DONI ENDA ENGGO REH CEDANA
Udara
PERLU kita udara guna erkesah. Selain si e, perban lit atmosfer eme lapisen udara si nutupi doni, banci kita la kena bahaya radiasi matawari. Atmosfer pe njaga doni enda gelah la beku.
Udara Enggo Terancam
Polusi udara banci mbahayaken kerina si nggeluh i doni enda. Sada persen ngenca jelma bas doni enda si banci ngirup udara si bersih si sesuai ras standar Organisasi Kesehatan Dunia.
Polusi udara banci erban penakit pernapasen, kanker paru-paru, ras penakit si lit hubungenna ras jantung bage pe pembuluh dareh. Tiap tahun, lit kira-kira pitu juta kalak si reh terna mate perban polusi udara.
Doni Enda Irancang Banci Mpehuli Bana
Doni enda lit kengasupenna mereken cukup udara si bersih man kerina mahluk hidup. Tapi si e banci terjadi adi la kotor kel udara iban manusia. Cuba perdiateken piga-piga contohna.
-
Kerina kita meteh maka karbon dioksida si lit bas udara banci iserap kerangen. Tapi la mbue si metehsa maka kerangen bakau si lit i pinggir pantai pe penting kel bas mbersihken udara. Kerangen bakau lima kali ulin bas nyerap karbon dioksida asangken kerangen tropis.
-
Menurut penelitin mbaru-mbaru enda, piga-piga jenis rumput laut, bagi kelp, labo saja banci nangkap karbon dioksida arah atmosfer, tapi banci ka ikuburna. Bas rumput laut e, lit kantong-kantong si kitik si risi udara janah si e erban ia banci ngapung seh ku tengah laut. Kenca ndauh arah pantai, pecah me kantong-kantong e janah rumput laut si melala i je karbon dioksida ndai gedap ku dasar laut. Banci saja, karbon dioksida si ibaba rumput laut ndai tetap terkubur i je seh ratusen tahun dekahna.
-
Udara lit kengasupenna mpehuli bana arah polusi si parah, bagi si teridah sanga lockdown perban COVID-19. Bas tahun 2020, kualitas udara meter kel reh ulina perban hampir la lit polusi si ihasilken pabrik ntah pe kendaran. Menurut sada laporen tahun 2020 kerna kualitas udara (“2020 World Air Quality Report”), lebih 80 persen negara si ikut bas laporen e ngataken maka udara enggo reh bersihna la ndekah kenca mulai lockdown.
Si Sangana Iusahaken
Lawes ku sekolah ntah pe ku ingan erdahin alu sepeda banci ngurangi polusi udara
Pemerentah bas erbage negri terus ngiahken pabrik-pabrik guna ngurangi polusi udara. Ilmuwan-ilmuwan pe terus ndatken cara guna ngurangi akibat polusi. Contohna, ipake kalak e bakteri guna ngubah zat si erban udara kotor jadi zat si la berbahaya. Ilmuwan-ilmuwan pe ngiahken kalak gelah nggunaken alat-alat si hemat energi i rumah janah ngiahken kalak erdalan ntah pe ersepeda, labo nggunaken kendaran.
Enterem kalak si nggunaken kompor si la ramah lingkungen, amin pe pemerentah bas piga-piga ingan enggo nikapken kompor si lebih modern
Tapi si e lenga bias. Masalah enda ibahas bas sada laporen tahun 2022, si isusun erbage-bage organisasi internasional, termasuk Organisasi Kesehatan Dunia ras Bank Dunia.
Laporen e ngataken maka bas tahun 2020, lit kira-kira sepertelu kalak i doni make kompor si erban polusi udara. Bas melala daerah, buen kalak la ngasup nukur kompor si lebih modern ntah pe nggunaken bahan bakar si lebih ramah lingkungen.
Arapen si Lit bas Pustaka
“Bagenda nina Jahwe Dibata si benar, Si Nciptaken langit bage pe . . . si erban doni ras kerina hasilna, si mereken kesah man kalak si lit i je.”—Jesaya 42:5.
Dibata kap si nciptaken udara si banci sihirup bage pe siklus alami si irancang guna mbersihken udara. Tuhu-tuhu keleng kel ateNa manusia janah lit gegehNa si la erbatas. Emaka, masuk akal nge akapndu ipehuli Dibata pagi udara si enggo kotor? Nen artikel “Erjanji Dibata maka Doni Enda Tetap nge Pagi Lit.”
