Ngergai Kegeluhen

MAINKEN

Ngergai Kegeluhen

ENGKAI MAKA PENTING?

Adi silakoken kai si banci erban kita sakit, janah siban bahaya kegeluhen kalak, e ertina la siergai kegeluhen.

Ngisap labo saja banci erban kita sakit kanker, tapi banci ka erban lemah dagingta ngelawan sakit kanker. Kira-kira 90 persen kalak si mate perban kanker paru-paru eme kalak si ngisap ntah pe kalak si rusur ndeher ras kalak si ngisap (perokok pasif).
Tiap tahun, penembaken massal erban enterem kalak trauma. Universitas Stanford bas Amerika Serikat ngataken, “Menurut sada penelitin, kalak si selamat (arah penembaken i sekolah) amin pe dagingna la lit luka, tapi banci ia trauma seh piga-piga tahun dekahna.”
Adi kalak si lit bas pengaruh alkohol ntah pe narkoba maba kendaran, banci banna bahaya pengendara si deban, termasuk kalak si erdalan. Kalak si bage la ngergai kegeluhen janah biasana kalak si deban si jadi korbanna.

SI BANCI LAKOKENNDU

Jagalah kesehatenndu. Labo lit kata terlambat guna mpengadi kebiasan si ncedai dagingta bagi ngisap, nggunaken vape (isap elektrik), mabuk-mabuk, ntah pe make narkoba. Kalak si bage kebiasanna, situhuna la ergaina kegeluhenna bage pe kalak si lit i sekitarna, termasuk keluargana.

‘Mari sibersihken dirita arah kai pe si banci erban dagingta najis.’—2 Korinti 7:1.

Utamakenlah keselamaten. Rawatlah rumahndu gelah ula lit si cilaka i je. Hati-hatilah kam sanga maba kendaran, janah pastiken kendaranndu kondisina mejile. Amin pe lit kalak si maksa kam, ula kam tergoda ngelakoken kegiaten si banci erban cilaka ntah pe mate.

“Adi mbangun rumah kena, arus ban kena pagar tembok i atap rumah kena, gelah kena ras keluarga kena la rutang dareh adi lit kalak si ndabuh arah atap rumah kena e.”—Ulangen 22:8. a

Mehulilah man kalak si deban. Adi siergai kegeluhen, mehuli kita man kerina kalak, termasuk si sukuna, bangsana, ras carana ipebelin la seri ras kita. Ingetlah, perukuren si negatip ras perasan segat ate me si biasana erban mbue kejahaten ras peperangen i doni enda.

‘Tadingkenlah kerina perasan dendam, merawa, ngamuk, megang ngerana janah kasar kata-katana, ras ngisakken, bage pe kerina si la mehuli. Tapi mehulilah man sada ras si debanna.’—Epesus 4:31, 32.

SI ILAKOKEN KAMI

Saksi-Saksi Jahwe ngiahken enterem kalak guna njaga kesehaten. Informasi arah Pustaka si Badia si ibagiken kami enggo berhasil nampati kalak ngatasi kecanduan ras mpengadi kebiasan si la mehuli.

Utamaken kami keselamaten bas proyek pembangunen kami. Sanga ibangun kami ingan ibadah kami bage pe fasilitas si ipake guna pendidiken Pustaka si Badia, tinggi kel standar keselamaten kami. Relawan kami pe ilatih guna erdahin alu aman. Ratur pereksa kami bangunen kami gelah sesuai ras patoken kerna keselamaten bas ingan e.

Ibereken kami bantuan kemanusian. Bas tahun 2022, igunaken kami dana sumbangen kira-kira 180 miliar rupiah sanga terjadi kira-kira 200 bencana i sebelang doni.

Sanga lit virus Ebola bas Afrika Barat tahun 2014 ras bas Republik Demokratik Kongo tahun 2018, sampati kami enterem kalak gelah itehna uga penyebaren penakit si berbahaya e. Ipeseh kami ka khotbah si judulna “Selamat Perban Patuh” man kalak si reh ku ingan ibadah kami. Selain si e, isikapken kami ingan guna nuci tan bas tiap pintu masuk. Turiken kami ka maka penting kel nuci tan ras erban tindaken pencegahen si debanna.

Bas salah sada siaren radio i Sierra Leone, Saksi-Saksi Jahwe ipuji perban nggit nampati jemaatna ras kalak si deban gelah la kena virus Ebola.

Ingan nuci tan bas Bale Kerajan sanga lit virus Ebola i Liberia tahun 2014

a Mbarenda, kalak si tading bas Timur Tengah wajip ngikutken peraturen enda sebap atap rumah kalak e rata janah bas ingan e biasa kalak e ngelakoken kegiaten tiap wari. Alu bage, banci utamaken kalak e keselamaten keluargana ras kalak si deban.

PERDIATEKENLAH!