Stres eme reaksi dagingta sanga lit si erban latih ukurta. Otak ngirimken sinyal, dungna reh buena hormon bas dagingta. Emaka, reh terna detak jantungta, naik tekanen darehta, reh terna kita erkesah, janah tegang otot-ototta. Lenga pe kita sadar kai si terjadi bas dagingta, dagingta e nggo siap ngadapi kai si erban kita stres. Kenca dung masa stres e, normal ka mulihi dagingta.

Stres eme reaksi normal bas dagingta si banci erban kita ngasup ngadapi masalah ntah pe bahaya. Reaksi enda mulai arah otak nari. Adi stres kita banci kita mis bertindak. Enda me stres si erguna. Stres si bage banci erban kita reh semangatna janah reh ulina carata ndatken sura-surata. Misalna sanga ujian, wawancara dahin, ntah pe sanga lit pertandingen olahraga.

Tapi bahaya adi rusursa stres ntah pe ndekahsa stres. Banci kam sakit, murah merawa, ntah pe murah sedih. Banci ka erban kam jadi murah lupa, la ngasup rukur, ntah pe panik. Perbahanenndu man kalak si deban pe lanai bagi biasa. Selain si e, stressa pe banci erban kalak jadi pemabuk, make narkoba, man tena lalap, ngisap, ntah pe ngelakoken kebiasan si deban si la mehuli. Si parahna ka, banci sedih kapna lalap, keri gegehna, janah reh ukurna bunuh diri.

Memang la seri pengaruh stres man tiap jelma. Tapi pasti lit pengaruhna man dagingta, janah banci ka erban turah erbage-bage pinakit.