Kiniseran sekalak jelma terjadi perban perbahanenna bas geluhna si gundari ntah pe bas geluhna si mbarenda. Adi lanai ukurina kai si lit bas doni enda, dungna banci ia seh ku moksa, maksudna bebas arah reinkarnasi.

Kiniseran eme hukumen perban ngelakoken dosa bage pe percuban guna nguji kiniteken. Menurut Dr. Sayyid Syeed eme presiden Masyarakat Islam Amerika Utara, kiniseran e jadi persinget “gelah kalak la lupa ngataken bujur man Dibata kerna pasu-pasu si enggo ibereNa ras gelah nggit mere man kalak si merluken.”

Kiniseran sekalak jelma terjadi perban perbahanenna. Lit kalak Jahudi si tek maka kalak si la ersalah janah mesera pergeluhna, banci nggeluh mulihi. Kabbalah (kiniteken mistik kalak Jahudi) ngajarken lit reinkarnasi. Emaka lit piga-piga kali kesempaten kalak guna nebus salahna.

Kiniseran inanami kalak aminna pe ia enggo ilahirken piga-piga kali. Lanai inanamina kiniseran adi lanai ilakokenna kai si salah, janah enggo ambekkenna perasan ras sura-sura si la mehuli. Adi pentar ia ras mehuli perbahanenna, janah bersih perukurenna, banci idatna nirwana eme keadan si lanai lit kiniseran.

Menurut sada buku eme A Dictionary of Comparative Religion, buen kiniseran terjadi perban “kejahaten ras kesalahen manusia.” Ajaren Konghucu ngataken maka kiniseran e banci ikurangi adi mehuli perbahanen sekalak jelma. Selain si e kiniseran pe banci terjadi perban “mahluk roh si ndauh gegehen asangken manusia, janah la lit si banci ilakoken manusia selain ngaloken nasipna.”

Kiniseran e terjadi perban ilmu gaib ntah pe ilmu sihir. Mahluk roh banci mereken rejeki ntah pe banci erban sial. Tapi kiniseran si terjadi perban mahluk roh e, banci ikurangi alu erban acara ritual. Tek kalak e adi ikutkenna kai si ikataken dukun janah ipakena ramuan arah dukun, dungna kalak si sakit ndai banci malem.

Bagi si ikataken Pustaka si Badia bas buku Kejadin, kiniseran terjadi perban dosa si ilakoken manusia pertama. Tapi melala sekte agama Kristen si nambahi ajaren e alu pendapatna sendiri. Misalna, piga-piga ajaren Katolik ngataken maka sekalak jelma banci ngorbanken kiniseran si inanamina jadi persembahenna man Dibata. Tujunna gelah gerejana ipasu-ipasu Dibata ntah pe gelah kalak si deban iselamatken.