Erjanji Dibata maka Doni Enda Tetap nge Pagi Lit
“Doni enda paguh kel, lebihen asangken si banci sibayangken.”
Bage me kesimpulen ahli-ahli arah erbage negara kerna perubahen iklim. Adi tek kam maka lit Pencipta si ermediate man manusia, kesimpulen ilmuwan-ilmuwan e banci saja ngingetken kam maka melala proses alami si irancang Dibata gelah doni enda banci mpehuli bana.
Amin pe bage, perban mbue kel si enggo ceda bas doni enda akibat ulah manusia, doni enda lanai banci tuhu-tuhu mpehuli bana. Tapi, nggit Dibata mpekena doni enda. Engkai maka banci kita tek ertindak pagi Dibata?
Ayat-ayat si lit bas kotak banci erban kita tek maka tetap nge pagi lit doni enda janah reh jilena.
Doni enda iciptaken Dibata. “Tangtangna iciptaken Dibata langit ras doni.”—Kejadin 1:1
Ikataken Dibata maka Ia si mpuna doni. “Jahwe a kap si mpuna doni ras kerina isina.”—Masmur 24:1
Dibata si ngerancang doni enda gelah tetap lit. “PajekkenNa doni i datas pondasina, labo pagi pernah pindah doni arah inganna nari seh rasa lalap.”—Masmur 104:5
Erjanji Dibata maka lalap pagi lit kegeluhen bas doni enda. “Dibata si benar, Si Erban doni, . . . nciptakenca labo perban la lit tujunna tapi guna iingani.” —Jesaya 45:18
Erjanji Dibata maka manusia nggeluh pagi rasa lalap bas doni enda. “Kalak si benar pagi si ndatken doni, ringan ia i je seh rasa lalap.”—Masmur 37:29
Si ilakoken manusia lit pengaruhna man doni enda. Tapi adi la parah pengaruhna, doni banci mpehuli bana. Bage kin doni enda irancang Dibata. Selain si e, ikataken Pustaka maka bas waktuna pagi, ipengadi Dibata Jahwe ulah manusia si ncedai doni.—Ketangkasen 11:18
Kenca si e, iubah Dibata pagi doni enda jadi ingan si bersih ras mejile, janah “sehkenNa sura-sura kerina si nggeluh seh asa puas.”—Masmur 145:16
a Gelar Dibata eme Jahwe.—Masmur 83:18.