“Ula pernah kuatir kerna wari si pepagi, erkiteken wari si pepagi lit ka kekuatirenna sendiri.”​—MATIUS 6:34.

Maksudna: Pasti lit si erban kita kuatir tiap wari. Tapi ula min tambahi alu ngukuri kai si lenga terjadi. Emaka si pagi, pagi ka ukuri.

• Stres banci erban kita kuatir. Emaka, ingetlah enda: Si pertama, perlu tehndu maka pasti nge lit masalah. Adi terus ukurindu masalah e, reh stresna kam. Si peduaken, perlu siteh maka kai si erban kita kuatir rusur nge la terjadi.

“Kepentaren si rehna arah surga nari . . . masuk akal.”—JAKUP 3:17.

Maksudna: Ula atendu kerina bagi ukurndu. Ula mbuesa si iarapkenndu arah dirindu bage pe arah kalak si deban.

• Perlu kam masuk akal. Perlu tehndu maka lit si la banci ilakokenndu, janah kalak si deban pe lit ka si la banci ilakokenna. Dungna, kam ras kalak si deban lanai stressa. Selain si e, banci reh ulina hasil si idatndu. Perlu ka lit selera humorndu. Adi cirem kam amin pe lit akapndu si la pas, banci reh nahangna akapndu janah tetap meriah ukurndu.

‘Kalak si sabar ukurna, ia kap kalak si pentarna.’​—KUAN-KUANEN 17:27.

Maksudna: Adi kuatir kita janah merawa ateta, dungna mesera siakap rukur. Emaka perlu kita tetap tenang.

• Perlu tehndu kai saja si erban kam stres janah perdiatekenlah uga tanggapenndu sanga kam stres. Contohna, sanga kam stres perdiatekenlah uga perasanndu, perukurenndu, bage pe perbahanenndu, janah banci ka catatndu. Adi tehndu uga tanggapenndu sanga kam stres, banci reh ulina carandu ngadapisa. Selain si e, banci ka kurangindu kegiaten si erban kam stres. Adi la banci lang, reh ulinalah banndu ngaturken kegiatenndu ras waktundu.

• Ubahlah carandu rukur. Kai si erban kam stres banci saja labo akap kalak masalah. Enda tergantung uga carandu rukur. Mari sibahas telu carana:

  1. Ula mis salah sangka. Banci saja lit kalak si ilebeina kam sanga antri. Adina mis akapndu ia la sopan, dungna segat atendu ia. Emaka ula mis salah sangka, anggap sajalah lit alasenna si mehuli. Banci jadi, tuhu ka kin.

  2. Ukuri kai si banci ilakokenndu. Adi ndekah kam nimai bas rumah sakit ntah pe bas bandara, banci pakendu waktundu guna mbaca, mereksa e-mail, ntah pe ndahiken dahin si deban.

  3. Ula e saja lalap ukurindu. Cuba sungkuni bandu, ‘Adi pagi ntah pe minggu si reh, mberat denga nge kuakap masalah e?’ Perlu bedakenndu apai masalah si biasa ras apai masalah si serius.

“Lakokenlah kerinana alu cara si benar ras teratur.”​—1 KORINTI 14:40.

Maksudna: Banlah gelah lebih teratur carandu nggeluh.

• Meriah siakap adi teratur geluhta. Sada sipat si erban geluhta la teratur janah dungna stres eme tertaren-taren. Dungna reh buena dahinta si la dung. Cubakenndulah dua cara enda:

  1. Banlah jadwal si masuk akal janah dalankenlah.

  2. Pereksa kai si erban kam tertaren-taren janah pesikap kebiasan e.

“Kueteh maka la lit si terulin man banta seakatan ersenang-senang janah ngenanami kesenangen kegeluhen enda asa umur geluhta. Kita kerina banci man dingen minem janah ermeriah-meriah ngenanami kerina ulih latihta. Kerina e pemere Dibata kap.”​—PENGERANA 3:12, 13.

Maksudna: Kalak si la erngadi-ngadi erdahin lanai ‘inanamina ulih latihna.’ Lanai lit waktu ras gegehna guna ngenanami hasil kerja kerasna.

• Seimbanglah ban perukurenndu kerna dahin bage pe sen. Reh buena sen labo ertina reh riahna ukurta ntah pe lanai kita stres. Malahen si banci terjadi eme sebalikna. Nina Pengerana 5:12, “Kalak bayak mbue tuhu ertana, tapi la banci tunduh erkiteken aru atena.” Emaka puaslah kapndu nandangi kai si lit bas kam.

• Banlah waktundu guna santai. Banci reh kurangna stresndu adi ilakokenndu kai si erban meriah ukurndu. Tapi hiburen si erban kita lalap kem, si la lit pergerakenna bagi nonton TV, banci saja la lit gunana.

• Pakelah alat elektronik sanga perlu saja. Ula min rusursa pereksandu e-mail, SMS, ntah pe media sosial. Adi la kin tuhu-tuhu perlu, ula pereksa e-mail arah kantorndu adi la kin jamna erdahin.

‘Latihen gerak badan lit gunana.’​—1 TIMOTIUS 4:8.

Maksudna: Olahraga si teratur banci erban kita reh sehatna.

• Banlah kebiasan si mehuli. Olahraga banci erban kita reh tenangna, dungna la kita murah stres. Panlah pangan si ergizi janah ula sempat kam la man. Ula ka kam kurang medem.

• Ula darami jalan keluar si berbahaya, bagi ngisap, make narkoba, ntah pe mabuk-mabuk. Tangtangna tempa lanai kam banna stres, tapi dungna reh stresna kam, perban melala keri senndu janah sakit ka kam.

• Adi nggo stres kel akapndu, ula kam mela mindo penampat dokter.

“Ipastiken kena kai si lebih penting.”​—PILIPI 1:10.

Maksudna: Ukurilah kai akapndu si pentingna.

• Banlah daftar dahinndu mulai arah si pentingna nari. Alu bage, tehndu apai dahin si arus mis dahikenndu, apai si banci ipindokenndu gelah kalak si ndahikenca, ntah pe si la perlu dahikenndu.

• Bas sada minggu, catatlah ku ja saja keri waktundu. Kenca si e, ukurilah uga carana gelah reh ulina kam nggunaken waktundu. Reh beluhna kam ngaturken waktundu, reh tenangna akapndu.

• Banlah waktundu istirahat. Kentisik saja pe kam istirahat, banci kam reh semangatna janah reh kurangna stresndu.

“Aru ate erbahanca keriahen lesap, tapi ranan mehuli erbahanca ate malem.”​—KUAN-KUANEN 12:25.

Maksudna: Kata-kata si mpegegehi arah teman si ngangkai kita banci erban kita reh semangatna.

• Ngeranalah kam ras teman si ngangkai kam. Banci sampatina gelah seimbang carandu rukur ntah pe ndarami jalan keluar si banci saja lenga pernah ipikirkenndu. Adi nggo turikenndu isi pusuhndu, pasti reh nahangna akapndu.

• Pindolah penampat. Adi lanai akapndu kam ngasup ndahiken kerina dahinndu, pindolah gelah kalak si ndahikenca ntah pe ras-ras kena ndahikenca.

• Adi lit temanndu erdahin si erban kam stres, ukurilah uga gelah reh ulina keadanndu. Contohna, banci manjar-anjar katakenndu man bana uga perasanndu. (Kuan-kuanen 17:27) Adi nggo pe katakenndu tapi bage denga ia lalap, ula nai kam rusursa ngerana ras ia.

“Ermeriah ukur me kalak si iakapna perlu itandaina Dibata.”​—MATIUS 5:3.

Maksudna: Kita kerina perlu pangan, paken, ras ingan tading. Tapi la bias e saja, perlu sitandai Dibata. Gelah ermeriah ukur, arus siusahaken nandai Dibata.

• Ertotolah. Iundang Dibata kam gelah ‘mbenterken kerina kekuatirenndu man baNa, sebap iperdiatekenNa kap kam.’ (1 Petrus 5:7) Adi ertoto kita janah siukuri kai si erguna, dame me pusuhta.​—Pilipi 4:6, 7.

• Bacalah bacan si erban kam reh deherna ras Dibata. Pedah-pedah bas majalah enda ibuat arah Pustaka nari. E banci nampati kita gelah mbue sidat “kepentaren ras pemeteh.” (Kuan-kuanen 3:21) Isi Pustaka banci erban kita reh deherna ras Dibata. Nggit nge kam mbaca Pustaka? Bas buku Kuan-kuanen melala pedah si erguna. Banci cubakenndu mbacasa arah buku e nari.