Ngergai Kalak si Deban
ENGKAI MAKA PENTING?
Adi siergai kalak si deban, la turah perubaten janah la tambah masalahta.
-
Lit kata-kata bijak bas Pustaka si Badia. Nina, “Jawapen si lembut, erban pusuh lanai merawa, tapi ranan si kasar, banci erban merawa.” (Kuan-kuanen 15:1) Bali bagi bensin si isiram ku api, kata-kata ras perbahanen si la sopan banci erban turah masalah si mbelin.
-
Pernah ikataken Jesus, “Kai si ibelasken rehna bas pusuh nari.” (Matius 12:34) Adi la kita sopan ngerana man kalak si deban, e ertina negatip perukurenta kerna ia, banci saja perban sukuta, bangsata, ntah pe perban carata ipebelin la seri ras ia.
Bas tahun 2023, lit iban survei si gelarna Edelman Trust Barometer. Survei e ilakoken man 32.000 kalak arah 28 negri. Lebih setengah arah kalak e ngataken maka gundari me si buena jelma si la sopan ras la ngergai kalak.
SI BANCI LAKOKENNDU
Ergailah kerina jelma, termasuk kalak si la seri cara rukurna ras kam. Sanga ngerana kam ras kalak si deban, daramilah persaman kena. Alu bage, la mis pandangindu ia ntah pe hakimindu.
Mehulilah kam man kerina jelma. Adi mehuli kam janah ergaindu kerina jelma, mbelin kemungkinenna bage ka ia man bandu.
Nggitlah ngampuni. Adi kasar ranan kalak man banta ntah pe la mehuli perbahanenna, ula mis siakap ia sengaja. Siusahakenlah gelah positip perukurenta kerna ia.
SI ILAKOKEN KAMI
Saksi-Saksi Jahwe ngergai kerina jelma, janah meriah ukur kalak e nampati kalak si deban gelah siergan.
Ibagiken kami informasi arah Pustaka alu gratis man kerina jelma. Tapi, labo ipaksaken kami kiniteken kami ntah pe pendapat kami man kalak si deban. Usahaken kami ngikutken nasehat Pustaka si ngataken, “Jawaplah alu lembut ras mehamat.”—1 Petrus 3:15; 2 Timotius 2:24.
La beda-bedaken kami kerina jelma. Alo-alo kami ise pe si reh ku perpulungen kami guna erlajar Pustaka. Usahaken kami ‘mehamat man erbage-bage jelma’ amin pe la seri pendapatna ras kami.—1 Petrus 2:17.
Mehamat kami man pemerentah. Contohna, patuh kami man undang-undang janah galari kami pajak. (Roma 13:1) Selain si e, amin pe netral kami bas politik, ergai kami keputusen kalak kerna politik.
