalah si enggo sibahas bas artikel sebelumna. (2 Timotius 3:1-5) Ilmu pengetahuan enggo seh kel majuna janah komunikasi pe enggo seh kel canggihna. Tapi, engkai maka la banci siban doni enda jadi ingan si aman ras dame? Payo kin manusia la ngasup ngelakokenca? Payo kin doni enda labo pagi pernah aman ras dame?

Bicara banci pe simasapken sipat-sipat manusia si la mehuli, tetap nge la kita ngasup erban doni enda jadi ingan si aman ras dame. Engkai? Perban kengasupen manusia lit batasna.

Nina Pustaka, “Manusia la erkuasa . . . nentuken perdalanna.” (Jeremia 10:23) Payo, kita la banci merentah diri sendiri ntah pe merentah kalak si  deban, perban labo bage kita iciptaken. Enda bali bagi kita la banci nggeluh i teruh laut, perban labo bage kita iciptaken!

Cuba ukuri enda: Biasana labo meriah akap kalak adi atur-atur kalak si deban ia. Contohna, uga nge perasanndu adi ipaksaken kalak man bandu pendapatna kerna seks ntah pe kerna ndisiplin anak-anak? Enda ndai me piga-piga contoh si banci erban masyarakat erdebat ntah pe lanai ersada. Enda ncidahken maka tuhu kata-kata si lit bas Pustaka. Amin pe mesera siakap ngalokenca, arus siakui maka la lit hakta ntah pe kengasupenta guna ngatur kalak si deban. Jadi, ise nge si banci nampati kita?

Perlu sipindo petunjuk arah Pencipta. Ia ngenca si ngasup nampati kita, perban Ia kap si nciptaken kita. Enterem kalak si erpengakap maka Dibata la ermediate man banta, tapi si e labo tuhu. Keleng ate Dibata kita. E me sebapna ibere Dibata man banta Pustaka si risiken mbue nasehat si erguna. Adi siteh isi Pustaka, reh jelasna me siangkai engkai maka terbatas kengasupenta. Banci ka siteh engkai maka sejarah manusia seh kel sedihna. Sekalak ahli filsafat Jerman nari pernah nulisken bagenda: “Manusia ras pemerentahen la pernah erlajar arah sejarah ras kesalahen kalak e.”

Nina Jesus, “kepentaren teridah kap arah hasilna.” (Lukas 7:35) Salah sada contoh kepentaren lit bas Jesaya 2:22. Nina nasehat e, “Guna kiniulin kena, ula nai kena tek man manusia.” Arah nasehat e banci siteh maka lit piga-piga hal si la mungkin ilakoken manusia, emaka la kita kecewa ntah pe tek man arapen palsu. Kenneth si tading bas daerah si dem kejahaten i Amerika Utara ngataken, “Erjanji peminpin-peminpin politik guna mpekena keadan, tapi labo kalak e ngasup. Enda erban aku reh tekna man nasehat si pentar si lit bas Pustaka.”

Bagenda itulis Daniel si ituriken ndai, “Reh tekna aku maka manusia la banci merentah alu mehuli. . . . Amin pe lit tabungenta bas bank ntah pe investasita, lenga tentu terjamin masa tuata. Enggo kuidah enterem kalak si kecewa kel perban ngarapken si e.”

Payo, nasehat si pentar si lit bas Pustaka banci nampati kita gelah la kecewa perban ngarapken si la masuk akal. Tapi selain si e, Pustaka pe mereken arapen man banta. Sibahas kari kerna si e.