DONI ENDA ENGGO REH CEDANA
Kerangen
KERANGEN igelari “paru-paru dunia.” Engkai? Batang kayu banci serapna karbon dioksida eme gas si berbahaya man jelma. Batang kayu pe banci ngasilken oksigen eme gas si penting man kegeluhen. Lit kira-kira 80 persen sinuan-sinuan ras binatang si lit i daraten nggeluh i kerangen. Adi la lit kerangen, labo kita banci nggeluh.
Kerangen Enggo Terancam
Tiap tahun, miliaren batang kayu itabah, janah buen arah ingan e enggo iperjumai. Adi sibandingken keadan doni gundari ras keadan doni bas akhir tahun 1940-en, setengah arah kerangen si rusur udan enggo lanai lit.
Adi ceda sada kerangen janah dungna lanai lit, mate me kerina sinuan-sinuan ras binatang si lit i je.
Doni Enda Irancang Banci Mpehuli Bana
Piga-piga kerangen si enggo keri batang kayuna, lit kengasupenna si luar biasa mpehuli bana. Mbaru-mbaru enda, iteh ahli-ahli ekologi maka kerangen si enggo lanai lit i je batang kayu, banci ka turah mulihi ras mulihken jadi kerangen, janah la perlu ndekah waktuna. Cuba perdiateken contoh-contoh enda:
-
Melala kerangen si itabahi guna iperjumai, dungna lanai iperjumai. Lit 2.200 ingan si bage bas Amerika ras Afrika Barat si iteliti ahli-ahli. Iteh kalak e me maka taneh bas ingan-ingan e banci subur mulihi bas waktu kurang sepuluh tahun.
-
Bas sada hasil penelitin si iban bas majalah Science, iperkiraken peneliti-peneliti maka bas ingan-ingan ndai banci mulihi dem i je erbage jenis batang kayu, ras mahluk hidup si debanna bas waktu kira-kira 100 tahun.
-
Mbaru-mbaru enda, ilmuwan-ilmuwan bas Brasil mbandingken taneh si kosong si la isuani ras taneh kosong si ipediat turah bage-bage saja.
-
Ilaporken National Geographic, “Meriah ukur [ilmuwan-ilmuwan ndai] perban taneh si kosong e situhuna la perlu isuani batang kayu.” Bas lima tahun saja, taneh kosong si ipediat bage-bage saja “enggo dem turah batang kayu si biasa turah bas daerah e.”
Si Sangana Iusahaken
I sebelang doni, enggo iusahaken kalak ngelindungi kerangen ras mpehuli kerangen si enggo ceda. Hasilna, menurut Perserikatan Bangsa-Bangsa, “batang kayu si itabahi bas kerangen si lit i sebelang doni urak lebih 50 persen” bas 25 tahun terakhir enda.
Tapi kai si ilakoken e lenga bias guna ngelindungi kerangen. Bagenda ilaporken organisasi Global Forest Watch, “Keadan si ceda arah kerangen tropis labo mbue berubah bas piga-piga tahun enda.”
Batang-batang kayu si itabahi janah la lit ijin arah pemerentah enggo ngasilken triliunen rupiah. Janah e me penyebap utama ceda iban jelma kerangen tropis.
Arapen si Lit bas Pustaka
“Peturah Dibata Jahwe a bas taneh kerina batang kayu si mejile man tatapen janah buahna banci ipan.”—Kejadin 2:9.
Irancang Pencipta gelah kerangen banci terus erguna man jelma, adi kerangen e la ceda ban jelma. IjagaNa ateNa kerangen ras kerina kegeluhen si lit i je.
Ituriken bas Pustaka maka labo ipediat Dibata manusia si mentingken bana ncedai doni ras kerina si nggeluh i je. Nen artikel “Erjanji Dibata maka Doni Enda Tetap nge Pagi Lit,” bas halamen 15.
a Gelar Dibata eme Jahwe.—Masmur 83:18.