DONI ENDA ENGGO REH CEDANA
Lau Bersih
KEGELUHEN labo mungkin lit adi la lit lau, terlebih ka adi la lit lau bersih. Si pentingna kel iakap mahluk hidup eme lau. Lau si iperluken manusia, binatang, ras sinuan-sinuan banci sidat arah danau, lau maler, rawa-rawa, bage pe lau si lit bas taneh.
Lau Bersih Enggo Terancam
Lau me si mbuena bas doni enda. Tapi, menurut Organisasi Meteorologi Dunia, “0,5 persen ngenca lau bersih si banci ipake si lit i doni.” Amin pe sitik ngenca jumlah lau e, tapi situhuna bias man kerina mahluk hidup i doni. Tapi buen arah lau e enggo kotor ntah pe mesera ndatkenca perban reh buena lau si iperluken ras perban perubahen iklim. Ikataken ahli-ahli maka bas 30 tahun ku lebe, lit lima miliar kalak si mesera pagi kapna ndatken lau si bersih.
Doni Enda Irancang Banci Mpehuli Bana
Proses alami si lit i doni, banci erban persedian lau tetap lit. Selain si e, taneh, mahluk hidup bas lau, ras sinar matawari kerja sama guna erban lau jadi bersih. Perdiateken piga-piga bukti si ncidahken maka doni enda irancang gelah banci mpehuli bana.
-
Taneh banci mbersihken lau arah mbue zat si berbahaya alu cara si seh kel ulina. Bas rawa-rawa, lit piga-piga jenis sinuan-sinuan si banci nyaring nitrogen, posfor, ras pestisida.
-
Enggo iteh ilmuwan-ilmuwan maka lit proses alami guna mbersihken lau si kotor perban limbah organik. Zat-zat si berbahaya iencerken lau si maler, kenca si e iuraiken bakteri.
-
Bas piga-piga wari saja, kerang air tawar banci mbersihken lau arah zat-zat kimia si berbahaya. Janah cara kerang-kerang e mbersihken lau ulin asangken si ilakoken instalasi pengolahen lau.
-
Siklus lau ras erbage proses alami si debanna, erban lau la ndarat arah atmosfer janah tetap lit i doni.
Si Sangana Iusahaken
Adi sipesikap oli si bocor ras siambekken zat si lit racunna alu cara si benar, ikut kita njaga lau tetap bersih
Isaranken ilmuwan-ilmuwan gelah la sisia-siaken lau janah asa ngasupta ula siban kotor lau. Piga-piga cara si banci silakoken eme alu mpekena kendaranta si bocor olina, la siambekken obat ku kloset, janah la siambekken zat si lit racunna ku saluren pembuangen lau.
Enggo idat peneliti-peneliti ka cara si mbaru si luar biasa guna meneken sira arah lau laut. Tujunna eme gelah reh buena lau bersih si banci iinem.
Tapi masalahna, guna meneken sira arah lau laut, merga kel biayana janah mbue kel energi si iperluken. Memang gundari enggo lit kemajun bas pengolahen lau bersih. Amin pe bage, bas laporen tahun 2021 kerna pengolahen lau bersih, salah sada lembaga Perserikatan Bangsa-Bangsa ngataken, “I sebelang doni, kemajun si lit gundari perlu denga itingkatken dua kali lipat.”
Arapen si Lit bas Pustaka
“Dibata kap si erban lau nangkih ku datas, jenari bentukNa jadi tak-tak udan. Kenca si e banNa udan e naktak bas embun nari, janah nusur udan e ku kerina manusia.” —Jop 36:26-28.
Iciptaken Dibata siklus alam gelah lau bersih tetap lit bas doni enda.—Pengerana 1:7.
Pencipta si ngerancang proses guna erban lau banci tetap bersih. Menurutndu, masuk akal nge adi tek kita ngasup ras nggit Dibata mpekena masalah lau bersih si iban manusia? Nen artikel “Erjanji Dibata maka Doni Enda Tetap nge Pagi Lit,” bas halamen 15.
